الموضوع: نصيحه لوجه الله بخصوص الساجا

اولا الف سلامه علي صاحب الموضوع و ربنا يعوض عليك بس كنت عاوز اقول لحضرتك حاجه بالنسبه للسرعه مستحيل تكون السرعه بتاعت السياره 90 ابدا و حتي لو اتقلبت علي 90 مش هيحصلها كدا ده شكل عربيه كانت مقلوبه فوق ال 140 و بعدين عمر ما العربيه تتقلب 3 مرات و هيه ماشيه علي 90 .

ثانيا بالنسبه للعربيه مش بتعوم خالص انا واحد مجنون جري اساسا و غرز و باخد بيها الغرز علي الطريق علي سرعه 120 و 140 و عمري ما حسيت انوا بتعوم ابدا و اللي مش مصدق كلامي ممكن ينزل معايا و نجرب سوا

الاخ توتو ساجا عيب حضرتك الكلام اللي بيتقال ده احنا هنا مش بندافع عن العربيه علشان لينا مصلحه في حاجه احنا ملناش اي مصالح ابدا انو نشكر فيها انتشرت منتشرتش مش هتفرق معانا انا واحد من الناس اشتريت العربيه و الحمد لله ماشيه معايا تمام و عامل بيها 10 الاف كيلوا واحسن من عربيات تانيه كتير جدا .

قدر الله وماشاء فعل
الحمد لله على سلامتك وسلامة الاسرة الكريمة
وشكرا لحضرتك على نقل التجربة
وده من حقك بكل تاكيد
والمنتدى اساسه نقل التجارب والخبرات الجيدة والسيئة لكى يستفيد الجميع
ربنا يعوضك ويخلفك خيراً فى مصيبتك

المشاركة الأصلية كتبت بواسطة Osama.shihata

قدر الله وماشاء فعل
الحمد لله على سلامتك وسلامة الاسرة الكريمة
وشكرا لحضرتك على نقل التجربة
وده من حقك بكل تاكيد
والمنتدى اساسه نقل التجارب والخبرات الجيدة والسيئة لكى يستفيد الجميع
ربنا يعوضك ويخلفك خيراً فى مصيبتك

+111
الله ينور عليك يااسامه
ربنا يسترها

----

المشاركة الأصلية كتبت بواسطة camel_12

السلام عليكم,
يا جماعه انا بنصح اى حد يفكر يشترى بروتون ساجا , انه يفكر الف مره و لو يقدر يستنى و يزود و يجيب عربيه محترمه يكون احسن.
انا اشتريت بروتون ساجا يوم 26-9-2010 و رخصتها يوم 29-9-2010 و اتقلبت بيها على طريق يوم 15-10-2010 , العربيه اول ما جبتها كنت موهوم بيها من كلام ناس عليها هنا , و عملت صيانة الألف بعد اسبوع و بعدين وانا مسافر على طريق الكريمات يوم 15-10 وكنت ماشى على 90 مثلا ,لقيت مره واحده لمبة الزيت نورت فى التابلوه و بعدين مره واحده الدريكسيون قفش جامد شمال و بعدين العربيه اتقلبت بيا 3 مرات على الطريق و كان معايا مراتى بس الحمد لله ربنا سترها و طلعنا منها سالمين و طبعا لما رحت التوكيل و قلتلهم قالولى اهم حاجه انك طلعت سليم , و عشان اخلص بسرعه من موضوع التأمين قلت ان الكاوتش ضرب عشان العربيه طلعت هلاك كلى وعملوا فى التوكيل مقايسه ب 60000 عشان لو هتتصلح ده بخلاف ما سيظهر بعد الفك.
انا مكنتش هكتب او اتكلم عن موضوع ده بس بعد لما رحت اجيب العربيه واوديها شركة التأمين لقيت عربيتين تانيين فى المخزن اللى فيه العربيات المكهنه.
انا معايا صور العربيه و كل حاجه لو حد عايز يتأكد ويشوف منظرها بعد الحادثه , انا حاسس ان العربيه دى مش امان وان عيوبها اكتر بكتير من المميزات اللى ملهاش لازمه اللى فيها.

بتمنى ان كل واحد معاه العربيه يخلى باله و ربنا يحميه ان شاء الله و يكفيه شرها , واللى بيفكر يجيبها انا بنصحه لوجه الله انه يفكر كتيير.
وبشكر أستاذ / أيمن اللى تعب معايا كتير و مبخلش عليا بأى رد لأى سؤال.
نصيحه أخيره : محدش يتعامل مع البنك التجارى الدولى(cib) و شركة آروب للتأمين لإن الاتنين تعبونى قوى و اجرائاتهم مش واضحه و متناقضه مع بعض.

وشكرا لكم جميعا.

أولاً وقبل كل شيء.. الحمد لله على سلامتك وسلامة أهلك...
ثانياً.. أنا فعلا كنت ناوي أسألك عن لمبة الموتور اللي نورت و هي فضلت منورة لمدة قد ايه قبل الحادثة؟؟
3- يعني ايه : (وكنت ماشى على 90 مثلا ) ؟؟؟؟
4- هل انت متأكد فعلا ان الكاوتش مضربش؟؟ لأن الكاوتش الأمامي لما بيضرب فعلا الدركسيون بيحدف و يقفش ناحيته... وهل توصل أي أحد لسبب الحادث؟؟ يعني لنكون محددين فنقول مثلاً: الساجا فيها عيب دركسيون أو عيب فرامل أو عيب موتور... كده يعني.. وطبعاً ده محدش يقدر يفيدنا بيه غير حضرتك...
5- أنا مقدر تماما شعورك وعاذرك لو قفشت من الساجا.. بل لو قفشت على السيارات الآسيوية كلها محدش حيلومك لأنك تقفل منها..
6- بعيداً عن الانفعال:
-محدش هنا ليه مصلحة يدافع أو يهاجم... و المنتدى أكبر بكتير من الساجا اللي هي موديل جديد من موديلات ماركة من عشرات الماركات اللي في المنتدى... تفتكر نايل موتورز ايه مصلحتها تخبي على عيوب الساجا؟؟
- لو ثبت ان الساجا سيارة سيئة فلن تجد الزملاء بيدافعوا عنها... حتلاقيهم بيشتموا فيها زي ماركات تانية...
- لا أعتقد ان الموضوع وصل لدرجة التريقة أو التكذيب ... وان كنت أعترض على اسلوب بعض الزملاء...

7- ممكن نسأل أنفسنا الأسئلة دي و نحكم بعدها على السيارة:
أ- هل تتوقع من الساجا أعلى أداء ممكن؟؟
ب- هل خروجك من السيارة انت وأهلك بخير يحتسب لصالح السيارة أم لا؟؟
ج- هل حدوث حادث لعيب فني -لو سلمنا بذلك- لسيارة أو ثلاثة أو عشرة يعني أن الماركة سيئة؟؟
وللتوضيح: -هل الماركات المتفق على انها ممتازة لا تحدث بها حوادث لأسباب فنية أبداً؟؟
-هل نحكم على تويوتا بأنها سيئة للحوادث التي وقعت بسبب تعليق دواسة البنزين؟؟
-هل نحكم على شركة بوينج للطائرات أنها غير آمنة بعد انفجار عشرات الطائرات البوينج لأسباب فنية وموت المئات؟؟

الخلاصة:
الهدف الوحيد لي شخصياً -وأظن لمعظم الزملاء داخل وخارج بروتون- هو الحفاظ على صورة واقعية الى أكبر حد ممكن عن أي سيارة في المنتدى لكي يحصل المتصفح على صورة كاملة و حقيقية الى أكبر حد ممكن عن السيارة التي يسأل عنها!!.. وهذا يتطلب عمل توازن بين الهجوم و المدح... لو وجدت توبيك يرفع الجين2 للسما و يصورها على انها أحسن سيارة فستجد ردود ترد الموضوع الى أرض الواقع وتذكر العيوب بموضوعية و حيادية... وأنا عن نفسي لم أقبل من صديق عزيز أن يقارن بروتون بالألماني في فورة حماسة فرددت عليه وأوضحت ان الألماني ألماني برضه وهو نفسه تراجع ووضح قصده...
القصد: لا تتوقع من أعضاء المنتدى و ملاك السيارة أن يلغوا عقولهم ويحجروا على آرائهم و تنحصر ردودهم في لعن السيارة ووصفها بأنها سيئة و يحذروا الناس منها ويصوروها على انها سيارة من عاداتها السيئة أن تنقلب 3 مرات على سرعة 90 وبدون أي سبب سوى أن مزاجها كده!!!
أقدر انفعالك... وأشكرك بصدق على نقل تجربتك للمساهمة في تكوين صورة حقيقية متكاملة عن السيارة... لكن لا تحاول حمل الآخيرين على اعتناق رأيك بغض النظر عن تجاربهم مع السيارة...
شكراً لك و للجميع
وأسأل الله أن يحفظنا جميعاً من الحوادث و السوء....

.