الموتور لسه بيسقف بعد العرض على 3 صنايعية

السلام عليكم
انا كنت قبل كده فتحت موضوع اتكلمت فيه عن ان موتور عربيتى اللانوس 99 بيسقف مع كل الغيارات
يوم الجمعة بعد الصلاة قلت اروح لميكانيكي عندي في المقطم كان بيشتغل في العربية لصاحبها قبل ما اشتريها منه وصاحبها هو الى عرفني عليه
المهم
اول ما رحتله وقلتله على العيب راح فاكك خرطوم البنزين الخارج من الفلتر وقالى افتح الكونتاكت وبصلي وقال طرمبه البنزين بايظة قلتله ليه قالى الضغط بتاعها ضعيف ومش بتغذى العربية بنزين كويس قالى المفروض اول ما اشيل الخرطوم البنزين يطلع بضغط شديد جدا بس انا حسيت ان ضغطها معقول المهم عكنني فسيبته ومشيت

ورحت رايح لواحد تاني قالى الطرمبه مافيهاش حاجه وقالى ان ده عيب من رجلك مع انى متأكد انه مش من رجلى لآني سقت عربيات كتير وعارف ازاي يكون التسقيف من رجلى او من العربية

سبته ورحت لواحد تالت قالى البوجيهات قلتله لسه مغيرها راح فاكك فلتر البنزين وقعد يفضي البنزين على ايده وقالى البنزين عليه مية (مع ان العربية تعمل كده بقالها شهر) يعني مونت كذا مره المفروض تكون الميه راحت

الخلاصة انا طولت عليكو انا مش عارف اعمل ايه ولا اروح فين

انت ساكن فين وانا اقولك تروح فين ؟

ساكن في المقطم

انا برضه ساكن في المقطم ونصيحة بلاش صناعية المقطم دول..نصيحة يا التوكيل يا الحرفيين..انا ممكن أنزل معاك الحرفيين لو عايز ونروح لعز (-: ميكانيكي العائلة :-)

فعلا يا باشا انا حسيت من كلامهم انهم ضعاف جداً في الصنعة
عشان انا عندي شوية خبرة في العربيات

كويس اني لاقيت جار ليا في المقطم وعضو معايا في المنتدى

تحت امرك يا باشا

ربنا يخليك

فى كمان ميكانيكى كويس فى صقر قريش، اما المقطم فمفيهوش ميكانيكى شاطر

أنا كان عندي نفس المشكلة في الفيرنا وبعد ما غيرت البوجيهات وفلتر البنزين بدون فائدة ودتها للميكانيكي وإتضح إن العيب من أسلاك البوجيهات فغيرتها والعربية إتظبطت والحمد لله

إكشف على الأسلاك وشوف

فين في صقر قريش يا استاذ حسام جزاء الله كل خير

اول صقر قريش على الأتوستراد، اسمه خالد قنديل 0102825905، انزل من المقطم و امشى فى الأتوستراد و أول ما الدائرى يتقاطع فوقك ضم يمين وادخل فى الجزء الصغير من الأتوستراد و هتلاقى محلات كتير على يمينك، فوت حوالى 6 مداخل هتلاقى ورشته مكتوب عليها مركز خدمة دايوو

الف الف شكر ليك يا استاذ حسام انا رحت لخالد قنديل وهو فعلا شكله استاذ في العربيات ديه وكشف على العربية واخيرا اكتشف العيب الى 3 او 4 ميكانيكية قبله معرفوش يوصلوله وهو ان الموبينة بايظة
ايوه الموبينة بايظة ومش بتطلع شرارة كويسة للبوجيه الثالث والرابع انما الأول والتاني الشرارة بتاعتهم قوية وانا اقتنعت بكلامه 100% والنهاردة إن شاء الله هنزل اسال على الموبينة الجديدة واشتريها
بس المشكلة انه قالى انها بـ600 جنيه

600 جنيه مش شوية، اسأل اكتر يمكن تنفع استيراد، على الأقل لو العيب مش منها يبقى ممكن ترجع

بلاش استيراد فى المكونات الكهربائية يا جماعة

MMamdouh

هوقالى ان في منها انواع تانية غير الأصلى وقالى ممكن تلاقيها في حدود 180 جنيه بس انا شكلى كده هجيب الرخيصة لأن الى بايظة عندي اصلا كانت متغيرة ومش الأصلية وكمان الأصلية باظت واتغيرت بواحده مش اصلية يبقى اكيد الموضوع كله محصل بعضه بس انا مش عارف ايه الى بوظها اصلا
وكمان انا فكرت اني اغير سلوك البوجيهات كمان مع الموبينة الجديدة ايه رأيكو

على فكرة خالد قنديل قالى على طريقة تركيبها وعرفني كمان ازاي اختبرها عشان اعرف ان كانت سليمة ولا بايظة

الموبينة الاصلى كانت من سنة 300 جم صعب اوى السعر يتضاعف كدة

الموبينة الاصلى نوعها Dac ودى تمنها 510 لسا سال عليها على شان بتاعتى باظت والعربية كانت متلتة وكمان خلىى بالك ان اكتر حاجة بتبوظها ان يجى عليها ميه وهيا سخنة

اقتباس:

---

المشاركة الأصلية كتبت بواسطة shosho

على فكرة خالد قنديل قالى على طريقة تركيبها وعرفني كمان ازاي اختبرها عشان اعرف ان كانت سليمة ولا بايظة

---

ممكن تقولنا طريقه اختبار المومينه

بتخلى العربية دايرة سلانسيه عادي خالص وبعدين تفك اول كابل بوجيه من الموبينة من فوق تفكه وتبدا تبعد عن فتحة الموبينة سنة سنة وتشوف الشرارة الى خارجة ما بين الكابل والموبينة وتكرر العملية مع باقي الكابلات والكابل الى تخلصة تركبة مكانه تاني لو الموبينة بايظة هتلاقي الشرار طالع ضعيف قوى او معدوم خالص من الموبينة وممكن كمان تلاقي اتنين كويسين واتنين مش مطلعين

طبعا مبننصحش ان حد يجرب الموضوع دة بنفسة لان الشرارة دى يجى 40 الف فولت و اللى حتكهرب حيتروق

انا اتكهربت مرة و الشرارة مشيت من دراعى اليمين لحد ما خرجت من ركبتى اللى كنت ساندها على الارض

MMamdouh

كلامك صح يا استاذ محمد بس المفروض الى يعمل التجربة ديه يخلي بالة جدا وميمسكش اى حاجة تانية غير الكبلات وكمان يكون لابس حاجة عزلة جسمه عن الأرض عشان فعلا الكهرباء 40 كيلوفولت

السلام عليكم

أولاً: أن تكشف على طقم سلك البوجيهات
ثأنياً: إتأكد إن الماكينة بتعد 4مش أقل!
ثالثاً: شوف الرشاشات شغالة كويس ولا لأ!
رابعاً:شوف حساس التسقيف (يفضل ميكانيكى لو معندكش خبرة فى الصيانة)

وشكراً

موتور اللانوس ال 1500 مفيهوش حساس تسقيف

MMamdouh

طب أنا عندي نفس المشكلة في البيكانتو و بحط 92 من أول ما جبتها و لسه عامل الصيانة مغير الفلاتر كلها و البوجيهات.....و لسة المشكلة موجودة...

و سالت مهندس الاستقبال في التوكيل انه يظبطها بالكومبوتر قالي مافيش ظبط...العربيات ديه مش محتاجة و الكومبيوتر لكشف الأعطال فقط!!!

أنا حاسس انه بيفتي و معرفش يجاوب و خلاص...

السؤال بقي هل المواتير الانجيكشن بيتظبط الكهرباء بتاعتها؟؟؟

و لو بتتظبط أعملها فين؟؟ و بكام؟؟

فعلا المواتير النجكشن ملهاش ضبط كهرباء ولا هوا ولا كلام من دة

مكتوب فى كتالوج عربيتك تستعمل بنزين برقم اوكتين كام؟

نسبة انضغاط موتورك كام؟

MMamdouh

يا استاذ ممدوح الميكانيكي بتاع معرفش يحل مشكلة التسقيف بتاع العربية وانا فعلا حاسس ان الموتور مش مظبوط بس إن شاء الله يوم الجمعة الجاية هروح الحرفيين لواحد هناك معرفه وعنده اسكانر هيكشفلي عليها

اقتباس:

---

المشاركة الأصلية كتبت بواسطة MMamdouh

فعلا المواتير النجكشن ملهاش ضبط كهرباء ولا هوا ولا كلام من دة

مكتوب فى كتالوج عربيتك تستعمل بنزين برقم اوكتين كام؟

نسبة انضغاط موتورك كام؟

MMamdouh

---

The problem disappeared after using 95 octane fuel...and the car became like a 1600 engined:D

but it is pain in the $&*, i will switch to 92 again:D

والدي كان عنده نفس المشكلة ..

وإتضح إنه عيب بنزين .. مخلط يعني .. الحل
1. غير محطة البنزين اللي بتتعامل معاها
2. .. إن تزود على البنزين اللي في العربية الآن "محسن أداء" وتحرق المتبقي من البنزين
3. التأكد من ان البنزين اللي حتحطه بعد كده 90 أو 92 .. من محطة مضمونة

وعلى فكرة بمجرد ما تزود محين الأداء .. بعدها بدقيقتين بس .. هتحس إن إن العربية إبتديت تهدئ فعلاً ..

يا جماعة انا بقالى في الموضوع ده 3 شهور من ساعة ما جبت العربية وبقالى اسبوع بحط بنزين 95 يعني خراب بيوت وبرضه التسقيف موجود بس انا بلاحظ حاجه غريبة شويه ان لما المتور بيكون بارد بيبقى التسقيف يكاد يكون معدوم ولما موشر الحرارة يوصل للمعدل الطبيعى التسقيف بيبقى حاجه صعبة قوى لدرجه انى حاسس ان الموتور ده هيتقصف عمره من الى فيه ده

اقتباس:

---

المشاركة الأصلية كتبت بواسطة shosho

ممكن توصفهولى عشان انا النهارده رايح للى بتعامل معاه ولو كلامه معجبنيش اروح للى تبعك والف الف شكر مرة تانية

---

اقتباس:

---

المشاركة الأصلية كتبت بواسطة MMamdouh

محمد عبدة 0123863468

و انت ماشى على الدائرى فى اتجاة الهرم حتقابلك نزلة كرداسة/صفط... اتبع الرسمة المرفقة و لو الدنيا زنقت انزل من الكوبرى و كلم محمد و هو حيوصلك و يجبك لحد الورشة

http://i83.photobucket.com/albums/j3...Maps/3abdo.jpg

MMamdouh

---

same question ---> same answer

MMamdouh

والله فعلا المكانيكية عندنا فى المقطم عاوزين نلمهم و نولع فيهم فى النافورة
العربية عندى زفت سحبها ضعيف و بتسقف و هى ماشة وصوتها عالى جدا وواحد مفتى منهم قالى الفتيس عندك بايظ اجيبلك واحد استيراد بـ1200 جنية دة عشان خاطرى عنده والله الواحد ماعاد عارف يعمل اية
مع ان العربيه 2005 مالحقتش يعنى كل البهدلة دى