و لله الحمد...سيراتو هاي لاين جديدة...

الحمد لله و بفضل الله بقيت احد اعضاء نادي كيا اهوه....بعد متابعة منذ فترة طويلة جدا قبل نزول العربية اصلا كنت حاسس اني هجيبها في يوم من الايام........جبتها هاي لاين بصمة أعلى فئة خليجي سعودي بس من موديلات 2010 المتبقية عند معرض من المعارض و عنده كذا واحدة على فكرة ببصمة و من غير......

هتقوللي ليه و حرام عليك و الكلام ده هرد بأختصار السيراتو عربية مغرية جدا بمميزاتها و كمالياتها و انا كنت خايف جدا من كلمة فتيس جديد و ده من ساعة ما خسرت كتيررررررررر جدا في كورولا وكيل مالتي ترونك للاسف جبتها زيرو في 2008 وبعتها بعد 3 شهور ماشية 3500 كلم بخسارة حوالي 35000 يعني خراب مستعجل و التوكيل طبعا ولا الهوا و لا عملي اي حاجة و كمان السعر مقابل المزايا و بدل ما نعمل شغل تباديل و توافيق و قص و لزق في المواصفات قلنا نجيب أعلى فئة و الكمال لله وحده سبحانه.........

وقفت ب 116 الف و خلينا في الفتيس المتجرب و برضه الهاي لاين و البصمة ليها احساسها المختلف .........

انا كنت عايز اسأل بس بخصوص الصيانات و رنج اسعارها و هل بنغير زيت بعد اول ألف و لا خمستلاف و احسن مكان للصيانة لأصحاب التجربة و ياريت طبعا يكون شغال بعد الضهر مش الصبح من بدري و كده

و شكرا لنايل موتورز و لكل المحترمين هنا و ربنا يوفقكم و يسترلنا طريقنا و اياكم اللهم امين........

الف مبروك على العربية ويارب يبارك فيها ويحفظها من كل سوء

انت خلاص اشتريت اوعى تفكر تانى فى حاجه اسمها فتيس جديد واستمتع بعربيتك

بخصوص الصيانات طبعا اول صيانة بتكون على 1000 ك بيتغير زيت 10000 ك + فلتر بتتكلف حوالى 400 ج

لو انت مأمن على العربية ( تأمين شركات خليجى ) بيكون ليهم مراكز صيانة تابعه ليهم لو مش مأمن يبقى اول شى تأمن على العربية مش هتخسر على الاقل لمده سنة
تقريبا 900 ج ( ضرورى جدا )

اغلبنا هنا تعاملنا مع مركز تكنو وان ولينا تجارب فيه كتيرا ولينا الافضلية هناك

http://www.nilemotors.net/Nile/150847-a.html

واحنا اتشرفنا بنمر جديد فى عائلة نمور كيا

الف مبروك على العربيه وربنا يكفيك شرها

الله يبارك فيكم و ما اتحرمش من ذوقكم ابدا...........

عالعموم انا مش شاري ضمان بس لأني حاسس انه ملوش لزمة التأمين اذا كان ضمان الوكيل قبل كده في الكورولا معمليش حاجة و قبلها الأوبترا منصور اتعطف عليا و غيرلي علبة الدركسيون اللي بايعهالي معيوبة أصلا بعد غلبة و كلام كتير و عطلة طيب بتبيعوها معيوبة اصلا ليه و يقولك ده اصله عيب شائع!!!!!!!

يعني عالعموم الحمد لله العربية مش ظاهر فيها عيوب حتى الأن و ربنا يستر و كويس موضوع تغيير زيت على أول ألف ده لأني كان عندي نيو اكسنت قبلها و برضه كانت كده فكنت شاكك بصراحة......شكرا عالمعلومة...........

و شكرا لذوقكم و ربنا يباركلنا و يباركلكم جميعا..........

الف مبروك يا باشا .. و العملية دى أذواق .. فى ناس تفضل الكماليات عن فتيس جديد .. و فى ناس العكس .. بس عموما انت مش هتحس انك مفتقد حاجه ما دام عندك جميع الكماليات و العربية مع ناس كتير و زى الفل الحمد لله.

ربنا يبارك لك فيها و يحفظهالك.

الله يحفظك و يباركلك.....

انا اصلا من اهم اسباب شرائي 2010 غير السعر المغري اللي مش فارق عن المستعمل كتير و اللي فارق برضه عن ال 2011 كتير جدا (2011 هاي لاين ب128 و فيه ب 133 بكاميرا و بلوتوث) هوه الفتيس الجديد و خوفي من انه يكون فعلا تقيل أو فيه مشاكل و قلت خلينا في العادي شغال و بيسحب و متجرب.....مش مستعد أكرر كابوس الكورولا تاني و العربية لسه ما مشيتش ألف كيلو و الوكيل يقولي لو ما نقلتش لوحدها اعملها مانيوال و انقل انته يعني مش اشكال (هوه مش الجيش قالك اتصرف!!) قلتله ماهو المشكلة انها ما بتنقلش سرعات لوحدها و كمان ما بتعشقش لورا أعمل ايه انزل أزقها لورا !!!!!!!!

يالا ما علينا............شكرا للرد الطيب

الف مبروك على العربيه وربنا يديك خيرها و يكفيك شرها
اسم المعرض اللى اشتريت منة اية اخوك هيشترى الاسبوع الجاى واى معلومة محتاجها

مبروك يا باشا علينا وحش جديد فى منتدى الوحوش كيا سيراتو ... بالنسبة للزيت ... لو هتحط الزيت ال 5000 كيلو يبقى أحسنلك تغير عند 5000 كم و لو هتحط الزيت ال 10000 كيلو يبقى أفضل إنك تغير عند 1500 و ترجع بقى تغير عند ال 10000 و هكذا

بالنسبة للصيانة ... طبعا العربية جديدة ممكن تعمللها الصيانة فى أى مركز صيانة عربيات (تكنو وان - أمير و جوزيف - أى حد يعنى) علشان تربط عفشة و كدة ... بعد كدة بقى ممكن تغير الزيت و الفلتر فى أى محطة محترمة مفيش مشكلة

اقتباس:

---

المشاركة الأصلية كتبت بواسطة morasystem

مبروك يا باشا علينا وحش جديد فى منتدى الوحوش كيا سيراتو ... بالنسبة للزيت ... لو هتحط الزيت ال 5000 كيلو يبقى أحسنلك تغير عند 5000 كم و لو هتحط الزيت ال 10000 كيلو يبقى أفضل إنك تغير عند 1500 و ترجع بقى تغير عند ال 10000 و هكذا

بالنسبة للصيانة ... طبعا العربية جديدة ممكن تعمللها الصيانة فى أى مركز صيانة عربيات (تكنو وان - أمير و جوزيف - أى حد يعنى) علشان تربط عفشة و كدة ... بعد كدة بقى ممكن تغير الزيت و الفلتر فى أى محطة محترمة مفيش مشكلة

---

شكرا لك عزيزى على التوضيح

طيب سؤال عربيى كارينز وادخله على 1000 كيلو هل اغير زيت الان ام انتظر شويه ل3000 مثلا

وايه افضل نوع لها شل ولا موبيل

شكر لك

ضمان الخليجي مهم ( والضفيره مبتكدبش )

اقتباس:

---

المشاركة الأصلية كتبت بواسطة dreamgold

شكرا لك عزيزى على التوضيح

طيب سؤال عربيى كارينز وادخله على 1000 كيلو هل اغير زيت الان ام انتظر شويه ل3000 مثلا

وايه افضل نوع لها شل ولا موبيل

شكر لك

---

الصيانة الاولى الفكرة مش زيت وبس لا دى مراجعه كاملة على العربية وتربيط عفشة ومراجعه سوائل وتشيك كامل على العربية من خلال جهاز كشف الاعطال ( مهم جدا ) بلاضافه للزيت لان اللى بيكون موجود فى العربية حاجه كده مؤقتا ومنعرفش كمان بقاله قد ايه .طبعا كيا بتوصى شيل فى عربيتها خليك فى المضمون

اقتباس:

---

المشاركة الأصلية كتبت بواسطة yasso0101

ضمان الخليجي مهم ( والضفيره مبتكدبش )

---

انت بتجيب سيرة ضفيرتى كده وسط الناس وانا اللى داخلتك عربيتى وامنت ليك

لف مبروك على العربيه وربنا يكفيك شرها

اقتباس:

---

المشاركة الأصلية كتبت بواسطة dreamgold

شكرا لك عزيزى على التوضيح

طيب سؤال عربيى كارينز وادخله على 1000 كيلو هل اغير زيت الان ام انتظر شويه ل3000 مثلا

وايه افضل نوع لها شل ولا موبيل

شكر لك

---

و الله أنا لما غيرت غيرت عند 5000 علطول:36_3_10[1]: ... و سألت فى التوكيل قالولى مفيش مشكلة ممكن فى أى وقت معاك لحد 5000 كيلو ... بينى و بينك العربية موتورها لسة جديد و الزيت اللى جاية بيه لسة جديد و حكاية صيانة ال 1500 كيلو دى المفروض ميتغيرش فيها زيت أصلا (بس أهى سبوبة بيكسبوا منها عيش بم إن هم واخدين توكيل زيت شيل فقالك ندخل دى فى دى و نغير زيت بالمرة) إنما أول صيانة مهمة علشان تربيط العفشة و شد فرامل اليد و بس إنما مفيش منها فايدة أكتر من كدة .... بالنسبة لنوع الزيت طبعا طبعا طبعا الشيل أحسن من الموبيل و أغلى من الموبيل (بس كلام فى سرك أنا بحط كالتكس علشان جنب البيت :tongue32:)

الف الف شكر للأهتمام و التواصل معانا و ربنا ما يرميكم في ضيقة أبدا و لا يوقفكم كمين اللهم امين......

المعرض هوه سلطان اللي جنب مؤمن شارع النادي الأهلي (حسن مأمون) مدينة نصر........و مازال عنده 2010 الوان بتنجاني و موكا و نبيتي و بدون بصمة ابيض و اسود.............و الله الموفق للجميع......

الكاوتش اللي ورا اتقطع انهاردة من الجنب علشان حكيت في رصيف أدعولي ينفع يتصلح لأنه أحساس انك تغير فردة كاوتش 17 لسه ما عملتش 1000 كلم احساس صعب اوي فيارب يطلع ممكن يتلحم و خلاص اصله اتقطع من بره بس و لسه مليان يعني الجرح شبه سطحي و ان شاء الله أقوقكم نتيجة الكشف عليه

الحمد لله انها جت في الكاوتش

ياريت لو عندك تليفون المعرض اكون شاكر جدا

الف مبروك يا باشا
ربنا يديك خيرها ويكفيك شرها

أوصيك على مهلك في المطبات المجرمة وربنا يسترها علينا جميعا