بجد موضوع جميل .. انا مش عارف افكر فى اى حاجة من ساعة ماقريته مش عارف اندمج فى الحياة بتاعتنا
بس عارف
حاسس ان احنا كنا عاملين كدة وحاسين بالحلاوة دى علشان كنا أطفال
يعنى مفيش مسئولية
يعنى رايح عند جدتك مش خايف على نفسك ولا على اللى حواليك ولا بتفكر معاك فلوس فى جيبك ولا لأ ..
مش فارقة بتلعب مع ولد ولا بنت
مش فارقة هدومك تتوسخ ولا لأ
مش فارقة حاجة.. فى الآخر حتتطلع تاكل وتنام وتقرا ملف المستقبل :36_2_33: ولاحاجة فى الدنيا ممكن تزعلك بعد كدة
وبتهرب من الواجب او بتنقلة من زميلك فى الفصل وكله محصل بعضه
دلوقتى
لازم تخللى بالك من شغلك اللى اى تقصير فيه حيقصر على دخلك المادى اللى هو دلوقتى أهم حاجة على الاطلاق بتهمنا كلنا
لازم تخللى بالك من مراتك وبناتك علشان الشوارع مليانة كلاب عند أى غفلة منك حتلاقيها بتنهش فيها لو مش بالأيد حيبقى بالعين
لازم تخللى بالك من جارك اللى انت غالبا مش مامنله
لازم تخللى بالك من زمايلك فى الشغل اللى ممكن اى واحد بدون اى سبب يخزوقك عند مديرك
لازم تخللى بالك من أى حد بتشترى منه أي حاجة أى حاجة من أول الشقق والعربيات لغاية كيلو برتقان بسرة لانه كله معندوش اى مشاكل يسرقك لو سنحتله الفرصة
لازم يبقى معاك فلوس وكتير علشان لو وقعت يا معلم محدش حيقف جنبك ولا حد حيسند ضهرك زى ما باباك ومامتك وجدتك كانوا بيحموك من العالم كله
لازم تخللى بالك من صحابك وكل كلمة بتطلع من بقهم
لازم تخللى بالك من هدومك وشكلك وتحلق دقنك وتكوى قمصانك وتمسح جزمك اللى أى حاجة مش مزبطة فيهم حتلاقى كل الناس بتبصلك بصات مش اللى هيه أو بتلقح عليك بالكلام
لازم يبقى معاك فلوس علشان ترضى مراتك اللى هيه لو ملقتش معاك فلوس حتبقى أول واحدة بتجرح فيك:beated:
لازم تبقى صحتك كويسة علشان برضه ترضى مراتك اللى هيه اول واحدة حتلقح عليك بالكلام لو حصلك حاجة :star1:
لازم ترضى ولادك علشان هم اكتر حاجة بتحبها فى الدنيا واحلى حاجة فى دنيتك واحساسك انهم مش مبسوطين او مش راضيين حيخليك تعيش حياة سودة
لازم تقعد تدور على مكان تركن فيه كل يوم نص ساعة علشان البهوات اصحاب المحلات اللى حاطين حجارة قدام كل محل علشان محدش يركن قدامهم ولا كأنهم اشتروا الشارع مع المحل
لازم ترضي مديرك فى الشغل والظابط فى قسم البوليس وترضى كل واحد بتتعامل معاه من اول السايس فى الجراج لغاية ابوك وامك
لازم اما تييجى تفكر تعمل اى حاجة ممكن تبسطك ( أقلة ساعتين بلاى ستيشن يعنى) :36_2_33: لازم تفكر الوقت ده حتاخده من مين وحيسامحك عليه ولا لأ
يا راجل ده الواحد ولسه معداش التلاتين سنة وشاغل همه يا ترى الواحد لو مرض او حصله حاجة حيلاقى حد يشيلة ويهتم بيه زى ما ابوه وامه الله يرحمهم ويغفر لهم ويسامحنا على تقصيرنا معاهم
بعد سلسلة لازم اللى انا قولتهالك دى
تفتكر عرفت احنا ليه بنقول على ايام طفولتنا دى كانت اجمل ايام وعمر عمره محيتنسى وحتفضل طول عمرك بتدور عليه وعمرك محتلاقيه