الموضوع: للاسكندرانيه: ايه انسب سعر لجراند فيل سموحه؟

المشاركة الأصلية كتبت بواسطة hh

أولا ربنا يعينك و يقدرك تجيب أحسن حاجة ان شاء الله.

بالنسبة لسؤالك, أنا مش من أسكندرية و معرفش الأسعار هناك خالص بس حقولك وجهة نظري في موضوع شراء الشقة ده بصفة عمة ايا كان المكان.

أولا, انت بتتكلم على حاجة متقسطة على 4 أو 5 سنين, يعني سعر المتر في الحالة دي مينفعش يتبص له غالي و لا لأ من غير ما تحط في أعتبارك الفايدة الأفتراضية (أنا عارفة ان المفروض مفيش فايدة انما انا بتكلم ان الفلوس مش حتتدفع مرة واحدة و بالتالي ده ليه تمن سواء بالنسبة لك او بالنسبة للشركة الي بتبيعلك).

ُثانيا, الهدف من الشرا يفرق كتير, يعني اللي بيشتري شقة أو عقار كنوع من الاستثمار بدل ما يشيل فلوس بتفرق معاه جدا موضوع السوق طالع و لا نازل في الأسعار خصوصا لو بيفكر في استثمار سريع, يعني سنه و لا أتنين بالكتير و يبيع, انما اللي بيشتري شقة عشان يسكن فيها زي حالة حضرتك المفروض يفكر لقدام أكتر من كدة. يعني حضرتك ان شاء الله لو ربنا وفقك واشتريت الشقة مش حتفكر تبيعها بعد سنه و لا اتنين و بالتالي اي تغييرات في الأسعار مش حتأثر عليك قوي خصوصا ان أنا معتقدش ان فيه حاجة في مصر بترخص للدرجة دي.

ثالثا بقى و دي نقطة مهمة جدا, أي حاجة الواحد بيشتريها تقسيط - فيما عدا الحاجات الاستهلاكية - بيكون كسبان فيها مش خسران من وجهة النظر الاقتصادية. أزاي؟؟ معدل التضخم في مصر كبير جدا, يعني بغض النظر عن الأرقام المعلنة ( أعتقد انها ما بين 7 و 10 %) التضخم الفعلي أعلى من كدة بكتير. القصة ان التضخم بيتقاس بمعدل زيادة أسعار بعض السلع الاستراتيجية للشعب زي مثلا عندنا العيش و الأرز و الزيت.....الخ, و ده بيكون قياس دقيق الى حد ما بالنسبة لمحدودي الدخل اللي احتياجاتهم يدوب الأساسيات دي. لو جينا نبصلها من وجهة نظر الطبقة المتوسطة أو فوق المتوسطة, حنلاقي ان معدل التضخم الحقيقي لما نبص للسلع اللي مش بتدخل في التقييم ده و رغم كدة تعتبر أساسية عندهم زي اللحوم مثلا , أو الألبان, أو الملابس.....الخ, حنلاقي ان نسبة التضخم بتزيد و توصل ل 25 - 30 % على الأقل. طيب ده معناه ايه؟؟؟؟ معناه ان ال100 جنيه اللي بتصرفها السنة دي السنة الجاية حتبقى قوتها الشرائية تساوي 70 - 75 جنيه و اللي بعديها أقل و هكذا. يعني حتى لو الفايدة السنوية على الحاجة اللي بتشتريها 8 او 10% برضه انت الكسبان. توهتك؟ ببساطة كدة المبلغ اللي انت حتدفعه كقسط النهاردة, بعد سنه أو اتنين حتبقى قيمته أقل بكتير من الناحية الشرائية و بالتالي ساعتها المبلغ حيعتبر مش كبير زي ما انت حاسس دلوقتي, و كل ما مدة القسط تزيد كل ما النقطة دي تبان أكتر.

رابعا, انا فاهمة من مشاركاتك ان انت مهندس كمبيوتر, يعني مش موظف حكومي مثلا. بالتالي أكيد حضرتك دخلك في خلال الفترة دي في الظروف الطبيعية (الله أعلم بالغيب طبعا) بيزيد سنويا, ربنا يزيدك و يبارك لك يا رب, و بالتالي ده حيخلي برضه القسط السنين الجاية بالنسبة لك يقل من ناحية نسبته لدخلك الاجمالي.

طبعا كل الكلام و الرغي اللي فات ده (صدعتك مش كدة) ينطبق على فكرة التقسيط بصفة عامة, انما موضوع المنطقة نفسها و مستقبلها و كدة ده يفيدك فيه أهل أسكندرية. بس بصفة عامة أنا أعتقد ان موضوع التمويل العقاري برضه مش حيفرق عن كدة كتير لأن برضه فيه فايدة سنوية, الفرق الوحيد ان ممكن مدة التقسط تزيد, و ان كنت شخصيا مش بحب التقسيط يزيد عن 4 -5 سنين عشان الواحد ميدبسش نفسه فترة طويلة. و طبعا فرق المكان نفسه والكومبناوند و الحاجات دي أكيد ليها قيمة بس حضرتك أكتر واحد تقدر تحددها.

بالنسبة للأقساط لازم حضرتك تحسبها كويس و تتأكد انك باذن الله حتقدر تسدد الأقساط سواء الشهرية أو السنوية أو نصف سنوية. يعني لو حضرتك بيجيلك مكافأه سنوية مثلا حتدفع منها الأقساط السنوية يبقى كويس, لو مش كدة لازم تعمل حسابك ان فيه مبلغ بيتشال شهريا عشان الأقساط دي, أوعى تسيبها للظروف.

و في النهاية طبعا متنساش الأستخارة و ربنا يا رب يوفقك للأحسن و يبارك لك فيه.

جزاك الله كل خير علي التوضيح الرائع
انا حاسس فعلا ان القسط ممكن يكون زنقه في اول سنه وبعد كده هيبقي اقل لاني المفروض المرتب بيذيد كل سنه مبلغ كويس

المشاركة الأصلية كتبت بواسطة shnory

3000 جنيه بس؟؟؟؟؟؟؟؟؟؟؟
والله كويسه
المحل بتاعي في شارع ضيق متفرع من الرصافه في محرم بيك
عرض الشارع حوالي 6 او 7 متر
وفيه عماره بتتبني بعد مني والمتر ب3500 من غير تشطيب و4 بالتشطيب
واسمع ان محرم بيك اسعارها بقت من 4 وطالع المتر
مع فرق الخدمات عن سموحه (محرم بيك خدماتها اكتر )
طبعا انا مش بقول انها رخيصه
بس الاسعار هي اللي مولعه
من رايي تستني شويه لو تقدر لما المحافظ يتشال
يمكن اللي بعده يفتح تراخيص البناء والاسعار تتعدل شويه
او التسهيلات تزيد في الدفع

طيب يااستاذ شنوري هو المحافظ ده لو اتشال هيبقي امتي؟
وان كان برده انا حاسس ان مفيش حاجه هترخص حتي لو رجعو التراخيص تاني لان اكيد اللي هيبني هيبقي عايز يبيع بالغالي زي غيره

الأسعار فعلا نار
ده في سيدي بشر قبلي شارع مصطفي كامل المتر 4500 - ووراك مناطق ضايعه كمان مش كام بيت يعني

انا كل الفكره عايز حد يبقي عنده فكره عن الأسعار في المنطقه دي عشان اعرف اتفاوض مع الراجل

المشاركة الأصلية كتبت بواسطة moody1

هى موقعها فين بالظبط فسموحة؟

طبعا السعر ممتاز جدا 3000 للمتر(بسعر المتر فميامى او سيدى بشر عبد الناصر)!!!!!

على فكرة سموحة اسعار الشقق(العمارات الجديدة ) من 5000 ل 8000 كسعر للمتر

هي في شارع النصر اللي في وش جرين بلازا ورا المكان بتاع المقاولين العرب
اول دخله شمال في شارع النصر

اسعار الشقق اللي حضرتك بتقول عليها ده اللي في قلب سموحه او علي الشارع الرئيس في ناحيية جرين بلازا