هل نحن جبناء ... أم ماذا؟ - دعوة للنقاش بهدوء

**osoliman88** · 16-01-2011 08:25 PM

مطلوب المناقشة بهدوء:

هل أصبحنا جبناء ؟

أم

نحن في الأصل هكذا؟

سبب في هذا السؤال:

أني أرى ما يعانيه الشعب المصري من الحكومة - للأسف - يحدث في كل مكان على أرض مصر ، ختى لو كان بصورة مصغرة ، في العمل .. في البيت ... في الشارع .. في كل مكان.

لم يعد احد يريد أن يتحرك لتصحيح خطأ أو مواجهة ظلم وفساد.

الكل ينتظر الأخرين كي يسير وراءهم ..

الأمر أصبح مؤلما.

لماذا وصل بنا الحال لهذا الحد ؟

سؤال يحتاج الى إجابة وتحليل متأني وهادي.

**احمد ابراهيم** · 16-01-2011 08:59 PM

احنا مش فى الاصل كده
احنا فى الاصل منعرفش حقوق البنى ادمين عشان نطالب بيها و لو عرفناها هتبقى بالنسبة لنا خيال علمى
لذلك احنا فى الاصل مش عايشين زى البنى ادمين اصلا و بكده مينفعش نسال هل نحن جبناء او لا او من الاصل احنا كده لان دى صفات الناس العايشين حياة البنى ادمين المحترمين

شكرا

**aly_hosny** · 16-01-2011 09:03 PM

اه جبناء
اخرنا نعمل جروب على الفيس بوك
ويوم ما تونس تثور بدا ما نثور زيهم لا ننزل نايدهم
انا مش فاهم نايد ايه
عايزين تنزلو انزلو ثوروا مش ناس تعد تهلل و خلاص

**hon** · 16-01-2011 09:13 PM

زرعوا فينا الخوف
قتلوا فينا الامل
عودونا نعيش اقل الشعوب
والمفروض اننا اعلى الشعوب
اقولك اية تانى كرهونا حتى فى بعضنا
الفرج من عند الله

**ahmed-moga** · 16-01-2011 09:39 PM

لايااخي الفاضل لسنا بجبناء ولكن نريد ان نضمن ان نقوم جميعا علي قلب رجل واحد وبقبضة رجل واحد فالكثير يخشي او بالأحري يحذر من ان يقوم هو وقلة قليله ولايقوم معه الكثيرون كما يتوقع فيصبح فريسه سهله بيد النظام ويقوموا بأعتقاله كما يحدث حاليا لذا فقد اصاب الشعب المصري الحذر وبسبب الأساليب المروعه التي يتخذها الأمن مع المواطن المصري والتي سمعها البعض ممن تعامل معه الأمن بهذه الأساليب المروعه جعله لايلقي بالا ويحذر من بعضه البعض وللأسف استطاع النظام ان يغرس هذا الشعور داخل الشعب وهو لا تلتفت لمن يريد ان يجعلك بطلا ثم في وقت الشده وعندما تصبح في فوهة المدفع سيتخلوا عنك جميعا وستحمل الحمل بكامله

**mikho83** · 16-01-2011 11:05 PM

أنا بحس إننا بنخاف أوي من أيام سيدنا موسى مع فرعون ودايما بينضحك علينا بالكلام زي ما فرعون قال " أليس لي ملك مصر وهذه الأنهار تجري من تحتي أفلا تبصرون" ربنا عقب على حال فرعون وحال أهل مصر " فاستخف قومه فأطاعوه". بس بجد إللي أعرفه عننا كمصريين إن احنا بنسد في وقت الشدائد وكل واحد بالبلدي كده (بيستبيع) يعني نظام اللي هو خلاص فاقد ومش فارقة معاه حاجة بس إمتى اللحظة دي تيجي الله أعلم، حاجة أخيرة اللي هي مشكلة إن كله بيعتمد على بعضه، يعني مثلا لو فيه إضراب الناس تقولك اه دول بتوع كفاية عاملين إضراب علشان رغيف العيش، ولو فيه مظاهرة يقولك دا بتوع الإخوان عاملين مظاهرة علشان الأوضاع السياسية وفلسطين..... طيب انت ياعم تبع مين ولا بتاع مين؟؟؟؟؟؟. فلازم الكل يحس إن المشكلة مشكلته وإذا هو ما ضحاش علشان يعيش عيشة كريمة يبقى في حياته ما هايشوف العيشة دي؟

**hazemhany** · 16-01-2011 11:07 PM

لأ هو ممكن السؤال يتسأل بطريقة تانية هل اي حد فينا او في الشعب المصري كله مستعد يضحي بنفسه او بحد عزيز عليه في سبيل ان حال البلد يتعدل .؟؟؟؟؟؟؟ لان لو بصينا لتونس هنلاقي ان فيه فوق ال 100 واحد ماتوا في المظاهرات هل عند اي حد فينا استعداد يبقي من ضمن الناس دي ولا كل واحد فينا عايز غيره اللي يموت ويضحي وهوا يجني الثمار ؟!!!