حادث الكنيسه سببه تنظيم الجيش الأسلامى + وقفة سلميه يوم الثلاثاء
يا رب الموضوع يعجبكم و قولولى ينفع أشتغل صحفى باللغه العاميه ولا لأ ههههههههههههه
بعد هدوء الجو تماما و الأرتياح النفسى لمعرفه مرتكب الحادث و أسمه أحمد لطفى إبراهيم محمد من مواليد 1984 المتورط مع تنظيم جيش الإسلام الفلسطينى بغزة و المرتبط بتنظيم القاعدة (حسبى الله و نعم الوكيل) بس أنا لحد دلوقتى مش فاهم ليه بعض الشخصيات فى فلسطين على أصرار تام بقتل المصريين و الفتنه بينهم يعنى شوف كام واحد على معبر رفح يموت بسبب طلقات فلسطينيه !! على فكرة دا مش ياسر فريج فقط دا قبله حوالى 100 ظابط و عسكرى ميتين مش على طلقات أسرائيليه لأ للأسف دى بطلقات فلسطينيه ! طيب مصر لما بتتعطل فى حاجة فلسطين بتتعامل معامله (شهر العسل) يعنى خد عندك موضوع مصر و الجزائر شوف أسرائيل عملت كام مستوطنه و شوف برضة فى أيام حادثة كنيسه القديسيين الغارات الجوية على غزة و غيرها و غيرها و غيرها يعنى مصلحتة فلسطين فى أعتدال الأحوال السياسية عندنا فى مصر و برضة مش هقول دا كل الشعب الفلسطينى لأ الشعب الفلسطينى كله بيحب المصريين و على عينا و على راسنا لكن إلى بيتعملهم غسيل مخ لازم يشوفوا الدفاع عنهم خيانه لأنهم من الطبيعى ناس خاينه لبلدها , معلش دا كان رأيى و أسف لو طولت عليكم
طيب دلوقتى فى سيدى بشر ليه فيه عساكر أمن مركزى و ظباط بالهبل و معاهم قنابل غاز رغم إنهم كانوا بدأوا يقلوا !!
لأن يوم الثلاثاء إن شاء الله مظاهره مفتوحه المفروض تكون بأحترام و يفضل أن تكون صامته للشهيد خالد محمد سعيد و مش عايزين الدول التانيه تشمت فينا و تقول علينا همج و الناس تكون هاديه و محترمة من غير أى أعمال تخريب لأن البلد مش مستحمله أى حركة هبله و إلى يعمل أعمال تخريب و يكون جمبك بلغ عنه عشان نبقى محترمين بقى و لو مرة واحدة و نعرف يعنى أيه مظاهرة صامته أو أحتجاج بنظام (مع العلم بلاش المظاهرات فى الشوارع العموميه و لو أتعملت فى شارع عمومى يا ريت يكون فيه نظام عشان مرور السيارات) أو يتعمل كردون للمظاهرة من الأمن المركزى و دا بيحصل كتير لما العمليه بتكون هاديه لكن لو العمليه فيها تخريب هيكون تصرف الأمن المركزى اسوأ من مظاهرات المحله يوم 6 أبريل
اللهم بلغت
اللهم فأشهد