تريد اثبات فاميه على الرخصة؟ تريد رخصة قيادة بدون اختبار؟ !!!!

**city_ct** · 24-01-2011 02:01 PM

بالطبع كل من يقرأ عنوان هذا الموضوع سيعتقد أننى أعلن عن تقديم هذه الخدمات.... بالطبع لا...

الحكاية أننى كنت أجدد رخصة السيارة و أغيير اللوحات المعدنية للنظام الجديد، و أثناء قيام الشخص المتمرس على تركيب اللوحات دار الحوار الآتى أما مرور مدينة نصر (ميدان رابعة العدوية):

العامل: لو عايز تثيت فاميه على الرخصة قانونى، احنا بنعمله ب 1000 جنيه، و لو عايز رخصة سواقة بنسبة 90% من غير اختبار بنطلعها ب 800 جنيه و ده من أى مرور فى القاهرة و ممكن الجيزة.

أنا: أزاى يعنى الفاميه قانونى؟

العامل: آه نثبته على الرخصة فابريكه و روح ركب الفاميه إللى انت عايزه بعد كده ،و لو حد وقفك طلعله الرخصة و هيشوفه مثبوت فى الرخصة و مش هيتكلم معاك.

أنا: و بالنسبة للرخصة، يعنى أيه 90% ده،و ال10% ايه نظامهم

العامل: ال10% دول لو كان حد واقف بيراقب أو فى تفتيش يومها، يعنى ساعتها هتركب العربية و تنزل على طول أو آخرها تركن بس.

أنا: طيب يا سيدى... شكرا.

يا سادة الموضوع خربان تماما، تجارة الممنوع واضح انها رائجة و قرشها كثير، و الراجل مجتهد و يعلن و يروج فى الغالب لكل زبون يأتيه. هو طبعا لا يبيع مخدرات أو أى مصيبة أخرى. هذا بالنسبة للملاكى فما بالنا برخص الدرجو الأولى و الثانية، نفس النظام....

المشكلة أن فى أخبار أمس، خبر بانزعاج الرئيس من كثرة حوادث الطرق و كثرة ضحاياها و أنه كلف وزير النقل باعداد خطة لتقليص الحوادث.

بالطبع وزير النقل عليه دور كبير و لكن أين دور رجال المرور و الداخلية و الرقانة عليهم و المجلس سيد قراره. فمن الأساس اختبارات استخراج رخص القيادة فى مصر عقيمة و لا تصلح للحكم على فهم و ادراك المتقدم للامتحان لقواعد القيادة السليمة، فما بالكم و استخراج الرخصة بدون امتحان. يمكن يكون الفرق ضئيل فالامتحان لا يصلح للتقييم و يقدم الرخصة لمن لا يستحق أصلا و كذلك عدمه.

مصر ام الدنيا....... لو فيها ضمير.

**Salamonti** · 26-01-2011 06:24 AM

فعلا انا اتعرض عليا حوار الألف جنيه ده أكتر من مرة
مع اني مفيم العربية لكن رفضت اعمله بصراحه
دنا أساسا مابدفعش ألف جنيه مخالفات عالفاميه !!

ومع العلم اني مش عامل فاميه غامق
يدوب أول درجة مدي شياكة للعربية فقط لا غير
90% من اللجان اللي باعدي منها محدش بياخد باله منه أساسا

وكتير اقف على مخالفة حزام أو موبايل وماياخدوش بالهم من الفاميه !!
ومرة اتسحبت رخصة العربية أمن ومتانة عشان كان الإزاز الأمامي مشروخ وغيرته ورحت فحصت بالفاميه وعدت

اللهم وانا طالع م المرور لقيت العسكري اللي عالبوابة بيقوللي انا شايفك فحصت والعربية مفيمة
رحت اديته خمسة جنيه وقلتله خليها في سرك وماتقولشي لحد ههههههههههههههههه

**akma** · 09-02-2011 12:58 PM

دي تبقي جامده جدا ياجماعه انا عاوز اروح اثبت الافاميه علي الرخصه ازاي؟؟

**michohat** · 10-02-2011 03:50 PM

يا تري ينفع فى الايام دي الواحد يروح يثبت اللى عاوز يثبته و هما رايقيين كده و ممكن يعدوها؟

**Dr_ahmedrady** · 10-02-2011 07:02 PM

هههههههههه
عندنا ف قنا الموضع ده رخيص جدا جدا جدا لا وايه قانونى؟؟ مش نصب ولا حاجة

السنة اللى فاتت قولت اعمل رخصة
الراجل قالى قدم ف حاجة اسمها دورة تنشيطية ب 400 جنيه
ودى مش هتعمل فيها ولا حاجةهتيجى بعد 15 يوم

قعدت اذاكر و اتمرن واتدرب
وروحت يومها بقى
لقيت شهادة نجاح ف اختبار الكمبيوتر بنسبة93%
وكل الورق خلصان
قعد ظابط تحت الشمسية
و عسكرى ف عربيتهم
وكل واحد يركب بالدور

قسمونا مجموعتين
كل واحد من المجموعة الاولى تركب و تنفذ كلام العسكرى
وتطلع بالعربية لقدام 10 متر

و واحد من المجموعة التانية يركب و يرجع بالعربية لورا تانى 10 متر

انا كان حظى فاللى بيرجعو لورا

ركبت
العسكرى : ازيك يا ضكطور
انا : تمام الحمد لله
العسكرى : عاوزك تنفذ كل اللى هنقوله
انا : تمام
العسكرى : دوس دبرياش على الشمال اخر واحد
و أخدلى هو الغيار الاول ، قاللى بشويش ارفع دبرياش و زود بنزين

بما ان العربية مطحونة و مفهاش ار بى ام و كمان من صوت الموتور اللى هالك العربية
فانا مكنتش عارف هى خدت بنزين ولا لسه؟؟

فسالته : كده تمام ؟؟
قالى : اه سيب الدبرياش بشويش

بس مشيت ال 10 متر
وقالى بس كدة دوس فرامل
وقفت و نزلت
وقالولى تعالى استلم الرخصة بعد 10 ايام

شوفتو الرخصة بسيطة ازاى؟؟؟