الموضوع: اخر فضائح فودافون ( من سلسله فضائح فودافون معي)

المشاركة الأصلية كتبت بواسطة horsepower

قرر الأول حضرتك عايز منهم إيه ,,, وبعدين (رايي الشخصي) حضرتك تروح فرع بس يكون كبير ويا حبذا لو المركز الرئيسي في زهراء المعادي وتبدأ بهدوء تقول طلباتك بدأو يتفاوضو معاك شوف لو العرض إللي هايقدموه يناسبك واللا لأ ,,, لو لأ و لاقيتهم بيهزرو قول لهم إنتم كدة مش تمام و بكل أسف أنا مضطر أروح جهاز حماية المستهلك و أبلغ عن الموضوع ده.

وبيني وبين حضرتك لو تعرف حد بيشتغل في مجال الصحافة ويا سلام لو جريدة قومية تاخده معاك بس وتعرفهم بيه ,,, هو مش محتاج يتكلم ,,, إنت بس تقولهم أنا هادي الراجل ده العقود دي و هو هايعرف يجيب بيهم جول تاريخي في حضراتكم ,,, أقل حاجة المبيعات عندكم هاتضرب بأكتر من ال 30000 جنيه ثمن النمرة إللي بتلاعبوني عليها ... تهديد قانوني ولا حد يقدر يكلمك ,,, كدة ممكن يدوك الخط و مفتوح مدى الحياة.

وبالتوفيق إن شاء الله.

أستاذ أحمد

أقتراح جيد جدا

مكتب العضو المنتدب

فى القريه الذكيه

أنا عارفه كويس

لأنى أشتغلت فى المبنيين

مع شركة المقاولات زمان

وبالنسبه لموضوع الصحافه كويس جدا

لوصاحب الموضوع عايز نمرة حد من اليوم السابع قوللى وأنا أديهالك

انا هروح الفره النهارده وهطلب منهم تشغيل الخط بموجب العقد الموجود معايه واما نشوف وهقلكم علي الجديد

بجد متابعة باهتمام

السلام عليكم
اخر التفاصيل
ذهبت للفرع وطبعا واعطيته صورة العقد وقلتلهم الخط المفروض يشتغل في 24 ساعه من يوم 15 لحد النهارده 18
ومش شغال فأخذ العقد وادخل البيانات قالي الرقم ده مش هيشتغل قلتله ليه بقي قالي لان سعره مبالغ فيه ومش هينفع انه يتصرف ليك
قلتله انا مليش فيه انا اخترت الرقم وانتم وافقتوا عليه وانا بموجب العقد عاوز اشغله
قالي طيب لحظات اتصل من التليفون عنده بالتليفون واتكلم مع شخص معرفش هو مين وقال اتفضل كلم استاذ حسين مدير الشكاوي بالشركه
واتكلم معاه قالي يا استاذ اشرف احنا مش هنقدر نشغلك الخط ده قلتله ليه انا عاوز اشغله بموجب العقد الموجود معايه ولانتم مش معترفين بالعقد بتاعكم
قالي طبعا معترفين بيه بس الخط مشتغلش قلته طيب مهو انا جاي علاشان بطالب انه يشتغل زي ما حضرتكم قلتم هيشتغل في 24 ساعه ولحد دلوقت مشتغلش
قالي مش انت حضرتك قلت مش عاوز ارقام قلتله اه لان انا الرقم اصبح بموجب العقد الموجود معايه ملكي ولا انتم هتنكروا ده ولا عقدي غير معترف بيه ولا ايه
وانتم عاوزين تدوني رقم بديل تاني وانا مش عاوز منكم ارقام وانا دلوقت عاوز اشغل رقمي قالي اسفين انت حضرتك قرأت العقد كويس قلتله كويس جدا ووقعت عليه كمان وانتم كمان موقعين عليه
قالي مش هنقدر نشغله وبعرض عليك للمره الثانيه ارقام مميزه تانيه بدل من الرقم ده واحنا مش بنطلع الارقام دي لاي حد
قلتله انا طلبت رقم وانتم وافقتم عليه وقلتم روح اصرفه بعد 48 ساعه وبعد ما انا روحت صرفته قلتم ده ب 30 الف يعني انتم مفتكرتوش غير بعد ما اخدت الخط والعقد
قالي احنا منعرفش ان الرقم ده ب 30 ألف غير بعد ما اتصرف قلتله يبقي ده سؤ ادارة من عندكم ومش عارفين شغلكم ودلوقت انا جاي
و عاوز اشغل الخط هتشغلوه ام لا قالي لا مش هنشغله
قلتله خلاص انا معايه عقود رسميه من عندكم بالارقام الموجود عليها المشكله وهنشرها علي برامج التوك شو وعلي المنتديات
وفي الجرايد وهفضحكم في كل حته وهروح اعمل فيكم محضر دلوقت انكم مش عاوزين تشغلوا الرقم وبشكرك انك اهتميت بمشكلتي والجهات المختصه هتجبلي حقي منكم واعطيت التليفون لموظف خدمه العملاء ومشيت
وطبعا الكلام ده كان في وسط العملاء الموجودين في الفرع وطبعا صوتي لما انفعلت بقي عالي وكله قاعد بيسمع القصه وانا بتكلم في التليفون
وبعدين روحت عملت فيهم محضر في الشرطه من اول المشكله لحد ما رفضوا يشغلوا الخط وانهم اوهموني انهم هيعطوني رقم تعويض ومش عاوزين يشغلوه
وامين الشرطه اعطني رقم الاحوال بتاع المحضر وقالوا بعد يومين تراجع علاشان تأخد رقم الصادر
وبس هو ده كل إل حصل ايه رأيكم بقي وعاوز حد يشوف العقد كده كويس ويقولي انا رفعت الصور بتعته في المشاركه رقم 25

بجد ربنا معاك وينصرك
ما ضاع حق وراءه مطالباً
ده لو فى دوله تانيه كانوا باسوا رجلك علشان تسامحهم