الموضوع: حد يعرف حاجه عن الفوركس

طيب ما تفهمنا يا دوك الموضوع ده ..اصل اخوك ميح خالص ومش فاهم حاجه خالص :(

المشاركة الأصلية كتبت بواسطة aly_hosny

بص يا سيدي
الفوركس دا زي البورصة بالظبط
بس اسعار حاجات عالمية يعني اسعار دهب و عملات و بترول و كدا
التجارة ال فيها كلها وهمية
المفروض انك بتفتح حساب على موقع من مواقع الفوركس وبيبقى ليك رصيد معين
وبعدين بتدخل زي ما تقول كدا بتراهن على سعر حاجة بعدد نقط معين "يعني لو سعر الدولار قصاد اليورو طلع نقطة انت تراهن عليها بنقطة او اكتر او اقل"
لو طلع تزيد النقط بتاعتك
لو نزل تقل
انا كنت ناوي على الموضوع دا بس اجلته عشان مشغول في الدراسة
دا غير انه عايز واحد قاعد قدامه يعني مينفعش تسيبه و تمشي
انا ليا واحد صاحبي بدا الموضوع دا بحوالي 5 دولار خلاهم 15 وبعدين خسرهم كلهم
انت بتفتح في الاول حساب تجريبي و تشوف هتسلك ولا لا "الحساب دا ببلاش"
والشركة ال انا سجلت عليها اتصلو بيا و كانو عايزين يساعدوني و المفروض ان الشخص ال بيتصل بيك بيكلمك وانت قدام الكمبيوتر ويعد يفهمك هتعمل ايه بالظبط

لا يا عم ال5 دولار فى جيبى اضمن شكرا على الشرح يا كبير دايما تاعبك كده

أولا حكاية انه مش حرام دى اسال فيها تانى لان النظام ده شراء بالهامش وبتاخد كريديت من الشركة اللى بتتعاقد معاها ينعى بتدخل بخمسة دولار بس بتشترى بخمسمائة دولار وكده ده عقدين فى عقد، عقد اقتراض من الشركة بيشترط عليك انك تتعامل معاهم، طبعا لو خسرت ما بتخسرش 500 جنيه بتخسر خمسة جنيه بتوعك والشركة بتقفل عليك الحساب خلبنى اقول مثل غير واقعى انت معاك خمسة دولار والشركة ادتك 500 دولار بفرض غير وقعى 1دولار يساوى 6 جنيه وانت اشتريت 3000جنيه ولا قدر الله الجنيه نزل بقى ادولار يساوى 7 جنيه يبقى اول ما يوصل رصيدك 2965 جنيه هيقل عليك الحساب وخسرت الخمسة دولار بتوعك يا حلو
طبعا فى جزء تانى يتعلق بالحلال والحرام وهو التسوية الفلوس ما بتفضلش فى حسابك دى حسابات وهمية اسال شيخ ده صح ولا غلط، لانك لو سالت شيخ تجارة العملة حلال ولا حرام غير لما توضحلوا تفاصيل التعامل

عايز اقول نقطة تانية تتعلق بالطبيعة الانسانية من خلال الناس اللى شوفتهم اتعاملوا وخسروا، ممكن حد فى اول تعامل حط 100 دولار يكسب 1000 دولار -حظ مبتدئين بقى يقولك حلو اوى انا هجنب 100 دولار بتوعى على جنب واضارب ب_ 900 يخسر 900 يقولك لا انا اطلع 100 بقى وهكذا يفضل يخسر مهما كسب

طبعا الشركة مش بتخليك تشترى بالهامش لله هى كده كده وخداه عمولتها على اى عملية بتعملها فى المثال اللى فات اخصم عمولات الشركة انا طبعا ما ارضنتش ازود مسالة العمولات للتبسيط يعنى فى الآخر لا بتكسب حاجة وبتحول فلوس البلد برة وبتعمل طلب وهمى على الدولار والعملات الأجنبية ودى وجهة نظرى والله اعلم بس ارجوكوا اللى يختلف معايا بلاش يغلط

بص يا دكتور عمر فى فرع فى اكتوبر انا اعرف صاحب الفرع دا انا اعرف انه بيدوك كورسات مجانيه ويفهموك كل حاجه كمان قبل ما تعمل اى حاجه وممكن احاول اوفقلك معاد مناسب وتروح تحضر وبصراحه الى اعرفه عن الفوركس انه بيكسب كتير مش قليل

انا ماعرفش هما قالو ازاى كده مع انى واثق انها كلها مجرد معلومات عامه والله اعلم بس بصراحه انا خطيبتى بتشتغل فى الشركه دي هى صحيح مالهاش حساب وانا عن نفسى مش موافق بحاجه زى كده بس هى بتشرحلى برضه ان الموضوع مش سهل ولكنه مربح جدا وعايزلها حد فاهم فعلا ويكون قدام الشاشه علطول وبرضه فكر لو عايز تاخد كورسات مجانيه تتعلم فيها كل الى انت عايزه وهما هناك صدروهم رحب جدا وربنا يوفقنا

مع العلم انا رافض موضوع الفوركس لحرمانيته والله اعلم