الموضوع: استفسار بخصوص سيارات المعاقين

الكلام ده حرام
لانك بتاخد حاجه مش بتاعتك
بتاخد حق واحد محتاج و في اشد الحاجه لهذه السياره
و كتييييييييييير جدا بيحصل
ان ناس بتاخد حق ناس
و ده يعتبر ظلم
حتى لو اللي انت جبتها باسمه اديته فلوس ( رشوه )
زي بالظبط الوزراء اللي بيطلعو قرارات علاج على نفقة الدوله لاهلهم
و هما عندهم ملايين
و فيه ناس تانيه بتنام في الشارع امام القومسيون الطبي في وزارة الصحه
جايين من اخر بلاد مصر المحروسه
نايمين في الشارع منتظرين صرف روشتة علاج
لانهم مش قادرين يشتروها
زي برضو الموظف اللي بيدعي المرض علشان ياخد اجازه
و فيه غيره مريض بالفعل و محتاج الاجازه دي اكتر منه لكن بتترفض
لان الاخ التاني بياخد الاجازه بطرق غير شرعيه

المشاركة الأصلية كتبت بواسطة mahmoudysf

هي بقت اسهل حاجة في اي حاجة نقول حرام وخلاص كدة بدون علم
حق مين اللي خده
وانت دخلت الدنيا في بعضها كدة ليه
الحرام ان الحكومة تتحكم في المعوق انو ميبعش العربية لمدة خمش سنين عشان يحمو اصحاب توكيلات السيارات
الراجل بيسال في حاجة معينة
يا تفيدة في الحاجة دي
يا امى ما تفتيش من غير علم
وتجيب تشبيهات في غير محلها

يا استاذ ممكن ترد على سؤالي
لما تاخد حاجه مش بتاعتك
يبقى حرام ولا حلال ؟
لما تاخد حق غيرك
يبقى حرام ولا حلال ؟
لما تدفع رشوه علشان تطلع رخصه مش ليك
يبقى حرام ولا حلال ؟
لما تدور على طرق ملتويه و غير شرعيه
يبقى حرام ولا حلال ؟

يا استاذ ايه هو اللي حرام بس واحدة واحدة
اولا مش حرام اصحاب التوكيلات يجييبوا زبالة العربيات (الفرنا و اللوجان ....الخ) و تتباع ب 70 الف جنيه
انا كنت بشتغل في السعودية تصور العربية الكامري اللي هي قمة التويوتا بتتباع ب 70 الف ريال موديل السنة تيجي هنا تلاقيها ب 560 الف جنيه ايه الجشع ده و الاستغلال ده ...
خد عندك مثلا اللوجان عربية المفروض هي للطبقة المتوسطة و نازلة من غير جمارك سعرها كان المفروض ميعديش 35 الف جنيه
بقدرة قادر توصل ل 70 الف جنيه طب ازاي ..طبعا عشان خاطر اصحاب التوكيلات و يتحرق الباقي
الحرام فعلا هو اللي بيتعمل فينا
انا مش بقول ان الواحد ياخد حاجة مش بتاعته زي مثلا كتير بيعملوا قومسيون طبي و يدفعوا رشوة 12 الف جنيه و يطلعوا بيه علي بورسعيد و يستلموا عربية معاق ...ده هو اللي حرام
بس الاخ مشتريها باسم المعاق اللي كان عمره ما هيشتري عربية باسمه فهو كده استفاد و غيره استفاد
و لعلمك العربيات في بورسعيد مرمية في الجمرك مش لاقية اللي يرخصها

الأخ ماندو اللى عمال يقوللى حرام وحلال
انا دكتور ولما ابقى درست كل الفترة دى واتخرج فى الاخر اخد 400 جنيه مرتب دا حرام ولا حلال وغيرى بره بياخد على الاقل اكتر منى 10 اضعاف
لما اكون بتبهدل فى المواصلات واشتغل لحد 2 بالليل وعايز اروح بيتى ومالقاش مواصلة تروحنى وعلى ما اروح تكون الساعة 5 الفجر مع العلم ان ممكن المشوار ماياخدش اكتر من ربع ساعة دا حلال ولا حرام
ولما يكون سعر العربية هنا اكتر من تمنها بره اضعاف دا حلال ولا حرام
ولما يكون المعاق دا اللى انا جبت باسمه عمره ماهيجيب عربية وانا اديته مبلغ يمشى بيه اموره دا حلال ولا حرام
ياريت ماتتكلمش وانت مش عارف حاجة وانا بطلب طلب يا تجاوب عليه يا تسكت احسن

ياريت يا جماعة لو حد يعرف حل يجاوبنى

السلام عليكم ورحمة الله وبركاته

بالنسبة لموضوع الحلال والحرام فى الموضوع ده انا مش هفتى ولا أقول حلال ولا حرام لانى مش أهل الفتوى لكن انا حصل معايا موقف انى جبت عربية وكتبتها على اسم بنت معاقة واديتها فلوس واكتشفت انها بعد كده عملت سقف لبيتها لانه كان من غير سقف وهى ساكنة فى بيت ريفى ومن أسرة فقيرة ... وأعتقد ان أى معاق بنجيب عربية على اسمه وبياخد مقابل مالى بيكون شخص محتاج الفلوس أكتر من العربية لانه من حقه يجيب عربية كل 5 سنين ولو دورت فى تاريخه قبل ما تجيب عربية على اسمه مش هتلاقيه جاب ولا عربية فى حياته ولا كانت فى خطته ... الخلاصة اللى بياخد حق غيره ده حرام لكن الموضوع ممكن يكون مساعدة لان هو معاه حق يعنى ممكن نقيسه على شخص بياخد دعم على التموين من الدولة وبيبيعه لانه مش محتاجه ومحتاج الفلوس أكتر يبقى انا لو مأخدتوش منه ممكن أضيع عليه الفرصة وحقه فى الدعم ...ده رأى شخصى وليست فتوى

بالنسبة بقى لموضوعنا رخصة المعاق يفضل انك تعلمه القيادة أو تشوفله وسطة والمهم يكون بيقرأ ويكتب وان شاء الله ربنا يوفقك وتطلعهاله بس خلى بالك عشان النصب كتير أوى فى الموضوع ده ... وبالنسبة لفك الحظر ان شاء الله مش هيكون فيه غرامة ولا حاجة الغرامة بتكون بعد مرور الثلاث سنوات بس وبتكون 9600 خزينة ومصاريف تانية ومستخلص يعنى بتخش فى 10000 او أكتر شوية وبتتعمل من المطار على ما أعتقد بس المهم رخصة المعاق وربنا كريم