هــل فرامــل بيــجو 405 برستيـــج ضعيــفة؟

السلام عليكم أهل البيجو الكرام ....

أنا عندى احساس غريب ان فرامل العربية ضعيفة شوية
يعنى احنا كان معانا الأول فيات 128 و أما جبنا البيجو توقعت انى اول ما اسوقها
وأدوس فرامل هتأفش منى جامد لغاية ما اتعود عليها
بس دا محصلش....تقريبا نفس مشوار بدال الفرامل فى الاتنين

اللى انا قصدى عليه انى حاسس ان الدواسة عميقة شوية بالمقارنة بالعربيات التانية

أنا مجربتش افرمل بيها على سرعة عليا

اللى خلانى أتكلم فى الموضوع ده انه امبارح كنت ماشى اسفلت بسي بيبقى عليه تراب او رمل
اللى هو لونهبيبقى فاتح اوى و كنت على التانى عادى فى نص الغيار
واللى قدامى مسك فرامل فجأه
وجيت انا كمان امسك فرامل العجل وقف بس راحت متزحلقة على الاسفلت و لمست اكصدام اللى قدامى

فكده طبيعى و لا ايه

انا بفكر اطلع بيها فى حته فاضيه و اجيب بيها 100كم/س
و امسك فرامل على الاخر
وأشوف ايه نظامها.............

ولا رأيكم ايه

معلش طولت عليكم....

كيمو حبيب قلبى

اولا ..ماتقارنش الفرامل بتاعتك بعربيات تانيه عشان البرستيج فيها حاجتين
1-الباور ستييرينج...اتقل من عربيات كتيييييييير
2- الفرامل اضعف شويه من عربيات كتيييييييييييييييييير
.................................................. .................
حكاية الزحلقه دى غالبا هتكون كاوتش...
وبالنسبه ان الدواسه عميقه او طريه معاك...فادا فى البيجو عامتا اللى من غير Abs
انت بس عود نفسك على دوسه اقوى شويه من الطبيعى
اما لو طريه زياده عن اللزوم
فانا عايزك تشيك على الآتى
ماستر عمومى
زيت الفرامل
مواسير الزيت..وعد وجود تنفيث
خلى الميكانيكى ياخدلك هوا.....
وشكرا
وياريت اى سندوتش عا الماشى :D

flying باشا............

مش هشكرك بأه على الرد....مش هيكفى اللى بتعمله معانا بصراحة


أنا فعلا الكاوتش عندى خلاص عايز يتغير....


على فكرة فعلا الباور تقيل بس ده ايه علاقته بالفرامل

سؤال تانى بأه ....
ايه احسن كاوتش ممكن أجيبه



ساندوتش بس.........
لا ياعم الغداء كله عندى
انت تامر يازعيم..

الكلام ده عادي ياكريم وذي مابيقول هاني باشا ممكن يكون عندك تنفيس في دورة زيت الفرامل.... وانا عندي المسافة بتاعت الدواسة طويلة شوية يعني لازم ادوس جامد علشان تقف بس بتقف حلو قوي وفراملها الي حد ما كويسة(وده احسن لما الفرامل تكون حساسة قوي علشان متقفشي منك وتقف فجاه والورا يلبس فيك)- ومتهيألي المسافة العميقة دي ممكن تتظبط ذي مانتا عايز- وكمان انا لسة مغير تيل الفرامل الاصلي وسئالت المهندس صلاح بيجو فقالي هي كده وجرب دوس جامد وحتالهياه تقفش وفعلا بتقف جامد.... فمتئلائشي... بس كون العربية تزحلق شوية علي بعد الفراملة فده مش طبيعي ويمكن تكون الكوتشات وحشة... وهي لمبة تأكل تيل الفرامل نورت ولا لا؟؟؟ لو نورت يبقي حتغير تيل قريب واعمل حسابك في 285 جنية تمن التيل

لا يا حودة منورتش لسه0000
ويارب ما تنور


وشكرا يا باشا على ردك

انا متفق معاكو تماما في ثقل الباور .. بش الفرامل انا مش شايف انها ضعيفه بالمقارنه ب 1600 سي سي 405 ،بالعكس احسن منها..
ونصيحتي انك لازم تروح لواحد بتاع فرامل ..هيظبطها احسن من اي ميكانيكي ..وعلى فكره المهنس محمد صلاح فضلت رايح جاي عليه فتره طويله علشان الفرامل ..وميكانيكي تاني في الحرفيين اسمه صالح ... وماحدش ظبطها الا واحد بتاع فرامل في الزاويه الحمرا اسمه محمد البلبيسي وكانت المشكله في المساتر الخلفيه ، وقال لي ان فيه ماستر ورا بيغير قوة الفرامل حسب الوزن وكان ملغي... وعلى فكره التيل الخلفي الاصلي للبرستيج ب 300جنيه --- المهندس محمد صلاح هوه اللي نصحني اروح لواحد بتاع فرامل ---

والله انا عندي نفس المشكلة برضوه
انا كان معايا دوجان و كانت مسافة الدواسة طويلة وجبت بعدها لانسر قلت بقى لازم اتعود على الفرامل بتاعتها حتبقى حساسة قوي بس في الواقع طلع مفيش فرق كبير بينها وبين الشاهين من حيث المسافة
بس طبعا فيه فرق في قوة الفرملة يعني لو دست الدواسة للآخر بتمسك جامد
طبعا حكاية المسافة بتاعت بدال الفرامل غلبت فيها و ما لهاش حل هي العربية كده ومدام فراملها لما ادوس على الآخر بتفرمل كويس يبقى كده الحمد لله

شكرا جزيلا تامر باشا
بس ممكن حضرتك تقولى فين بالضبط الراجل ده فى الزاوية الحمراء
عشان انا قرايبى هناك و اعرف المنطقة هناك كويس


أ.NO body
شكرا جزيلا لكلام حضرتك

اقتباس:

---

المشاركة الأصلية كتبت بواسطة kareem_Ashmawy

شكرا جزيلا تامر باشا
بس ممكن حضرتك تقولى فين بالضبط الراجل ده فى الزاوية الحمراء
عشان انا قرايبى هناك و اعرف المنطقة هناك كويس


أ.NO body
شكرا جزيلا لكلام حضرتك

---

ياباشا لا شكر على واجب وانا تحت امرك ..
انا بصراحه مش عارف المنطقه اوي بس هاوصفهولك ..
هوه في وسط مساكن .. وقريب من موقف اوتوبيسات الزاويه..وانت واقف عنده بتبقى شايف كبري الزاويه بالعرض ( اللي بيوديك على الساحل )
انا كنت بامشي في شارع سكة الوايلي على طول واقطع شارع بورسعيد وافضل ماشي لغاية ما ييجي مطلع كبري الزاويه (اللي بيودي على الساحل ) ما اطلعش الكبري واخش من قبليه يمين في شمال في شمال .. هتلاقي الكبري قدامك بالعرض ( ولو كملت على طول ولفيت من تحته شمال هاترجع مكان ماكنت بس في الاتجاه المعاكس ) قبل ما توصل الكبري هتلاقيه على شمالك وقدامه جامع ....بس دلوقتي هما عاملين تعديلات في الاتجاهات علشان الكبري الجديد اللي بيعملوه هناك ..
عموما هوه مشهور هناك وان شاء الله تعرف توصلله على طول حتى لو سألت اي حد هناك ( محمد البلبيسي ) ..ولو عايزني اروح معاك انا تحت امرك --انا ساكن قريب في السواح جنب الروماني بتاع الجنوط--

شوف يا باشا
فرامل ال 405 العاديه ممتازه
المفروض البرستيج أحسن
المهم
الفرامل الخلفيه نظامها ايه هل تعمل على نظام الطبله (علبه فرامل مقفله ) ولا طنابير سكينه زى الأماميه ؟
لو طبله
ما هو مشوار فرامل اليد (كم عد التكات )؟
لو المشوار طويل (أكتر من 5 تكات ) خلى الميكانيكى يعمل لك ريجلاش على التيل الخلفى
برضه بص على العربيه من تحت على العجل من الداخل وشوف هل فيه تسرب زيت فرامل ولا لأ
لا حظ مستوى زيت الفرامل فى الخزنه ويستحسن تغييره بزيت ( dot 4 )

وبرضه راجع على التيل
وأنا متأكد إن هى مشكله ريجلاش أو تسرب زيت لا أكثر
جرب وبلغنا بالنتيجه

اقتباس:

---

المشاركة الأصلية كتبت بواسطة محمد ابراهيم 1

شوف يا باشا
فرامل ال 405 العاديه ممتازه
المفروض البرستيج أحسن
المهم
الفرامل الخلفيه نظامها ايه هل تعمل على نظام الطبله (علبه فرامل مقفله ) ولا طنابير سكينه زى الأماميه ؟
لو طبله
ما هو مشوار فرامل اليد (كم عد التكات )؟
لو المشوار طويل (أكتر من 5 تكات ) خلى الميكانيكى يعمل لك ريجلاش على التيل الخلفى
برضه بص على العربيه من تحت على العجل من الداخل وشوف هل فيه تسرب زيت فرامل ولا لأ
لا حظ مستوى زيت الفرامل فى الخزنه ويستحسن تغييره بزيت ( dot 4 )

وبرضه راجع على التيل
وأنا متأكد إن هى مشكله ريجلاش أو تسرب زيت لا أكثر
جرب وبلغنا بالنتيجه

---

البرستيج فراملها اللي ورا سكينه زي اللي قدام.

شكرا يا جماعة على الردود الجامدة دى

ان شاء الله هشوف الموضوع ده و أبلغكم بالنتيجة

موضوع جميل


شكرا على الموضوع والايضاح

انت عملت ايه صحيح فيها يا كريم اتعودت عليها انا الفرامل عندي انقزتني كتير جدا و فراملها محترمه جدا

ممكن السرفو مش متظبط

مفيش حاجه اسمها فرامل ضعيفة وخصوصا فى العربيات البيجو
أكيد العيب فى العربيه بتاعتك
راجع على جميع أدوات الفرامل
وممكن يكون الكاوتش عندك قديم

ممكن سؤال رفيع من واحد لسه جديد خالص في العربيات ..

أنا أسمع عن نظام الفرامل abs وفهمت طريقة عمله .. واقتنعت بفكرته جداً ..

وحيث أني بأفكر بشكل جاد أني أشتري 405 وسمعت عن إنها بدون abs

فهل كل ممكن اركب نظام abs لعربية مفيهاش إيه بي اس أصلاً؟؟

وشكراً