إلحقوني ياعصابة، بوظت دهان السيتي....
طبعا إنتوا عارفين إني مستلم السيتي من 3 أيام بالظبط ويوم الجمعة إمبارح الدنيا مطرت جامد جدا. عرفت يومها إن في واحد عندنا في المنوفية بيبع غطيان ووتر بروف.
روحت له واشتريت واحد ولقيت عنده فوطه قال إن إسمها جلد غزال. وكنت سمعت عنها هنا في المنتدى. سألته بتستخدمها إزاي؟ قال بعد ما تخلص غسيل خالص نشف بيها العربية. قلت آمين
النهاردة الصبح غسلت العربية من الطينة اللي كانت فيها بالمياة فقط لا غير واستخدمت فوطة صفراء جديدة ونشفت بالفوطة الجلد الغزال.
طبعا لا نشفت ولا حاجة
ولا حظت برضه في كل العربية إن في خرابيش صغيرة جدا وكتيرة جدا هي مش محسوسة خالص ومش باينة إلا لما تدقق قوي في الدهان. مش عارف بقى الخرابيش دي كانت قبل الغسيل ولا بعده.
ولقيت حتة في الصاج الفوطة علمت فيها والحتة دي بقت مجيرة ولونها باهت غير لون العربية.
طبعا إتنكد عليا ومش عارف أعمل إيه.
ومن كتر ما أنا بفكر فيها مش عارف أشتغل في العيادة خالص
أنا مش فاهم نهائي إيه اللي حصل؟
وهل الواكس يضيع الكلام ده كله ولا لأ؟
وخلاص أنا حرمت تماما أمد إيدي تاني على العربية. خصوصا إني تعبت جدا عشان أجيب العربية دي وفرحان بيها
الحمد لله
والسلام ختام
