الموضوع: باقي 4 أيام و أقدم استقالتي ..... أخيرا همشي خلاص

بعد 5 سنوات من التعب و العمل في مصنع الشركة اللي دخلته و هوه أرض صحرا , النهاردة مصنع من أهم المصانع في مصر و بينتج 15 ألف طن كربونات كالسيوم شهريا , كنت تاني فرد يتعين في الشركة و النهاردة موجود 245 فرد من محاسبين , اداريين , مهندسين , فنيين , عمال , أمن , و ناس تانية كتير ...
و خلال هذه المدة جائت 4 ادارات مصرية و الخامسة أجنبية ( اتنين مديرين انجليز ) قال يعني احنا معندناش ناس خبرات تقدر تدير الشركة , أرزاق بقى تقول ايه ....
خلال هذه الفترة شفت ناس كتير منافقين أو أفاقين بيترقوا و يعلوا على أكتاف زملائهم , و شفت ناس بتتعب و تشتغل و تاخد جزاءات بدون أسباب واضحة , و أنا واحد من الناس اللي كانت لباقتهم و حسن تصرفهم بترحمهم من الجزاءات و لكن أنا الوحيد من المهندسين الكبار اللي بيبات في المصنع أو تتلغي أجازاته بدون سبب واضح ( غلاسة و عشان أزهق ) لكن الحمدلله بالهدوء و الورق و المستندات قدرت أحمي نفسي طول الفترة الماضية , و طبعا تم رفض أي ترقية أو زيادة محترمة في مرتبي لأني كنت بدافع عن العمال و الفنيين و دايما غي صفهم و بطلب بدور قوي للأمن الصناعي و توفير كمامات و لبن طبيعي للعمال و ده طبعا هيكلف الشركة لكن لو العامل مات مش هيكلفنا حاجة .....

ربنا وفقني من 3 شهور و قابلت رجل أعمال محترم و عنده 3 مصانع كبار و درسنا صناعة الكربونات و عملنا ليها دراسة تسويقية و حددنا المعدات و أماكن شرائها و أخدنا الأرض و بنينا المصنع و بدئنا تركيب المعدات , و ان شاء الله من أول يوم في فبراير هبدأ العمل في المصنع الجديد ...

و ربنا عوضني عن صبري خير و الادارة الجديدة وافقت على مرتب يعادل 5 أضعاف مرتبي الحالي و كمان واغفوا على الحد الأدنى اللي اقترحته للعمال و الغنيين و على كل طلبات الأمن الصناعي .....

الى كل مهندس اتقي الله في العمال و الفنيين اللي تحت ادارتك و حاول تكون عادل معاهم لأن الناس انت اللي هتتحاسب عليهم يوم القيامة مش الادارة اللي انت بتوفر لها من قوت الناس الغلابة ....

الى كل مدير لازم تملى مكانك و تكون فاهم انت بتشتغل في ايه و أهم حاجة تسمع لآراء المهندسين الموجودين و الا يروحوا و لا يدوروا على شغل في حتة تانية و اقعد انت على تلها لما تخربها ...

باقي 4 أيام مش عارف هيعدوا عليا ازاي بس خلاص فاض بيا و جبت آخري و الراجل المختلف اللي جايبينه مدير مصنع مركز معايا زي ما يكون أنا سبب مشاكل العالم كله , أول ما يدخل الصبح يسأل أنا جيت الوردية و عملت ايه و هل فيه أعطال كهربا و خدت وقت قد ايه و باقي كام يوم في رصيد أجازاته و خد كام يوم راحة و ليه مش بياخد ورادي زياة ......... ده احنا 6 مهندسين كهربا أنا أكبر واحد فيهم و المدير المباشر ليا أصغر مني و أنا و هوه أصحاب و الدنيا حلوة بينا و ده طبعا مزعل الزبون ...

الحمدلله باقي 4 أيام و أمشي ....... عقبال كل واحد عنده حمار غبي متخلف جاهل أحمق مش فاهم حاجة و اصبر على جار السو يرحل أو تجيله مصيبة تشيله .............

ما شاء الله عليك . موفق ان شاء الله