الموضوع: كيف تمنع سرقة عربيتك

احسن حاجة يا hm414 انك قلت ناخد بالاسباب
بس تفتكر انك لما تروح الشغل اللى هوا فى الدور الفلانى وتقريباً معزول عن العالم هتسمع الانذار :)
دا غير ان ارخص طريقة انك تفصل طرمبة البنزين (على الاقل هتنزل تلاقيها مكانها)

ممكن تكهرب جسم العربيه ودا حل جامد :d

ربنا يكرمك ياباشا على الافكار دى بس متهيقلى تغطى العربية حتى لو راكنها ربع ساعه بس دا برضوا بيخلى العربية مبهمه الى حد ما ومش مغريه للسرقة

وبيكسلوا يرفعوا الغطا لان المفروض اللى بيرفع الغطا بيشيلو ويدور العربيه ويمشى وطبعا لو ما عملش كدا هيلفت انظار الناس ليه


وبشكرك مرة تانى على الموضوع

[marq="4;right;1;scroll"]
الفكرة اننا نقول ونستفيد من تجاربنا كلنا
[/marq]

المشاركة الأصلية كتبت بواسطة seifmando

1. سرقة العربية ذات نفسها


كل اللي محاجه الحرامى انه يشغل العربية تبقى الحلول :
أ. انك تفضى التنك على الاخر بس كدا لا انت ولا الحرامى هتعرفوا تدورها
ب. انك تشيل البطارية وانت طالع بيتك ووانت نازل بس كدا انت هيطلع لك عضلات بس كمان ظهرك هيشيط
ج. انك تعمل مفتاح كهربا جوا العربية فى مكان مستخبي (يعني تفصل الكهربا عن العربية بمفتاح جوا الكابينة) بس كدا انت كمان فصلت النذار والسنتر و.....
د. فيه ناس بتشغل نفسها بازاى تقفل الدركسيون وايه نوع القفل وايه سعره و من رايي ان الموضوع دا مكلف ع الفاضى لان من السهل جداً ان الحرامى يا اما ينشر القفل (هتاخد من 5 الى 20 دقيقة على حسب نوع و تمن القفل) او من الاسهل له انه ينشر الطارة ذات نفسها (مش هتاخج اكتر من 3 دقائق)
يا جماعة الموضوع اسهل من كدا بكتير
كل اللى عليك انك وانت طالع بيتك تفك فيوز طرمبة البنزين (ممكن كمان تحطه فى ميدالية المفاتيح عشان ما تنساهوش فى البيت ولما تنزل تركبه)
بكدا حتى لو الحرامى فتح العربية ووصل اسلاك الكونتاكت العربية عمره ما هتدور والحل الوحيد ادامه (لو مصمم انه ياخدها) انه يا اما يزؤها يا اما يقطرها وف الحالتين دول محدش هيعرف يوقفه

2. سرقة الجنوط

الحرام بييجي عند اي عربية ويبتدي يفك وغالباً بيبقى معاه وسيلة نقل ( عربية او موتوسيكل او حتى عجلة) عشان يهرب بسرعة
الحلول ممكن تكون :
أ. انك تركن جوا جراج مضمون
ب. انك تركن فى مكان كل الناس عرفينك وعرفين عربيتك بحيث لو حد غريب قرب لها ممكن يقفشوه
ج. انك تركب مسامير او صواميل برؤوس ذات مقاسات مختلفة ( هيكون فعال جداً لو الحرامى مش معاه صليبة اخرك هتخسر مسمار واحد)
د. انك تركب صامولة او مسمار الانكيه ( صعب جداً الحرامى يكون مستعد لحاجة زى دي بس للأسف ممكن تخسر كل المسامير اللى فى العجل ماعدا الالانكيه يعنى كل عجلة هتبقى واقفة على مسمار واحد بس) ودى مش مكلفة اوى لانى شارى الاربعة (كل واحد فى عجلة) ب 100 جنيه
ه. انك تشترى مجموعة مسامير مخصوصة ضد السرقة بس دول مكلفين جداً (الطقم يعدى ال 1000 جنيه) وعاهم مفتاحهم المخصوص بس هيجيبوا من الاخر ودول بيبقوا مسامير راسها سايبة يعنى تفك المسمار تلاقى الراس بس هي اللي بتلف انما المسمار لأ وانت بمفتاحك المخصوص بس اللى تعرف تفكهم

3. سرقة المرايات

بصراحة معنديش افكار غير الانذار فقط بس مش هيبقى برضو فعال اوى لان الحرامى هيكسرهم بسرعة ويجري محدش هيلحقه
الحل التانى انك تركن عربيتك فى جراج مضمون

4. سرقة بطارية

لو الحرامي عرف يفتح باب العربية يبقى كدا كل محتويات العربية اتقلبت ومنها البطارية لانه هيعرف يفتح الكبوت و الشنطة بسهولة
بس فيه حلول انك ما تخليهوش يفتح العربية اصلاً ودا بالانذار او الركنة فى جراج مضمون
بس كمان في حرامية بيعرفوا يوصلوا للبطارية من غير ما يفتح الباب ود عن طريق ان ينزل تحت العربية ويبتدى يفك اى حاجة (ودا كمان نوع من السرقة) لحد ما يوصلها
بيتهيألي برضو ان الحل ام الجراج المضمون او الانذار
كمان حل ان فيه بطاريات بتتريط بمسامير مع جسم العرية وبيتهيألى ان دا احسن حل لو ناوى تغير البطارية قريب

5. سرقة الايريال

برضو للاسف مفيش عندى غير حل وحيد وهو انك تفكه وتاخده معاك او تشيله جوا العربية

حاسس ان عندكوا افكار اكتر منى سواء لايه اللى ممكن يتسرق وايه هى الحلول

أرجوا التثبيت لان فيه فايدة لكل الاعضاء وذكر المشاكل والحلول

فعلا مفيش حاجه تتضاف ..انت قايل معظم الحاجات ....في ناس شوفتهم بيفكوا غطا الاسبراتير و في ناس بتعمل قفله في دايره المارش و لو اتنطط الحرامي مش هييعرف يدور العربيه الا لو وصل للمفتاح

اكيد لسة فيه تانى

المشاركة الأصلية كتبت بواسطة dr-mohamed

فكرة حلوة موضوع بتاع طرمبة البنزين بس يا تري اي فيوز هو فيوز الطرمبة
هابقي اسئل الكهربائي

المشاركة الأصلية كتبت بواسطة ahmed refat

انا بقى ها اقولكوا على احدث طريقة لمنع السرقة ودى حصلت معايا فعلا ... كان معايا هوندا اكورد سبور اتوماتيك موديل 83 والحقيقة انا كنت من محبى الهوندا جدا وكنت مروق العربية ترويقة مالهاش حل الا حاجة واحدة كانت منكدة عليا حياتى وهى الكاربيرتير والالكترونى بتاعه اللى بينظم البنزين والهوا وغيرتهم وظبطهم وشقلبتهم ومافيش فايدة وكان العيب ان البزين بيدخل اكثر من الالزم فالعربية تشرق وتقف ,, جننى العيب ده ومرضيش يتصلح وبعدين جه الحرامى الهمام كسر الهواية بتاعة الجنب الخلفية ودخل العربية وكير الفيبر بتاع بطن الدريكسيون اللى حوالين الكونتاكت ودور العربية فعلا ومشى بيع حوالى 5 متر وهوب العربية شرقت وجننته وما رضيتش تدور راح سارق الجيكت بتاعى وعلبة عصير تانج بالفواكه الاسيواية من العربية وسابها وجرى .. ودى كانت احسن طريقة لمنع السرقة بالنسبة لى .. بس حسبى الله ةنعم الوكيل فى التانج اللى سرقه ..
نيجى بقى للجد انا دايما بشترى انذار فيه خاصية منع تشغيل الموتور حين تفعيله بمعنى انك لو شغلت الانذار وانا قاعد جوه العربية والعربية امنت نفسها وحطيت المفتاح فى الوكنتاكت وحاولت تدور استحالة تدور ابدا بس لقيت ليها نقطة ضعف ... برضه فى نفس العربية الهوندا الحقيقة انى اتعلمت منها كثير بعد موضوع السرقة ده ركبت الانذار وبعدين فى يوم من الايام وقع منى الريموت فى المياه والعربية مأمنة وطبعا فتحتها وهى عمالة تذمر وعاملة قلق وحاولت ادور ابدا فاتصلت بابن عمى راح رايح للكهربائى وقالى اعمل وصلة بين البويجنة والبطارية ودور على جهاز الانذار نفسه واخلعه من الفيس بتاعته بتاعة الضفيرة ها تدور معاك .. وعملت كده ودارت معنى كده ان الحرامى لو فاهم برضه ها يدورها .. بس فيه واحد بقى محترف اسمه اشرف الخواجة عملى وصلة بكتاوت زيادة بطريقة ما انا ما فهمتهاش منعت برضه الموضوع ده وخلاصته انه منع فعلا الكهرباء عن الموتور وكذلك عن طرمبة البنزين ولو عملت قرد من غير ما الانذار يتم ايقاف تفعيله لن تدور العربية حتى لو شلى جهاز الانذار بس فيه مشكلة لو انت فى مصيف مثلا يعنى والريموت خرب منك او ضاع او اى مشكلة انسى يا عمرو هات بقى الراجل ده على حسابك يدورهالك .. انا طولت عليكم سامحونى

اكيد انا لو منك عمرى ما هبيع العربية الشرقانة دي لان كل يوم حد هيخبط عليا ويقوللى حرمت اسرق عربيات تانى
فكرة الدوارة بالانذار دى جامدة بس ياترى كلفتك كام؟