الموضوع: فكرة بنتين عن ازاى العربية بتحود

من كام يوم كان عندنا اجتماع بره الشركة .. أنا و اتنين مهندسين و مهندسة معانا فى الشركة.

المهم ركبنا عربية الشركة مع السواق و رحنا الاجتماع و رجعنا على الشركة تانى و السواق دخل الباركينج عشان يركن .. وهو بيركن بضهره بين عربيتين ..قامت البنت اللى معانا قالت أنا مبعرفش أبدا اركن بضهر العربية كده .. دى صعبة جدا .. أنا دايما بركن بوشى.

فواحد من المهندسين قالها بالعكس دى أحسن بكتير و بتخليكى تتحكمى فى العربية أحسن و ممكن أثبت لك .. قالت له ازاى؟ شرح لها انك لما بترجعى بضهر العربية معظم جسم العربية بيكون قدام العجل اللى بيحود فبتتحكمى فيها أكتر من لما تكونى ماشيه لقدام و جزء بسيط من العربية هو اللى قدام فمبتقدريش تتحكمى فى الجزء الخلفى بسهولة.

المهم البنت سكتت كده و قالت له ما هى هى .. قال لها هى هى ازاى يعنى؟ قالت له ماهو العجل ده بيحود و ده بيحود .. قال لها هو انتى لما بتحودى بالعربية انهى عجل اللى بيحود اللى قدام ولا اللى ورا .. قالت له الاتنين اللى قدام و اللى ورا بيحودوا .. طبعا مش عاوز أقول لكم كمية الضحك اللى ضحكناه .. مع العلم ان البنت دى بتسوق من خمس سنين على الأقل من ساعة ما جت الشركة.

لسه التقيل الجاى

واحد زميلنا مقدرش يسكت قام لما روح قال اما يحكى لمراته على الموقف .. فبيقول لها دى فلانه كانت فاكره ان عجل العربية اللى ورا و اللى قدام بيحودوا .. واضح ان مراتة ما فهمتش ايه المشكلة فى الموضوع وواضح انه لاحظ الموضوع ده فسألها .. هو انتى لما بتحودى بالعربية انهى عجل اللى بيحود ..قالت له لما بحود يمين العجله اللى قدام و ورا يمين بيحودوا و لما بحود شمال العجلة اللى قدام وورا شمال بيحودوا .. هو مقلناش كان در فعله ايه بصراحه .

يا ترى بقية البنات عارفين العربية بتحود ازاى؟ (مش عارف ليه حاسس ان حد هيقول العجل اللى ورا بس هو اللى بيحود )

كتير جدا من البنات..معندهمش خلفيه عن السواقه غير بنزين وفرامل و دبرياش و الدركسيون..
أما الجوانب الأخرى من عمليه السواقه اللي المفروض إنهم يكونوا ملمين بيها ..ملهومش دعوه بيها خالص....
على الرغم من إنها حاجات لازم يكونوا على إطلاع بيها..