-
يا مطباتك يا مصر
رب لا أسألك رد القضاء ولكن أسألك اللطف فيه
أول إمبارح بالليل وأنا ماشى عند الكلية الحربية وراجع من مستشفى النزهة علشان بنتى بنحضرها لعملية دخلت فى مطب لا أقل من إنك تقول عليه بير
مطب شكله غريب وكبير وعميق يعنى بيعمل مصيبة وهو ده اللى حصل
إيه بقى اللى حصل :
الفردتين إللى ناحية الشمال (ورا وقدام) إتدمروا
الجنوط اتعوجت والعجل نام خالص
وروحت بيها كده وامبارح بتاع الكاوتش شاف الفردتين وحاول يستعدل الجنوط بس ما طلعتش حلوة وعمل كام خرم كده على الماشى والعجل بقى شكله كويس
رحت بعد كده مشوار واحد امبارح بيها ورجعت بالليل والنهاردة الصبح بابص على الفردتين لقيتهم نايمين الإتنين برضه
مش عارف إيه العمل بقى هل المشكلة فى الجنوط ولا فى الكاوتش ؟
يعنى الحل إيه
هل أشترى جنوط جديدة وأمشى عليهم الكاوتش ولا أشترى جنوط جديدة وأشترى 2 كاوتش جديد ؟
ارجو الرد والمشاركة
مع ألف شكر للجميع
-
ربنا معاك و يشفى بنتك اولا
فى الغالب ان الجنوط لسه معوجة شوية و ممكن تعدلهم فى الحرفيين افضل . او تشترى جنوط و كاوتش جديد .
و طبعا ماتنساش تدعى على السيد رئيس حى مصر الجديدة اللى قاعد فى مكتبه و سايب الشوارع مكسرة . و ربنا يرحمنا من البلد دى ان شاء الله
-
على فكرة المطب ال............* ده نزلت فيه من شهر كده وعمللي "باونة" في الكاوتش اللي قدام ...بجد مطب غبي! منهم لله
-
-
سلامة القمر ألف سلامه وقدر الله وماشاء فعل
والحمد لله على كل حال ياعزيزي
انا ساكن قريب من المكان ده جدا بس مش عارف فين المطب ده
خوفتني جدا منه
ياريت تقولا تحديدا فينه وربنا يستر طريقنا كلنا
بالنسبه لمشكلتك اعتقد والله اعلم ان المشكله في الكاوتشات مش في الجنوط
خصوصا لو الجنوط متعوجتش جامد
اما لو الجنوط اتعوجت جامد فغالبا هتحتاج تغير بطقم جنوط
وللمعلوميه
طقم جنوط الماروتي رخيص جدا
ابن خالتي جاب الاربعه مستعملين حاجه بسيطه جدا واحد باعهم لبتاع الكاوتش وركب جنوط سبور
ابن خالتي خدهم الاربعه ووقف الواحد ب 65 جنيه فقط...
وبعدين تبقى دايما تخلي ضغط العجل على 27
الماروتي فعلا لو زودت ضغط العجل عن كده يبقى ربنا يعينك على المطبات
وهوا ده المنصوح بيه عالعربية
افتح الباب الرئيسي هتلاقي بادج مكتوب فيه ضغط العجل وهتلاقيه 27
تحياتي
-
المطب ده مكانه بالضبط كالآتى :
المطار على يمينك وسور الكلية الحربية على شمالك فى الإتجاه كأنك رايح على السندباد
المطب واخد شمال شوية يعنى الناحية اليمين آمنة بإذن الله
ربنا يبعدنا عن كل شر
بس حل المشكلة دى عندى إيه أنا عاوز حل سريع لأنى اليومين دول باستخدم العربية علشان باروح أراجع الدكتور كل يوم بعد يوم والمسافة بعيدة ولازم يبقى فيه عربية لأن البنت مش بتمشى
توصلت لحل أود أن أشرككم فيه :
شراء وتركيب عدد 2 جنط إستيراد (الطقم 300 جنيه) مع إستعمال الكاوتش القديم
فإذا ظلت المشكلة يتم شراء عدد 2 كاوتش جديد
ولله الأمر
هل توافقونى على كده
-
عارفين يا جماعة المطب ده واخد شهرة عالمية لدرجة إن بعد المطب بحوالى 20 متر كده تلاقى واحد واقفلك ياخد بخاطرك ويقول لك إيييييييييييييه خدت المطب الوحش ؟ طيب مش عايز تغير الإستبن ؟ أنا بتاع كاوتش (بيسترزق من المطب)
تخيلوا وصلنا لغاية فين ؟؟؟؟؟؟
قرف
-
الله المستعان
مش بعيد يكون هوا اللي عامل المطب ده
ههههههههههههههههههههههه
المهم فعلا زي مبقولك تجيب جنطين وتشوف الوضع
ولو عايز تمشي حالك ممكن تركب للكاوتشين اللي عندك شنابر ومشي حالك اليومين بس دول وربنا يعينك وتلاقي جنوط بتوعها زي مبقولك الواحد ب 65 يعني تاخد الاتنين ب 130
والشنابر دلوقتي مش هتضرب من حراره ولا اي حاجه ان شاء الله
يعني الخلاصه
محتاج العربية حالا يبقى ركب الشنابر مؤقت يومين زمن تحل ازمتك (ولو ان تمن الشنابر هيقف بتمن جنط !!!)
لو عندك وقت تروح لبتاع كاوتش وتشوف جنطها يبقى طبعا الجنط يكسب...
ولو انتا محتاج حاجه في المنطقة نفسها انا تحت امرك وعربيتي تحت امرك يا عزيزي....
تحياتي
-
بالنسبة للأسعار أنا سألت وكانت الحصيلة كالآتى :
واحد فى الحرفيين بيبيع طقم استيراد بـ 300 جنيه وممكن فرط .
سعر الفردة فى التوكيل 275 جنيه (عبط يعنى)
موجود برضه عند رامى بس مارضيش يقوللى سعره (قاللى حسب الحالة) يعنى إيه مش عارف ؟
بالنسبة للكاوتش سعره 235 جنيه للفردة
hm414 متشكر جدا على شعوركم وحفظكم الله
-
خلى بالك ...الحرفيين مليانه ناس بتصلح جنوط ..ركز كويس فى الجنط لو هتشترى من الحرفيين ..
ولو عاوز تستعدله ..استعدله بس لو العوجه جامده بلاش لانه هيبقى خطر على السرعات العاليه فى واحد فى الحرفيين اسمه الثلاثيه بيتعدل جنوط كويس ..وبيرشها و كل حاجه ,,وبيبيع ..بس طبعا اوعى تشترى منه :)
Content Relevant URLs by
vBSEO 3.6.0 PL2