عايز رأى حضراتكم فى موقف حصل ليا
السلام عليكم
انا عايز اتكلم عن موقف حصللى من يومين وعايز اخد راي حضراتكم
من فترة انا كنت معزوم على فرح باحد نوادى القوات المسلحة النيلية .. المكان كان جميل وعجبنى من حيث فيو النيل والجو العائلى والخدمات الموجودة .. فرحت سألت عن وجود عضوية لغير المدنيين لانى مش ضابط .. رد عليا الموظف: يمكن لغير المدنيين الاشتراك مع احضار صورة البطاقة القومى وصورة المؤهل ومبلغ الاشتراك وصورتين شخصيتين.
وافقت .. وقولت ليه لا .. انا هاستفيد من العضويه فى خروجاتى العائلية فى مكان محترم يتبع القوات المسلحة.
روحت ومعايا الاوراق المطلوبة وملأت استمارة اللى اعطهالى ودفعت الاشتراك .. وقاللى نصف ساعة واعملك الكارنيه .. قولتله شكرا
وقولت : انا مختش ايصال بالمبلغ .. كان رده: لا مفيش ايصالات !
استغربت جدا .. ليه مفيش ايصالات ؟!
حضرتك تدفع وهتاخد كارنيه ..
اشمعنى مفيش ايصال ؟ .. قاللى : كل اللى اشتركوا مخدوش ايصالات
بصراحة اتضايقت .. وقتلله طلبت اقابل المدير
روحت قابلته وكان برتبة عميد وحكيتله على المشكلة وقولت له ان المنطقى وجود ايصال
اكد لى عدم وجود ايصال للسداد !! وان هوا ده نظام المكان !!
خرجت من عنده ومشيت
بفكر ليه مفيش ايصالات؟؟ اى واحد يسدد رسوم كعضوية او اشتراكات طبيعى يكون فيه ايصال من مستلم المبلغ
لانى ازاى ادفع اى مبلغ يقوله الموظف بتاع الادارة كده وخلاص .. وعلى اى اساس ؟
هل المبلغ فعلا بيتغير كل شويه .. عشان كده الادارة مش عايزة تثبته؟
هل مفيش ايصالات عشان المكان ما يثبتش المبالغ دى فى ايرادات المكان بسبب الضرائب مثلا؟؟
الموقف بسيط لكن ضايقنى لاننى حاسس ان الموقف مش مظبوط ..
لو حد عنده رأى تانى ياريت يقوله .. وياريت حد يقولى الاماكن دى بتخضع لرقابة من؟