المشاركة الأصلية كتبت بواسطة ahmed nouh
بص قصة تراخيص السلاح اصعب مما تتخيل وبتاخد من سنة لسنة ونص على ما تخلص
فلو انت الموضوع ليه بديل ياريت تبعد عنه احسن
على العموم يعنى من باب العلم بالشئ ، انت بتروح القسم بتاعك تقدم طلب ترخيص سلاح
القسم بيعمل تحرياته عنك وبيتم التأكد ان مفيش اى حد فى عيلتك من قريب او بعيد حتى اتحكم عليه سابقاً بأى حاجة او حتى اشتبه فيه فى قضية وبعدين لو انت سليم بيسمحلك تشترى سلاح وبتسلمه مع الطلب ، هنا بيتطلب منك اثبات ان عندك املاك عقارية او اراضى علشان يبقى فى سبب للسلاح
بجانب شرط اساسى لا غنى عنه ، ان يكون حسابك فى البنك فيه فى حدود المليون جنيه رصيد ولو استوفيت للشروط دى الطلب بتاعك بيتحول لمديرية الامن وبتعمل المديرية تحرياتها عنك تانى ولو اخدت موافقة ملفك يروح اهم جهة
مباحث امن الدولة وان استدعى الامر جهات سيادية تانية ، طبعا فى الفترة اللى فاتت دى انت هتروح المباحث تقابل ناس والمباحث هتجيلك بيتك وشغلك تسأل عنك وتقعد معاك يعنى هتتعود على وجودهم حواليك كأنك مشتبه فيك فى قضية بالظبط ده بجانب بقا تحريات امن الدولة فيما بعد
بعد ما يعملوا تحرياتهم بما فيها معرفتهم مدى كرمك فى الضيافة وبعد التأكد ان محدش من قرايبك تانى ليه ملف فى امن الدولة لأى سبب الملف بتاعك بيتبعت مكتب مدير امن المحافظة اللى انت تابع لها
والخطوة دى بقا بتعتمد على كل التقارير اللى اتحطت فى ملفك بجانب رأى مكتب مدير الامن شخصيا فيك ، يا تاخد الموافقة يا متاخدهاش حتى لو كل تقاريرك سليمة
وطبعا لو ممعاكش واسطة مش هتاخدها وممكن حتى لو معاك متاخدهاش
مجرد ما طلعت الرخصة خلاص القصة دى انتهت ، محدش بيسألك عن الرصاص اللى معاك اتضرب فين وبيبقى ليك حصة بتروح تستلمها من الرصاص كل 3 شهور تقريباً لو عايزها لو مش محتاجها خلاص وطبعا فى ناس برا بتبيع ذخيرة بشكل غير شرعى
مش هتبقى محل اشتباه فى جرائم القتل عادى ، محصلش قبل كدا موقف زى ده ومنهم جرائم قتل فى نفس المنطقة
تجديد الترخيص بيتم من القسم بتاعك وبيكون روتينى مجرد بس مطابقة بصمة الطبانجة وقعدة مع رئيس مباحث منطقتك او مأمور القسم وشوية ورق روتين وخلاص ، اظن دلوقتى صرفت نظر :)
وبالمناسبة مبلغ 30 ألف على الرخصة مبلغ كويس جدا جدا ومش غالى نهائى بس المهم تضمن قدرة اللى هياخده على اصدار الرخصة لك فعلا
وزى ما قال الزملاء رخصة السلاح ان لم تكن لضرورة ملحة فهى شر ربنا يبعدنا جميعاً عنه