أخير نفذت اجمل تعديل لكماليات الجوليت عشان تبقى كامله اخر حاجه
نزلت يوم الجمعه اللى فاتت على الاستعمال وجبت مرايا يمين كهرباء بمشتملاتها (ضفيره باب يمين كامله اللى فيها فيشه المرايا الكهرباء ، زرار للمرايا ، غطاء لظهر المرايا ) كله حالته تحفه خلعت قطعه قطعه من عربيه حالتها تقريباً زيروووووو
والصدفه ان العربيه اللى خلعت منها المريا ومشتملاتها كانت جوليت اصلاً انا عارف جوليت من لانوس مش هتفرق فى المرايا بس لقيت فيها اريال كهرباء تحفه ( الاريال الكهرباء فى اللانوس مختلف عن الاريال الكهرباء فى الجوليت ) والاريال الكهرباء جوليت نادر حبتين فى الاستعمال طبعاً جبت الاريال بالفيشه بتاعته
ونزلت على محمد جابر جبوره حبيبى (كهربائى سيارات بس مش عادى) فى السلطان حسين فى الاسكندريه وعملنا احلى شويه شغل فابريكه 100×100 اسلاك محمله معتمده والاسلاك فى مكرونه سوداء تحس ان الشغل كأنه ضفيره فابريكه وكمان ايه تربيط الاسلاك بمكوه لحام وقصدير وعزل وشويه شغل ربنا يباركلك يا جبوره اتحدى ان اى حد يشوف الشغل ويقول انه تركيب مش فابريكه
كنت مبسوط اوى من التظبيط ده لانه فرق معايا المرايا بقت سهله الضبط منغير ما اقعد اوجع دماغى واظبط حبه فوق لا تحت لا حبه يمين لالا واحده شمال وكمان الاريال بدل ما كل شويه طلع الاريال وكل شويه انزله بقى مع باور الكاسيت جبوره تابع فيشه الكاسيت وعرف طرف الاريال ووصل معاه لعلبه الفيوزات بس للاسف لقيناه منتهى عند علبه الفيوزات فمدينا ضفيره من عند علبه الفيوزات لحد مكان الاريال ماشيه جنب الضفيره الفبرايكا للعربيه ومتثبته معاها بافزان بلاستيك سوداء صغيره شغل 100 100 الله يباركلك يا جبووووره