ياريتنى جبتها خليجى ... :-(
السلام عليكم
اعذرونى انا مش فى المود ومتعكنن :036:
من حوالى شهر موتور مياه المساحات مش بيطلع مياه علشان غسيل الزجاج
افتكرت قربة المياه خلصت مع انى متأكد ان فيها 3/4 على الاقل .. وفعلا لقيتها فيها مياه
قلت يبقى فيوز - شيكت عليه لقيته سليم - فخمنت انه ماتور المياه - وفضلت منتظر ومكسل اروح التوكيل
علشان ورايا شغل...، الكام يوم اللى كان فيهم مطر من حوالى اسبوعين اتروقت فى الطريق
من طين العربيات والازاز اتردم والمياه مقطوعة - قلت ما بدهاش روحت متصل احجز صيانة ال35000
وبالمرة يشوفه حكاية المياه - فوجئت طبعا بان اقرب ميعاد صيانة بعد 13 يوم واللى هو كان النهاردة
طبعا صحيت من النجمة علشان اكون هناك 8 ونصف وبالفعل وصلت فى الميعاد وعلى مادخلت العربية
كانت بقت 9 والوقت المتوقع للتسليم 4 ساعات ... ليه كده يا باشمهندس ... هو كده .. انا ماشى
سئلت على م/ خالد فاروق قالى ما جاش النهاردة ...
بعد اربع ساعات من الملل والشاشة بتاعة المتابعة لسه العربية ويتنج خرجت اشوف العربية مافيش
كمان انتظار نص ساعة وحالة العربية مازالت ويتنج - خرجت لقيت العربية برة سئلت
الرسيبشن شوف مهندس الاستقبال اللى استلم العربية - لقيت م/اشرف حسين تفضل مشكورا
باستدعاؤه خد منى امر الشغل وادانى اذن الخروج وورقة مكتوب فيها المطلوب تغيره فى
الصيانة القادمة (تيل امامى - فانوس خلفى - وموتور مياه المساحات)
انا شوفت موتور المياه واتجننت هو انت ماغيرتهوش؟؟؟!!! لاء مطلوب 320 جنيه
انا: طيب ماقولتش ليه؟ وبعدين العربية فى الضمان هو الضمان ده بيشمل ايه بالظبط؟؟؟!!!
هو: وش كده ده عيب استخدام وكمان مش موجود ،... يانهار اسود عيب استخدام ايه :banghead:
روحت ل م/اشرف يشوف الحكاية وبقول له الضمان ده بيفيد فى ايه بالظبط.. قالى انت عمل كام كم
قولتله 34400 ... طيب العربية ماتخبطتش منك .. انا : لاء... ما هى العربية قدمهم ايه
قالى خلاص هنعمل اوردر بيه وخلال 10 ايام هنبقى نكلمك ... شكرته ومافيش امامى
غير انى امشى علشان الشغل
العربية المفتاح مش فيها سئلت قالولى شوف مهندس الاستقبال اللى معاك ... طبعا اختفى
ادور عليه مافيش
سئلت الرسيبشن الانسة تفضلت مشكورة بعد ان عصرت على نفسها لمونة علشان ترد عليا
شوف حد من السواقين اللى بره
ولا كأنى بشحت - جبت كتيب الضمان علشان اختمه - تكرارت نفس الحكاية من نفس الاستاذة
شوف مهندس الاستقبال اللى معاك - طبعا - مختفى لحد مالقيت واحد تانى وكلمته بكل ود وتعطف انه ممكن يختم لى الضمان...
الحمد لله انه كان محترم ان قام بالمهمة بدون تذمر وعلى وشه ابتسامة
___________
ابسط كلمة تتقلك عيب استخدام (موتور مدفون فى قلب العربية) هسيىء استخدامه ازاى؟؟؟!!!
دايما العيب عندك ( يمكن خبط العربية)
اى حاجة المهم انك تبقى برة الضمان
المعاملة من بعضهم : سيئة وكأنك مش عميل لهم
الضمان فى مصر وهم كبيير وعلشان تحصل عليه لازم تكافح ويطلع عينك - انا زهقت
اشترى عربيتك خليجى وريح نفسك الاوبشن اللى على مزاجك وارخص واريح وصين برحتك
مع اللى ترتح له واشترى ضمان من شركة محترمة وابعد عن التوكيلات - دائما العيب عندك
فينك ياخالد يا فاروق ... :help1: