رفضنا هيونداى خالص.. وبيصالحونا .. رأيكم ايه؟؟

بعد ما طولت مشكلة الفيرنا وطول معاد استلام البديلة رفضنا اى حاجه من هيونداى وفعلا عملنا شكوى وشرحنا اللى حصل كله فيها وكلمنا كونتاكت عشان تاخد اجرائتها ومن مكتب مدير المبيعات فى كونتاكت اتكلم معانا مدير قطاع المبيعات فى هيونداى وحاول يخلينا ناخد نيو اكسنت ويخفض( الف جنيه )من تمنها كنوع من الترضية( وناخد واحدة )لحين استلام بتاعتنا
لكن بصراحة احنا رافضين النيو اكسنت قلبا وقالبا وبعدين كده هو نطرنا فى فئة سعرية جديدة هتلخبط الميزانية
رفضنا نهائى

كنا قررنا اننا ناخد( سيريون ) من( دايهاتسو) لكن شطارة الاستاذ محسن صالح فى فرع المهندسين

خليتنا نفكر فى الجيتز ع انها تقفيل كورى مش مصرى وعلى معاد استلام (كلاكيت عاشر مرة ) يوم 10 ابريل

رأيكم ايه ؟؟:confused:

رأيكم ايه؟؟:confused:

نفضو لغبور واشترو حاجه من وكيل محترم...

نصيحه خليكي في دايهاتسو احسن ومش هتندمي بثقة ان شاء الله
وروحي اتفرجي على الأتنين بنفسك وانت هتعرفي يعني ايه الفرق بين الكوري والياباني
خصوصا انك من اولها اتقرصت فمتكرريش الموضوع تاني

وشوفي تقييم ملاك كل عربيه وانتي برضه هتعرفي الفرق

السريون ممتازة بجد

و موجودة استلام فورى

بس الامر يرجع لكم تماما, اذا كنتم مقتنعين بالعربية

اقتباس:

---

المشاركة الأصلية كتبت بواسطة أبو عبدالله

وانت هتعرفي يعني ايه الفرق بين الكوري والياباني

---

سؤال نفسى اسئله ليك يا أخ ابوعبدالله من زمااااااان بس كنت بخاف انك تفهمنى غلط وتفتكرنى من اعضاء حزب كارهى اليابان !!!

انت ليه واخد موقف جامد قوى قوى من اى حاجة كورى ؟؟؟

على فكرة انا برضه كنت متخوف جدا قبل ما اجيب الألنتر على اساس انها كورى وكنت مقتنع جدا بأى حاجة تانية يابانى
بس صدقنى مش حاسس "لغاية دلوقتى" بأى فرق بالعكس انا مبسوط دا من التكنولوجيا الموجودة فى العربية ةشايفها ناجحة جدا

انا بعتذر للأستاذه / ضيفو
علشان خرجت بره الموضوع بتاعها
بس انا شايف انك لو لسه متمسكه بالعربية فيرنا يبقى تروحى لحد مسئول كبير فى هيواندى وتقابلى وتشرحيله الموقف
او تبعتى ايميل بالكلام ده كله للشركة الأم وصدقينى الكلام ده ح يجيب نتيجة

اقتباس:

---

المشاركة الأصلية كتبت بواسطة معاذ الشرباصى

السريون ممتازة بجد

و موجودة استلام فورى

بس الامر يرجع لكم تماما, اذا كنتم مقتنعين بالعربية

---

لا مافيش استلام فورى يوم 15 ابريل زى ما قال معرض النزهة وممكن تبقى 10 ابريل كمان

احنا شوفنا العربيه وشوفنا الجيتز وركبنا الاتنين وفعلا السيريون مريحة جدا ونضيفة

لكن الجيتز مش مصرى يعنى ممكن تبقى كويسة!!

هو الفرق بصراحة اللى خلانا نحتار اننا فى السيريون لو جبنا هنجيب 1300 سىسى مش 1500
وطبعا الفروق اللى بينهم ميهمنيش منهم غير فرامل abs لانى فهمت منكم ان اهميتها فى الارض الزلقة مش حكاية سرعة بس
ده الخيار الوحيد اللى مرجح الجيتز عندنا عن السيريون 1300 لكن لو السيريون 1300 فيها abs مش هنفكر اصلا
ولا هنحتار
رأيكم ايه؟؟

استاذ ميدو

مافيش خروج عن الموضوع اوى وانا هاكلم الاستاذ ابو عبدالله ع اليابانى هناك لانى عايزة استفسر منه ع حاجات كتير هو بيقولها وعايزة افهمها

احنا الفيرنا خلاص مبنفكرش نهائى فيها احنا غيرناع الجيتز اوالسيريون

اقتباس:

---

المشاركة الأصلية كتبت بواسطة ضيفو

لا مافيش استلام فورى يوم 15 ابريل زى ما قال معرض النزهة وممكن تبقى 10 ابريل كمان

احنا شوفنا العربيه وشوفنا الجيتز وركبنا الاتنين وفعلا السيريون مريحة جدا ونضيفة

لكن الجيتز مش مصرى يعنى ممكن تبقى كويسة!!

هو الفرق بصراحة اللى خلانا نحتار اننا فى السيريون لو جبنا هنجيب 1300 سىسى مش 1500
وطبعا الفروق اللى بينهم ميهمنيش منهم غير فرامل abs لانى فهمت منكم ان اهميتها فى الارض الزلقة مش حكاية سرعة بس
ده الخيار الوحيد اللى مرجح الجيتز عندنا عن السيريون 1300 لكن لو السيريون 1300 فيها abs مش هنفكر اصلا
ولا هنحتار
رأيكم ايه؟؟

---

حضرتك السيريون ال 1300 glx فيها abs, و ده الموديل الاسبور من السيريون
ده غير ان فى عربية فضى منها فى فرع المعادى, علشان كده قلت استلام فورى
دى تمنها حاليا 87500

يا جدعان والله هيوندااى لا يعلى عليها انا معايا اكسنت و بسم الله ما شاء الله فعلا حلوه وكمان مو 98 يعنى قدمت بس حلوه والله و هيونداى دلوقتى يا جدعان بره جااااااااامده و تلاحظو ان اى عربيه تقفيل كورى هيونداى جااامده و جمييله انما العيب على هيونداى ممسكا التوكيل بتاعها لغبوور المعفن هى دى المشكله

اقتباس:

---

المشاركة الأصلية كتبت بواسطة معاذ الشرباصى

حضرتك السيريون ال 1300 glx فيها abs, و ده الموديل الاسبور من السيريون
ده غير ان فى عربية فضى منها فى فرع المعادى, علشان كده قلت استلام فورى
دى تمنها حاليا 87500

---

اللى بتتكلم عنها حضرتك دى اتوماتيك؟؟ احنا عايزينها اتوماتيك..

واللى فهمناه من فرع النزهة ان موديلات 1300 مفياهش abs ما مدى صحة الكلام ده؟؟

وانا بمحدودية علمى حسيت ان abs مهم لكن لدرجة انى اغير نوع عربية عشانه ؟؟

هل ممكن اركبه بعدين فى السيريون لو مش موجود؟؟
انا قريت حاجه زى دى هنا بس مش عارفة الاقيها تانى ازاى!!

اقتباس:

---

المشاركة الأصلية كتبت بواسطة mido777

سؤال نفسى اسئله ليك يا أخ ابوعبدالله من زمااااااان بس كنت بخاف انك تفهمنى غلط وتفتكرنى من اعضاء حزب كارهى اليابان !!!

انت ليه واخد موقف جامد قوى قوى من اى حاجة كورى ؟؟؟

على فكرة انا برضه كنت متخوف جدا قبل ما اجيب الألنتر على اساس انها كورى وكنت مقتنع جدا بأى حاجة تانية يابانى
بس صدقنى مش حاسس "لغاية دلوقتى" بأى فرق بالعكس انا مبسوط دا من التكنولوجيا الموجودة فى العربية ةشايفها ناجحة جدا

---

لأ والله عادي
انا مش محارب يعني
انا بحب الناس تنبسط ومتضيقشي وتاخد الحاجه الكويسه مش اكتر والله
وبما اني ركبت كوري من قبل وركبت الياباني
فانا اؤكدلك انك بعد 5 سنين هتلاقي الياباني محصلشي في مشاكل او قابلتك حاجات في العربيه عاوزه تتصلح علشان عمرها الأفتراضي غير طبعا الحاجات المستهلكة زي التيل والفلاتر

يعني مثلا شوف طنابير الكورولا هتعيش اد ايه وطنابير الألنترا هتعيش اد ايه
شوف الكبالن
شوف الماتور
شوف المساعدين
شوف
شوف شوف

حاجات كتير والله

انا هقولك على حاجات ولكن اعذرني فانا لست ممن يمشي وراء المظاهر
يعني دقيق شويه في حاجات ممكن متجيش على بال ناس كتير ولكن بما اني هاوي مسائل التصنيه والصنعه الحلوه فهقولك

انا هضربلك مثل واقولك وشوف انت

انا عندي في السيريون مثلا
كل اماكن المسامير اللي معرضه للماء كثيرا والمفصلات
محطوط عليها مادة زي الشمع ولكنه ثابت لا يزال بإيدك ولا بفوطة ولا بصابون ولا بالهوا

انت عندك في الألنترا كده

ده بعد كام سنه اكتر من 5 سنين مثلا هتعرف الفرق

في السيريون الحروف بتاعت الصاج اللي فوق العجل الخلفي عارفها اللي هيا الحواف دي
عندي في السريون معمولها حرف ومعزولة ولا اكنها حرف صاج
غير عندك
وانا الموضوع ده كان قرفني جدا في النوبيرا لأنه من كتر الماء في المنطقة دي بيبدأ فيها صدأ
وطبا اني ابقى راكب عربيه بعد سنة 2000 وبتمسك صدأ فده شئ كان في التسعينات ايام السوزوكي سويفت والعربيات مكنتش متجلفنه من تحت

شوف في الألمترا او الفيرنا عامله ازاي

طيب ليه لما العربيتين يبقى قريبين من نفس السعر اجيب المنظر وبعد كده لما يحصل حاجه ابقى اشوف حلها ايه

عمرك سمعت ان في واحد راكب كورولا مثلا عنده عطل في الماتور او العافشه او لكمبيوتر او او او او

الفرق واضح
وانا لست ضد عالطول ولا لست مع عالطول

ولكن الحق اللي انا شايفه ولامسه بعيني واضح

ولذلك فضلت السيريون عن الكوري الألنترا وكانت امامي وكانت بــ 92 الف ولسه نازله

وفي فرق دهان كمان

يعني الحمد لله انا حكيت كذا مره في عربيات شوية بولش ومفيش اي اثر
وده مش متواجد في الكوري

يعني من الأخر الكوريين مش بيخسروا في عربيتهم واليابانيين بيكسبوا بالهبل

وانما العكس لأن اليابانيين انتاجهم عالي جدا وعندهم ابحاث كلام من ده
ولكن في النهاية بيعطيك شئ جيد جدا

ولكن الكوريين مش كده بيعطيك مظهر وانت لا تعلم الجوهر وبسعر مقارب
في سبيل انهم زي بعض

ولكن استحالة يكون نوعية المادة اللي مصنع منها الطنابير دي زي دي
ولا العزل ده زي ده
ولا الطلاء ده زي ده
ولا الخامت كلها دي ليست دي

بدليل ان لما اليابانيين بيحبوا يرخصوا عربيه بعملوها في مصانع خارج اليابان مش عندهم

ولما العربيه بتبقى ياباني مش بتتعامل زي اللي مش ياباني مش كده ولا ايه

فاستحالة يكون الأتنين زي بعض
ولو انت عاوز الجوده فاكيد الياباني
ولو يهمك المظهر ومش مشكلة الجوده يبقى مفيش مشكلة كوري

ولكن انا عن نفسي لا انصح به لأن ده بعتبره مسئولية عليا مش اكتر
وانا شوفت القرف من الكوري بصراحه

وشوف الشكاوي من اكوري وشوف الشكاوي من الياباني

وفي النهاية انا مع الصانعه الجيده المتقنه
ولست من مشجي شئ معين وخلاص

وانما لو الككوري عمل صنعه متقنه بمعنى متقنه انا معاه

ولكن للأسف لم اجد لحد الأن هذه الصنعه

وفي النهاية انا معنديش مشكلة ولكن كل ما في الامر اني بحب للناس ما احبه لنفسي

اقتباس:

---

المشاركة الأصلية كتبت بواسطة king_de_egypt

يا جدعان والله هيوندااى لا يعلى عليها انا معايا اكسنت و بسم الله ما شاء الله فعلا حلوه وكمان مو 98 يعنى قدمت بس حلوه والله و هيونداى دلوقتى يا جدعان بره جااااااااامده و تلاحظو ان اى عربيه تقفيل كورى هيونداى جااامده و جمييله انما العيب على هيونداى ممسكا التوكيل بتاعها لغبوور المعفن هى دى المشكله

---

يعنى المشكلة دلوقتى ان الهيونداى المصرى وحش والكورى كويس

انا عارفة ان الاكسنت القديم ممتاز بس عشان هو تقفيل كورى يعنى ؟؟

انا من رايى ما تركبش من هيونداى غير النترا وجيتز وسوناتا

اكيد الدايهاتسيو احلى بس لو مصممه على هيونداى خليكى فى الجيتز عربيه نضيفه ومحترمه ومافيهاش اغلب عيوب هيونداى المعروفه

نظام الــabs
ده نظام جميل جدا وانا رايي انه مهم جدا في العربيه
لأنه بيعمل على عدم تزحلق العجلات بتاعت العربيه مما يمنع حدوث تصادم في كثير من الاحيان
وحتى عند التصادم لا يكون بنفس قوة الاندفاع التي تحدث عندما يتم تزحلق العجل في حالة ضغط الفرامل بقوة وفجأة

يعني لما العربيه العادية بتتزحلق علشان متخبطشي في حاجه بيبقى لها قوة تصادم عاليه لأن الزحلقة دي بتعطي العربيه قة اندفاع عاليه غير انها بتطول المسافة اللي بتقف فيها العربيه لو موجود فيها النظام

يعني لما بيبقى في نظام Abs في العربيه مش بتتزحلق وبالتالي بتقف في مسافة اقل بكتير من العادي
غير كده مبيبقاش في قوة اندفاع للعربيه

استاذ ابو عبدالله انت مشجع كبير للسيريون وكلامك ده يخلينى ابعد عنها

الا اذا رديت ع سؤالى للاستاذ معاذ اما قال ان سيريون 1300 glx فيها abs هختارها ع طول لو اتوماتيك..:)

يا اختي الفاضلة

السيريون معروف انها ثلاث موديلات سابقا واربعه في 2008

الموديل الاعلى بتاع الاخ معاذ وهو 1500 سي سي فيه Abs و Ebd
وباقي الكماليات المعروفة

الموديل اللي بعديها هو هو نفس الموديل السابق ولكن ماتور 1300 سي سي

والاتنين دول اتوماتيك طبعا

وبعد كده موديل اتوماتيك فقط ولا يوجد فيه Abs ولا باقي الكماليات زي الجنوط والأسبويلر واليس دس المدمج ولكن يوجد به سي دي سوني فقط

وبعد كده الموديل المانويل فقط

اقتباس:

---

استاذ ابو عبدالله انت مشجع كبير للسيريون وكلامك ده يخلينى ابعد عنها

---

انا مش فاهم معنى الكلام ايه

اقتباس:

---

المشاركة الأصلية كتبت بواسطة ضيفو

بعد ما طولت مشكلة الفيرنا وطول معاد استلام البديلة رفضنا اى حاجه من هيونداى وفعلا عملنا شكوى وشرحنا اللى حصل كله فيها وكلمنا كونتاكت عشان تاخد اجرائتها ومن مكتب مدير المبيعات فى كونتاكت اتكلم معانا مدير قطاع المبيعات فى هيونداى وحاول يخلينا ناخد نيو اكسنت ويخفض( الف جنيه )من تمنها كنوع من الترضية( وناخد واحدة )لحين استلام بتاعتنا
لكن بصراحة احنا رافضين النيو اكسنت قلبا وقالبا وبعدين كده هو نطرنا فى فئة سعرية جديدة هتلخبط الميزانية
رفضنا نهائى

كنا قررنا اننا ناخد( سيريون ) من( دايهاتسو) لكن شطارة الاستاذ محسن صالح فى فرع المهندسين

خليتنا نفكر فى الجيتز ع انها تقفيل كورى مش مصرى وعلى معاد استلام (كلاكيت عاشر مرة ) يوم 10 ابريل

رأيكم ايه ؟؟:confused:

رأيكم ايه؟؟:confused:

---

لالالالالالالالالالالا أنصحك بترك غبور والتوكل على الله وطالما دخلتى ففئة الجيتز يبقا السيريون أفضل ولكن كم فرق السعر ؟؟؟؟

اقتباس:

---

المشاركة الأصلية كتبت بواسطة ضيفو

لا مافيش استلام فورى يوم 15 ابريل زى ما قال معرض النزهة وممكن تبقى 10 ابريل كمان

احنا شوفنا العربيه وشوفنا الجيتز وركبنا الاتنين وفعلا السيريون مريحة جدا ونضيفة

لكن الجيتز مش مصرى يعنى ممكن تبقى كويسة!!

هو الفرق بصراحة اللى خلانا نحتار اننا فى السيريون لو جبنا هنجيب 1300 سىسى مش 1500
وطبعا الفروق اللى بينهم ميهمنيش منهم غير فرامل abs لانى فهمت منكم ان اهميتها فى الارض الزلقة مش حكاية سرعة بس
ده الخيار الوحيد اللى مرجح الجيتز عندنا عن السيريون 1300 لكن لو السيريون 1300 فيها abs مش هنفكر اصلا
ولا هنحتار
رأيكم ايه؟؟

---

1300 ده يخليكي تصرى عالسيريون لأنها موفرة فالبنزين أكتر ومع ظهور اخبار زيادات الضرائب وما لذلك طبقا لأحجام المحركات أنصحك بالسيريون مرة أخرى

استاذ ابو عبدالله ..عايزة توضيح اكتر بعد اذنك يعنى فى سيريون 1300 اتوماتيك وabs ,ebd زى ال 1500 بس الفرق حجم الماتور بس؟؟

طلبت حضرتك توضيح ع كلامى :انا قصدى انك قلت ان : ايه بى اس مهم واللى انا اعرفه واحتجت منكم توضيح فيه

ان السيريون 1300 مافيهاش الكلام ده يبقى كده حضرتك بتبعدنى عن العربيه لان مافيهاش الحاجة المهمة دى

اقتباس:

---

المشاركة الأصلية كتبت بواسطة ضيفو

استاذ ابو عبدالله ..عايزة توضيح اكتر بعد اذنك يعنى فى سيريون 1300 اتوماتيك وabs ,ebd زى ال 1500 بس الفرق حجم الماتور بس؟؟

طلبت حضرتك توضيح ع كلامى :انا قصدى انك قلت ان : ايه بى اس مهم واللى انا اعرفه واحتجت منكم توضيح فيه

ان السيريون 1300 مافيهاش الكلام ده يبقى كده حضرتك بتبعدنى عن العربيه لان مافيهاش الحاجة المهمة دى

---

ايوه بالظبط كده العربيتين زي بعض الفرق الوحيد الماتور فقط بس


وبخصوص نظام ABS فهو فعلا مهم جدا للطوارئ وبيحمي كتير
انا شخصيا انقذني اكتر من مره والحمد لله

ولكن ده موجود في الموديلين الأخرنيين فقط الكاملين بس اللي هو 1500 والــ 1300 الكاملين
اللي هما بــ 91 الف والتاني بــ 87 الف

اقتباس:

---

المشاركة الأصلية كتبت بواسطة cpt_shawky

لالالالالالالالالالالا أنصحك بترك غبور والتوكل على الله وطالما دخلتى ففئة الجيتز يبقا السيريون أفضل ولكن كم فرق السعر ؟؟؟؟





1300 ده يخليكي تصرى عالسيريون لأنها موفرة فالبنزين أكتر ومع ظهور اخبار زيادات الضرائب وما لذلك طبقا لأحجام المحركات أنصحك بالسيريون مرة أخرى

---

فرق البنزين والضرايب يستاهل ولا مش اد كده؟؟

لو بتسأل ع فرق السعر بينهم هيبقى 3500

[

ولكن ده موجود في الموديلين الأخرنيين فقط الكاملين بس اللي هو 1500 والــ 1300 الكاملين
اللي هما بــ 91 الف والتاني بــ 87 الف[/QUOTE]

كده فهمت ان فى موديل gl /glx وده 81,500 من غير abs والاول 87,000 وفيه abs

شكرا ع صبرك :)

اقتباس:

---

المشاركة الأصلية كتبت بواسطة أبو عبدالله

لأ والله عادي



ولكن استحالة يكون نوعية المادة اللي مصنع منها الطنابير دي زي دي
ولا العزل ده زي ده
ولا الطلاء ده زي ده
ولا الخامت كلها دي ليست دي

بدليل ان لما اليابانيين بيحبوا يرخصوا عربيه بعملوها في مصانع خارج اليابان مش عندهم

ولما العربيه بتبقى ياباني مش بتتعامل زي اللي مش ياباني مش كده ولا ايه

فاستحالة يكون الأتنين زي بعض

وفي النهاية انا معنديش مشكلة ولكن كل ما في الامر اني بحب للناس ما احبه لنفسي

---

ليه إستحالة يا أستاذ أبو عبد الله...؟؟!!!
شوف ضمان هيونداي في أمريكا في اللينك ده
http://www.hyundaiusa.com/global/warranty/warranty.aspx

Power Train عشر سنوات أو 100 ألف ميل
ضمان على العربية بالكامل خمس سنوات أو 60 ألف ميل
ضمان الصدأ و التآكل سبع سنوات بدون حد أقصى من الأميال
إنبعاثات الغازات الضارة (في حدود القوانين الفيدرالية الأمريكية) ثماني سنوات أو 80 ألف ميل
إنبعاثات الغازات الضارة (طبقاً لقوانين ولاية كاليفورنيا و أوريجون الصارمة - مصنفة كولايات خضراء) سبع سنوات أو 70 ألف ميل
الكلام ده على هيونداي ككل يعني من الأتوس لحد الأزيرا.

أنا الحقيقة مش مستوعب خالص التعميم الغريب اللي حضرتك مصر عليه ياباني حلو و كوري وحش و خلاص !!!
الياباني ممتاز و مفيش إختلاف عليه و كمان الكوري كده..
يعني حضرتك شفت كتير أوي كدة مثلاً واحد راكب إلنترا أو سيفيا أو أكسنت أو إكسيل أو برايد موديلات خلال العشر سنوات السابقة (يعني موديل أواخر التسعينات أو ألفينات) ماشية مفككة و بتدخن و البارومة ضاربة فيها؟!!!!
هل عند حضرتك بيانات حقيقية أو دقيقة بتقول إن اللي راكب هيونداي أو كيا بيغير مساعدين أو كبالن أكتر من أي عربية ياباني؟
و مين قال إن الكورولا مبتعطلش في الموتور أو العفشة؟؟؟ّّّّ!!! الكورولا عربية رائعة و سمعتها سابقاها على مستوى العالم بس مش إختراع أو تكنولوجيا فضائية يعني ... حضرتك شوف قسم تويوتا و هتلاقي الإخوة هناك بيتكلموا على أعطال عادية جداً زيها زي أي عربية... و دي حاجة متعيبهاش نهائي.

و شكراً على سعة صدركم

اقتباس:

---

المشاركة الأصلية كتبت بواسطة ahmedfd

ليه إستحالة يا أستاذ أبو عبد الله...؟؟!!!
شوف ضمان هيونداي في أمريكا في اللينك ده
http://www.hyundaiusa.com/global/warranty/warranty.aspx

Power Train عشر سنوات أو 100 ألف ميل
ضمان على العربية بالكامل خمس سنوات أو 60 ألف ميل
ضمان الصدأ و التآكل سبع سنوات بدون حد أقصى من الأميال
إنبعاثات الغازات الضارة (في حدود القوانين الفيدرالية الأمريكية) ثماني سنوات أو 80 ألف ميل
إنبعاثات الغازات الضارة (طبقاً لقوانين ولاية كاليفورنيا و أوريجون الصارمة - مصنفة كولايات خضراء) سبع سنوات أو 70 ألف ميل
الكلام ده على هيونداي ككل يعني من الأتوس لحد الأزيرا.

أنا الحقيقة مش مستوعب خالص التعميم الغريب اللي حضرتك مصر عليه ياباني حلو و كوري وحش و خلاص !!!
الياباني ممتاز و مفيش إختلاف عليه و كمان الكوري كده..
يعني حضرتك شفت كتير أوي كدة مثلاً واحد راكب إلنترا أو سيفيا أو أكسنت أو إكسيل أو برايد موديلات خلال العشر سنوات السابقة (يعني موديل أواخر التسعينات أو ألفينات) ماشية مفككة و بتدخن و البارومة ضاربة فيها؟!!!!
هل عند حضرتك بيانات حقيقية أو دقيقة بتقول إن اللي راكب هيونداي أو كيا بيغير مساعدين أو كبالن أكتر من أي عربية ياباني؟
و مين قال إن الكورولا مبتعطلش في الموتور أو العفشة؟؟؟ّّّّ!!! الكورولا عربية رائعة و سمعتها سابقاها على مستوى العالم بس مش إختراع أو تكنولوجيا فضائية يعني ... حضرتك شوف قسم تويوتا و هتلاقي الإخوة هناك بيتكلموا على أعطال عادية جداً زيها زي أي عربية... و دي حاجة متعيبهاش نهائي.

و شكراً على سعة صدركم

---

الكورولا مبتعطلشي فده كل شئ له نسبة وممكن بحسبة صغيرة وسؤال الناي هتعرف انهي اللي معروف انه بيعطل او فيه حاجات منه بتبوظ بسبب الخامة المصنع منها القطعه اللي باظت او عمر افتراضي ضعيف

وانا مبقولش كلام في الاحلام ولا من الفضاء

متهيالي السوق والسعر بتاعه بيوضح الفرق

وبعدين اعذرني في موضوع امريكا
فلو الموضوع كده كنت انت اخدت فترة الضمان دي هنا في مصر

وبعدين المقارنه اللي بنتكلم عنها هنا في مصر

انا لست بقول في العالم

انا بتكلم عن العربيات اللي انا شايفها في مصر
ولما بنصح واحد بنصحه بالعربيات اللي في مصر وليس هيأتي بها من امريكا

وفي النهاية انا لست بعمم الكلام
ولكن للأسف غالب الكوري اللي في مصر كفاءة واحده متقاربة جدا

اما هناك فرق واضح لمن يهتم بتفاصيل ادق من المظهر

ولو حضرتك شوفت العربيات اللي انت بتقول عليها دي من زمان مكش شرط الاقيها ماشيه بدخن
وانما اسأل صاحبها صرف اد ايه من يوم ما جابها وغير كام قطعه وشوف البرومه او بداية الصدأ في اطراف حديدها خصوصا فوق العجل الخلفي

وده شئ موجود للناس تشوفه

وبعدين مش معنى اني بقول افضل ان التاني معناه وحش
ولكن انا بنصح فحب أنصح بالصح وليس بالأقل منه

وهيا ده اللي حضرتك مخدتش بالك منه بس مش اكتر

حضرتك كماليات السيارة 1300 GLX سبور

موتور 1300, 16v, DOHC
اتوماتيك
4 زجاج كهرباء
تكييف
باور كهرباء
سنتر لوك
مرايات كهرباء
راديو سىدى مدمج فى التابلوه (audio)
4 سماعات (2 امامى و 2 خلفى فى الابواب)
وصلة AUX
2 ايرباج
ABS, EBD
جنوط سبور 14
مقابض بلون السيارة+ مقابض نيكل بالداخل
سبويلر خلفى
امكناية التحكم فى ارتفاع كرسى السائق
مسند يد بين الكراسى الامامية
4 حامل اكواب امامية + 1 خلفي (مسند اليد مثبت فى مكان 2 حامل اكواب خلفى)
فرش اسود فاخر + 2 مخدع رأس خلفى
امكانية طى الكنبة (6:4)

دى كماليات العربية بالكامل, ثمن السيارة اعتبارا من 1-4-2008 : 87500

مواصفات الجيتز
1600 سى سى 105 حصان
4 زجاج كهرباء
مرايات كهرباء باور استيرنج كاسيت سى دى تكييف فتحة سقف فرش نفس لون طارة الدريكسيون والفتيس. ناقل حركة اوتوماتيك
سعرها 81000
الجيتز تقفيل كورى 100% عربية قطع غيارها منتشرة خارج التوكيل الموتور الية راكب فيها نفس موتور الفيرنا 1600 والكوبية والماتريكس والانترا 2005

سواء ال Sirion أو ال Getz، الاتنين ممتازين، يعني ان شاء الله مش هتندمي لو اخترتي اي واحده فيهم.

انا برضه كنت بفكر في الاتنين و اخترت ال Getz. و لو عايزه تعرفي اي حاجه عنها انا تحت امرك :)

اكون شاكرة لو حضرتك قلت ع اى حاجة تعرفها عنها اى حاجة ان شالله تكون صغيرة وهى بقالها كام شهر معاك ؟؟

يعنى.. هنتعبك قيمها لنا .. لان الكلام عنها فى المنتدى قليل مش عارفة ليه

وانا عرفت انها مافيهاش abs صحيح الكلام ده؟؟:confused:

وشكرا لكم جميعا

اقتباس:

---

المشاركة الأصلية كتبت بواسطة ضيفو

اكون شاكرة لو حضرتك قلت ع اى حاجة تعرفها عنها اى حاجة ان شالله تكون صغيرة وهى بقالها كام شهر معاك ؟؟

يعنى.. هنتعبك قيمها لنا .. لان الكلام عنها فى المنتدى قليل مش عارفة ليه

وانا عرفت انها مافيهاش abs صحيح الكلام ده؟؟:confused:

---

العربيه معانا بقالها 4 شهور و ماشيه زي الفل الحمد لله. المشاكل الوحيده اللي ممكن تقابلك في العربيه هي الحاجات المتركيه في مصر (الكاسيت، السنترال لوك و الانزار). السنترال عندي علق مره واحده و ضبطوه في التوكيل تاني يوم. و في عندي ريموت من الاتنين مش شغال عشان اتغسل في الغساله :D في التوكيل قالولي هنغيرلك الانزار كله ببلاش بس بكسل اروح!

اول متركبي العربيه هتحسي بأنها شيك جدا من جوه، عكس الفرنا خالص (و عكس السيريون كمان!!). الفرش الاحمر او الازرق و الدركسيون و الفتيس الجلد (نفس اللون) و ال metal و ال chrome inserts اللي في التابلوه و الابواب مخلين شكل ال interior شيك جدا!

العربيه ال performance بتاعها حلو جدا (معتقدش انك مهتمه بالموضوع ده بس قلت اقول برضه! :D) بس في نفس الوقت استهلاك البنزين مش هيبقي زي السيريون ال 1300 مثلا.

العربيه واسعه جدا من جوه (مقارنتا بالعربيات التانيه اللي في نفس ال class طبعا) و الشنطه معقوله (مش واسعه بس برضه بتشيل كتير) و طبعا الكراسي اللي ورا بتتقفل و العربيه بتبقي عامله زي النص نقل! :D

الحاجات اللي مش عجباني في العربيه:
- كماليات قليله (مفيش ABS، airbags، جنوط، spoiler، foglights.....)
- وضعية الدواسات عاليه شويه وكانت بتوجعلي رجلي اول مجبناها، بس اتعودت عاليها. بس برضه ال driving position في الفرنا افضل.
- الشنطه مش بتفتح و تقفل مع السنترال لوك، طبعا عاشان غبور هو اللي مركبه!
مافيش حاجه تانيه في دماغي دلوقتي....

لو عايزه تعرفي حاجه معينه انا تحت امرك. و هبعتلك private message فيها لينك في كل حاجه ممكن تتخيليها عن العربيه :)

طب ايه اخبارها فالتراخيص والضرايب يا مان عشان عايز اجيبها مقارنه بالسريون
واجيبها منين وبكام وانا عايزها سوداء فرش احمر
ولما بتيجي بتكون عامله فحدود كام كيلو