طيب كل المميزات دي و75% بس
عرض للطباعة
طيب كل المميزات دي و75% بس
[frame="9 80"]زى ماوعدتكم انى حانقل لكم تجربتى فى مركز الصيانة النهاردة .... ادينى حاقولكم ايه اللى حصل بكل صراحة
انا وصلت هناك الساعة 9:45ص واول ماوصلت دخلت على مهندس اسمه/محمد عبد العال ( فى منتهى الذوق)
طلع معايا شاف العربية فيها ايه وانا باشتكى من ايه فيها و كتب ملاحظته فى ورقة صفراء ودخل العربية وعطى اوردر انهم يشوفوا فيها ايه و طلع معايا مهندس تانى اسمه/مهندس هشام ( شاب صغير بس ذوق اوى ) وفعلا ساق العربية وانا جنبه وسمع الصوت اللى مضايقنى ( اللى هو تقريبا كما اعتقد انه مساعدمحلول شوية و عايز يتربط ) وجرب الكلاكس وقاللى انه كده طبيعى لانه الكلاكس مش جلد لكنه فيبر و لما استخدمه اكتر شوية حينعم معايا بس وعدنى انه يحاول يخليهولى احسن شوية لحد ماينعم معايا
وسالته عن ان السنتر مش بيقفل على سرعة 40 كيلومتر/الساعة ( قاللى انهم لغوا الاوبشن ده من 2010) لان فيه ناس كتير اشتكت ان اللى بيبقوا راكبين ومش عارفين ان السنتر مقفول كل مايجوا يفتحوا الباب ويلاقوا المقبض معلق معاهم يتعافوا عليه ف يكسروه - وقاللى كمان ان الاوبشن ده بيحمل على الكارتة الكهربائية كتير - المهم انهم لغوه ومطلعش فيه عيب ) وكنت عايز اظبط زوايا لانى كنت حاسس ان العربية بتحدف يمين شوية صغيرين
المهم
أخدوا منى العربية و رحت قعدت على كافيه ساعة و ربع و بعدين رحتلهم لقيت العربية لسه ماتعملش فيها حاجة ( بصراحة كان المركز زحمة جدا اليوم ده بجد) فلما سالت قالولى لسه والله مافيش ونش فاضى والزوايا بعد الساعة 3 العصر
مشيت وقولتلهم لما تخلصوا كلمونى اجى اخدها
كلمونى الساعة 4 الا ربع قالولى العربية خلصت رحتلهم .. وصلت على الساعة 4 و نص تقريبا
طلعت اجرب العربية لقيت التالى :
الصوت اللى فيها من ورا زى ماهو
التارة معوجة يمين اوى
لفيت و رجعتلهم واتكلمت معاه بهدوء بصراحة و الناس بجد كانوا ذوق اوى وبلغونى ان فيه مهندس اسمه مهندس/طارق ) مدير المركز) هو اللى جربها و قال ان خلاص مافيهاش حاجة
المهم بصراحة عدلولى التارة بتاعة الدركسيون و بقت 100 فل و عشرة ( كانت التارة هى اللى معوجة مش الزوايا عايزة تتظبط)
و المهندس/هشام بصراحة كان ذوق اوى وطلع معايا تانى عشان يتأكد ان الصوت لسه موجود ووعدنى انى اجى فى يوم تانى وانه يقف على العربية بنفسه وقاللى : ( انا اسف بجد بس النهاردة كان فيه 6 عربيات تغيير سير تقسيمة و 4 عربيات حل مواتير )
قال لى والله انا بجد اسف ووعد منى انك فى الميعاد الجاى اللى حتيجى فيه انى اقف على العربية ينفسى وحاطلعهالك من هنا مافيهاش الهوا - انا عارف فيها ايه وحاعملهالك بنفسى و اتأسف لى تانى وقاللى انا مش عايزك تزعل بجد بس
رحت للمهندس/محمد عبد العال ( مهندس الاستقبال ) اخد لى ميعاد يوم الاتنين القادم
بس بصراحة وانا راجع بالعربية لقيتها انعم من امبارح بكتير بصراحة والعربية بقت استجابتها اكبر .
ولقيت حاجة صغيرة بس ماكانتش باينة اللا لما سقتها بالليل النهاردة ( الكشافات الامامية نورها حادف شمال اكتر من اليمين )
ودى حاجة بسيطة ممكن اى كهربائى حتى يعملها ( الكشافات عايزة تترجلش و تيجى يمين شوية بس )
بس برضه حاقولهم عليها لما اروح مركز الصيانة تانى ان شاء الله
الملخص
بالرغم من الحاجات اللى انا لقيتها فى العربية ( حاجات بسيطة كلها عيوب تجميع من الشعب المصرى العريق )
العربية بصراحة تحـــــــــــــــــــــــ ــــــفة وكل مدى ما بتبقى انعم على الطريق بصراحة وكل ما الكاوتش بيمشى على الطريق اكتر كل ما بيبقى احلى و انعم و اطرى
العربية عاجبانى لحد دلوقت بس كنت اتمنى انى مالاقيش عيوب التجميع دى فيها ( كانت حتبقى بجد 10 على 10 )
بس البركة فى الشعب المصرى المتفانى فى العمل
[/frame]
الحمد لله ان شاء الله كل عيوب التجميع المصرى سوف يتم تلافيها مع الصيانات
و ما تنساش انك لازم تروح التوكيل كل 3 شهور للمتابعة حتى لو ما كنتش عملت الكيلو مترات المتفق عليها فى جدول الصيانات علشان الضمان بتاع العربية ما يسقطتش
الصيانات كل 5 الاف كيلو أو كل 3 شهور أو ايهما أقرب (ده بخلاف صيانة الالف كيلو الاولى)
أنا جربت الكلاكس فى 516 فول أوبشن عند المصرية للسيارات وجدته ممتاز الكلاكس بيضرب على طول بمجرد الضغط عليه لازم تصر على اصلاحه يوم الاثنين انشاء الله
[frame="4 80"]والله هم قالولى ان ده العادى بتاعه وانا سالت اصحابى لقيتهم بيقولوا كده برضه ..... بس انت الاول جربت التارة الجديدة والا التارة القديمة.؟؟ لان التارة القديمة فعلا الكلاكس بتاعها استجابته كويسة
وبعدين فى التارة الجديدة ده مش بيبان من انك تجربها فى المعرض و خلاص لأ ...... لازم تجرب تضغط عليها كانك مثلا بتزمر لواحد صاحبك وانت مستنيه فى الشارع بنغمة معينة..... لو عملت كده ممكن يخيب معاك
عموما انا حاشوف ان شاء الله يوم الاتنين
[/frame]
انا برضه ان شاء الله حاروح العالمية للسيارات ليا صديق ليا هناك حاروح اجرب هناك نفس السيارة بتاعتى ان شاء الله وحاشوف حنعمل معاهم ايه
يبقى انت اكيد ف مصر
السلام عليكم
حضرتك بقالك 3 ايام ما ردتش علي الموضوع و ما قولتش صلحو لحضرتك العربية و لا لأ
انا اصلي متابع حضرتك من المنتدي بتاع العربية التانية و كما تعرف ان سعرها زاد ف الواحد بقي هاراجع نفسو علي العربية دي تاني و يشوف اخبارها اية
و سوال صغير معلش
العربية من ورا الكنبة اللي ورا يعني واسعة ولا ضيقة لان احنا ساعات كتير بنقعد 4 ورا في كيا برايد و مزنوقين بس مش اوي ف دي بقي واسعة ولا لا مش لازم لل اربعة و لكن بوجة عام الكنبة الي ورا اخبارها اية
و ياريت حضرتك تقولي جبت العربية بكام بالظبط منين و دفعت كام ترخيص و تخليص ورق و كدا (يا ريت بعد اذن حضرتك كل سعر و جنبو دا بتاع اية )
انا عارف اني طولت علي حضرتك و الف شكر و ربنا يباركلك فيها
[frame="9 80"]اخى العزيز may_moon
انا كنت النهاردة فى التوكيل و غيروا لى المساعد اليمين ورا ( ببلاش ) وبصراحة من غير مناهدة ..... المهندس هشام بصراحة فى غاية الذوق والامانة وشاب محترم جدا جدا جدا
بس وانا ماشى لقيت الصوت موجود تانى بس بنسبة أقل 50% بس المرة دى من قدام وواضح اننا لما كنا بنسمع الصوت من ورا
كان اساسه ان الصوت من ورا وقدام بس واضح ان المساعد اللى ورا يمين كان بايظ اكتر ( بصراحة معرفش كان فيه ايه - المهم انهم غيروه و خلاص ) وبصراحة الصوت راح خالص تقريبا من ورا
ولما كلمت المهندس هشام بعد ما مشيت بصراحة الراجل كان فى غاية الذوق و قاللى المهم ان الصوت اللى ورا راح ...... خد ميعاد الاسبوع اللى جاى و لما تيجى نشتغل فى المساعدين اللى قدام ومايهمكش حاجة
ده بالنسبة للصوت اللى كنت باسمعه
اما بالنسبة للعربية من روا ( الكنبة ) واسعة جـــــــــــــــــــــدا جــــــــــــــــــــــــ ـــــدا وحتى لو مرجع الكرسيين اللى قدام للأخر ( برضه اللى فى الكنبة حيبقوا مستريحين وعارفين يقعدوا كويس )
وبالنسبة انها تكفى 4 افراد ( اعتقد انها تكفى اوى ) بس على فكرة اى عربية مهما كانت واسعة المفروض ان ورا 3 افراد بس يا باشا _ ربنا يزيد و يبارك
أما بالنسية لسعرها :
انا جبتها من الوكيل ( وكيل فرعى من ابو الفتوح ) فرع اسمه ستار كار ( ناس فى منتهى الذوق بجد و محترمين فى التعامل )
وعلى فكرة لما الورق بتاع العربية اتأخر شوية ( أخدت النمر التجارية 5 أيام كاملين ) ببلاش او بمعنى أصح دفعت بصراحة 50 جنيه ذوقيا بس مش اكتر
وفى راجل اسمه أستاذ محمود ( راجل كبير فوق الخمسه والاربعين سنه ) راجل ذوق ذوق ذوق بجد ومحترم جدا وأمين جدا
من المعرض نفسه - عملتله توكيل رسمى عام وهو خلصلى كل حاجة بصراحة وحتى لما الورق اللى بييجى من ابو الفتوح ويروح للمرور اتأخر - الراجل كلمهم فى القاهرة و طلب منهم فاكس بالعربية بتاعتى بس عشان يخلصهالى و راح مرور ابيس و مرور محرم بيك عشان ياخد تأشيرة الترخيص و خلصلى الورق كله بصراحة ف 4 ساعات
بالنسبة للسعر .............. خفضولى 500 جنيه يعنى دفعت ( 60500 )
ودفعت ( 100 جنيه زيادة ) عشان العربية كانت جاية من القاهرة على كساحة مخصوص عشانى
وبالنسبة للترخيص . كله على بعضه 785 جنيه بالاكراميات
( بصراحة مش فاكر التفاصيل )
بس انا رخصت سنة واحدة بس
لو كنت حارخص 3 سنين كانت المصاريف حتبقى ( 1500 جنيه بدل من 789 جنيه )
واديت استاذ محمود اللى خلصلى الورق (115جنيه ) - بقية الـ785 + 100 جنيه
يعنى كده كله على بعضه......
( 61500 جنيه )
وانا تحت أمرك فى اى معلومة تانية فى اى وقت
وعلى فكرة بغض النظر عن الصوت اللى انا كنت سامعه واللى كان سببه المساعد
العربية زى الـــــــــــــــــــــــ ــــــــفل والله العظيم و الحمد لله بسم الله ماشاء الله
[/frame]
ربنا يباركلك فيها
السلام عليكم و رحمة الله و بركاته
اول حاجة الف شكر
لا والله اكتر من الف بكتيــــر
رد حضرتك دا انا هاستخدمو كمرجع ان شاء الله لو رسيت علي العربية دي
والمفروض الرد دا يبقي في موضوع منفصل لان دا مهم جدا لاي واحد رايح يشتري العربية
و بالنسبة ل موضوع 4 ورا ف دا بيبقي مش علي طول دا ساعت السفر مثلا او كدا .. هوا في عربية بتكفي 4 ورا (اربعة بالحجم التقيل ماشاء الله)
بس اعتقد انها كدا واسعة جدا
انا ناوي اروح اشوفها في المعرض ان شاء الله قريب بس لما اخلص امتحانات
و ربنا يبارك لحضرتك فيها و يبعد عنك شرها و تجيب احسن منها مية مرة باذن الله
بس هل حضرتك كدا جبتها ارخص من التوكيل ولا اية لان انا اعرف ان سعرها 62 و حضرتك بتقول جبتها ب61
دا فعلا صحيح يعني المعرض دا ارخص من التوكيل ولا اية
والف شكر مرة تانية و جزاك الله كل خير