للاسكندرانيه: ايه انسب سعر لجراند فيل سموحه؟
السلام عليكم ورحمة الله وبركاته
دلوقتي ياشباب انا رحت سالت في جراند فيل سموحه اللي في شارع النصر ولقيت الأسعار كالتالي
المرحله الرابعه: شقه 153 متر سعر المتر 3026 يعني كلها عامله 462 الف
تدفع 5000 حجز و35% تعاقد والباقي علي 4 سنين او 5 من غير فوايد والأستلام قبل سنه من سداد اخر قسط يعني لو علي 4 تستلم كمان 3 سنين ولو 4 يبقي 4 سنين
دلوقتي انا عايز اعرف هل السعر ده غالي ولا لآ ولما اروح اتفاوض معاهم اجيب معاهم لحد كام وهل اصلا هيرضو ينزلو في السعر ولا لآ؟
كمان حاجه - انا مش معايا غير 100 مقدم ولما قلت لمدير المبيعات قالي ان ممكن تدفع باقي المقدم كمان 6 شهور ويقلل مدة التقسيط 6 شهور بس كده انا ممكن مقدرش ادفع المبلغ ده كمان 6 شهور لان هيبقي في مبلغ نص سنوي حوالي 15 الف فلما وضحت ده للراجل قالي تعالي بس وهنوصل لحل يناسبك ونبعته للأداره بس انت تعال
انا بصراحه مقلق - انا طبعا هنطحن وخصوصا عند القسط النص سنوي - القسط الشهري مش مشكله بس خايف ييجي معاد القسط النص سنوي وملاقيش فلوس معايا
لو مكاني هتعملو ايه ؟ هتجيبو حاجه زي دي واهي في سموحه وكمبوند نضيف ومستقبله حلو والراجل قالي ان مكان المقاولين العرب اللي جنبها هيبقي حاجه شبه جرين بلاز يعني الأسعار ساعتها هتولع بس انا مش عاجبيني ان شمال جراند فيل في عشوائيات بس فيه سور بس ده ميمنعش ان في عشوائيات برده
ولا هتشوفلك شقه في حدود 200 الف مثلا وتعمل تمويل عقاري وتبقي قسط مريح وتسكن فيها علي طول وتوفر قيمة الأيجار اللي بتدفعه وقدام لو حبيت تشتري شقه احسن تبقي تجيب؟؟
بس انا خايف احسن قدام الأسعار تغلي اكتر ومعرفش اجيب حاجه خالص
وفي نفس الوقتي خايف من اللي بيحصل في البلد اليومين دوول احسن الدنيا تقع والأسعار تنزل الأرض وخصوصا ان الأسكندريه الأسعار فيها من سنه ولا اتنين كانت تقريبا نص الأسعار دلوقتي بسبب موضوع التراخيص
يعني خايف ييجي محافظ تاني يعمل زي المحجوب ويفتح التراخيص وساعتها الشقه اللي اشتريتها ب 450 الف الاقيها متجيش 200 الف وانا لسه مكملتش تمنها اصلا
بالله عليكم ماتبخلو عليا برايكم ونصيحتكم عشان انا مش ببطل تفكير انا وزوجتي في الموضوع ده