الموضوع: هباب اسود

مساء الخير ياشباب. عاوز اخد رأيكم في حاجة. لما اشتريت العربية الأسكورت اول شهر 8 اللي فات لاحظت ان الشكمان فيه هباب اسود وبيظهر دخان اسود خفيف لما ازود بنزين. عملت لها سيرفيس بسيط عند مركز الأخوة (سيد خليل) غيرت البوجيهات (موتور كرافت) وغيرت الزيت والأسطى سيد طلب مني اغير فلتر الهواء وانا مارضيتش لأني لقيت ان الفلتر اللي راكب "شكله" كويس بمعنى انه كان لونه ابيض فنفخ الفلتر بكمبريسور الهواء وركبه تاني. دلوقتي لازال الشكمان مهبب "مش مزيت ياجماعة" ويوم الجمعة اللي قبل اللي فاتت روحت تاني لأني كنت سامع نقرة تاكيهات وفعلا الأسطى سعد اخو سيد فك غطاء وش التاكيهات ولقى فيه تاكيه فاتح وظبطه وفعلا النقرة راحت الا انه لاحظ ان الزيت لونه غامق مش محروق مع العلم انه مش بينقص. لما سألت صديق بيشتغل مهندس سيارات قال ان فلتر الهواء لو مسدود بيعمل الهباب ده ولازم يتغير لأنه بيغير في خليط الوقود بمعنى انه بيتم ضخ بنزين زيادة لتعويض النقص في الهواء وده بيؤدي الى ان لون الزيت بيبقى غامق. ياريت تفيدوني ياجماعة اذا كنت محتاج اني اغير الفلتر بس ولا محتاج كمان اني اضبط الكربراتير وهل قطب او احمد فرج كويسين في حكاية الضبط دي ولا لأ.

تغير الفلتر ملهوش ضرر يعنى لو جبت فلتر و جربت و طلع العيب من حاجة تانية ممكن تخليه عندك لحد ما الفلتر الي راكب يحتاج يتغير