الموضوع ده ما لوش غير طريقين فقط
الأول : جهاز تنظيم مرفق الإتصالات 155 .. وتعمل شكوى كاملة باللى حصل وتبعتلهم بريد الكتروني فيه صور العقود بتاعتك
الثاني : ترفع قضية تعويض بواسطة محامي كويس ومشهور ..
النقطة الخاصة بالشروط التي ضمنتها فودافون في العقود الخاصة بها .. هى بالكامل تخضع للسلطة التقديرية للمحكمة .. لأن عقد فودافون يعد من قبيل عقود الإذعان .. وعقود الإذعان لو المحكمة شافت إن فيها شرط معين فيه إجحاف لحق العميل فإنها تبطله ... والمحامي الشاطر هايعرف يتعامل إزاي مع النقطة دي
في الآخر .. همة من نفسهم لما يلاقوا الموضوع كبر .. هايحاولوا يلموا الموضوع على قد مايقدروا .. بس المهم إن الموضوع يكبر .. يعني حاول تكبر الموضوع على قد ما تقدر
مكالمة التليفون الأولى اللى إنت قلت فيها إنك مش عايز منهم خطوط تاني مالهاش أي تأثير على مجريات الامور حتى لو كانت مسجلة .. لأن ده لا يعد تنازل منك عن رغبتك تشغيل الخط المميز اللى هم سلموك العقد بتاعه
نقطة إنهم ماكانوش عارفين إن الرقم ده غالى عشان كده إدوهولك .. دي نكتة بايخة قوي .. لأن المفروض إن همة شركة محترمة والسيستم بتاعهم المفروض يكون مجنب الأرقام من الأول ..
... وإنت مالكش فيها خالص .. إنت عملت أوردر لرقم معين بناء على عرض منهم وهمة إدوك الرقم ده بدون أي إعتراض منهم في البداية .. وماينفعش يكون السبب بعد كده إن الرقم غالي
الشرط بتاع إنهم لهم الحق في الغاء العقد في خلال 48 من إبرامه .. أكيد هايخضع لتقدير المحكمة (لو الأمور وصلت للمرحلة دي) .. لأن لازم مثلا يكون ليها أوجه زي إن العميل مشهور عنه إنه غير منتظم في سداد الفواتير كمثال وبناء عليه لما راجعوا بياناته وجدوا عليه ملحوظات تخليهم يفسخوا العقد معاه ولكنها أبدا لن تكون مطلقة كما وردت في التعاقد
يعني الموضوع فيه كلام كتير ... بس أهم حاجة إنك تخليك وراهم وماتكلمهمش بإسلوب ناعم أو هادي زيادة عن اللزوم ... لأ .. خليك هادي ولكن بحزم في إنك مش هاتسيب حقك في تشغيل الرقم وبرضه هاترفع عليهم قضية تعويض بالأضرار المعنوية اللى حصلتلك بسبب رفضهم تشغيله في البداية