أمــاكن بيــع قطـع غيار مستعمــلة لسيترويـــن

**tareksamir556** · 09-11-2007 01:33 PM

مسا الفل يا جماعه
أنا زميل جديد في المنتدي ومالك جديد لسيتروين
ملاحظ انكم تقريبا مش بتشاركوا في المنتدي
مش عارف ده يأس من السيترويين ولا معدش عندكو كلام
علي العموم انا معايا سيتروين ax مو 95
ممكن نبدأ نتكلم سوا
من فضلكم عاوز اقترح عمل أجندة لبائعي قطع غيار السيتروين المستعمل
وهبدأ بمحل في دار السلام أسمه بورسعيدلقطع الغيار استعمال خارج
2ش ناصر عجيبه المعادي خلف المحكمة الدستورية
اشتريت من عنده موبينه ب100 جنيه
في انتظار تواصلكم
شكرا

**Nader** · 14-11-2007 05:53 PM

فكرة جميلة فعلاً وياريت اي حد عندة معلومات تانية يضيفها لتعم الافادة.

**tareksamir556** · 08-02-2008 01:36 PM

صباح الخير
أشكرك علي ردك اللطيف
أنا تعاملت مع أمير وجوزيف وعندي تعليق أحب أوضحه
أنا رحت ليهم والعربية كان أمبير الحرارة بيعلا المهم أن الميكانيكي يقول ده عيب كهربا والكهربائي يقولي عيب رادياتير وبتاع الرادياتير يقولي عيب ميكانيكا وفضلت ألف حوالين نفسي في المقطم لحد ما اتخنقت
بتاع الردياتير قال لي التشخيص وأنا صدقته لأنه شخص محترم وصنايعي نضيف جدا وعنده ضمير الصراحه
المهم وديت العربية لأمير وجوزيف لقيت العيب اللي قاله متولي رادياتير
كان ترموستات وكتاوت وبلف
الرجاله عملوها وظبطوها زي الفل جدا جدا جدا
طبعا المكان زحمه لاز تودي عربيتك بدر علشان تحجز وبيقفلوا الساعه 6 مساءا
الفاتورة طلعت وكانت أ سعار قطع الغيار زي السوق والمصنعية مكتوبه وموضحه
وفي رأي انه مكان هايل وان كانت المصنعيه عاليه ويه فده مقابل النظافه في العمل
وبيستعملوا قطع الغيار الأصلية
وأنا قررت اتعامل معاهم علي طول
ماعدا في العفشة هأستعمل استيراد خارج
ملحوظه لو حد من سكان المقطم وعايز يعمل رادياتير يقولي
طارق
بحب نايل موتورز

**fiatmomo** · 09-02-2008 06:36 PM

استاذ طارق ..... اهلا بيك ومبروك على الستروين

كلمنا على العربية شوية ... التكيف كويس ... وهل بيحمل على الموتور جامد

كلمنا على اداء العربية عموما ... انا شخصيا بحترم العربية دة .. بالرغم من عدم انتشارها ...

واهلا بيك مرة تانية

**tareksamir556** · 10-02-2008 10:45 AM

صباح جديد وجميل ان شاء الله
العربيه سيتروين ax موديل 95
كنت جايبها ب 26 ألف
فيها تكييف جميل
وسنتر الأصلي اللي نازل مع العربية وده قديم بمعني انه بيشتغل انفرا ريد يعني لازم توجه الريموت ناحية جهاز الاستقبال الموجود بجوار مراية الوسط
معاها الكتالوجات الأصلية بتاعتها
الشنطه لسه لمبتها شغاله مع فتح الشنطه
طبعا أقصد من كده أن المالك السابق كان مهتم
عملت بيها 140 كيلو داخل اقاهرة
علي الطريق السريع العربية متزنه جدا مش أي عربيه تعدي جنبك تهز العربية
قطع غيارها متوفرة بس غاليةلو انت بتقارنها بالفيات واللادا والحاجات دي لكن احساسك بيها مختلف
اقصي سرعه عملتها علما باني عاقل في السواقه 120ك فقط بخاف علي الأرواح وممتلكت الغير واتمني ان ده ينتشر
كانت العربية انسيابية جدا وراسيه جد
موتور العربيه تحفه وكل اللي يشوفه يبدي اعجابه
المشكله في الميكانيكي وحالات الطوارئ وعلشان كده باهتم ان مع أول حدوث حاجه او صوت اروح بيها للكشف علشان متعملهاش تعذبني
طارق

**tareksamir556** · 10-02-2008 10:46 AM

عملت 140 كيلو داخل القاهرة ب 13 لتر

**Ahmed Hassan** · 10-02-2008 02:48 PM

انته عندك الموتور الأسود صح؟ الموتور ده احلى حاجه في العربيه... اعطاله قليله جدا و آداؤه يعتمد عليه... كان عندي الموتور ده في البيجو 205

**tareksamir556** · 11-02-2008 11:42 AM

فعلا الموتور الأسود
ووالله حسبتها بالورقة والقلم يا صاحبي
طارق

**fiatmomo** · 11-02-2008 08:51 PM

ما شاء الله ... 140 كيلو ب 13 ليتر داخل المدينة .. نسبة كويسه جدا
اولا لانها داخل المدينة, ثانيا لانها عربية مستعملة من سنة 95 ,ثالثا لانها 1400 .

ربنا يحفظهالك ويديك خيرها ويكفيك شرها .