شكر واجب لمركز صيانة السبع
الحمد لله ربنا قدر اني اعمل حادثة بسيطة النهاردة
علي طريق شيراتون عند منزل كوبري المطار و ملف اليوتيرن قبل ما اوصل شيراتون علي طول و كان معايا زوجتي و بناتي و ماشي بسرعة متوسطة 70 كم في الحارة الوسطي في الملف عشان عارف ان اليوتيرن جاي شمال
واحد بعربية سيراتو فاكر نفسه احسن من كل اللي سايقين بسرعة معقولة و عاوز يجري شمال و في الملف لقي اللي امامه وقف عشان اليوتير شمال و علي الرغم من ان المسافة كافية جدا لأنه يتوقف لكن البيه بتاع السيراتو زود سرعته و انا جنبه و رمي عليا بطريقة خطير اضطريت معاها افرمل عشان فيه عربية علي يميني كمان و برضه ممسكتش فرامل جامد عشان اللي ورايا
لكن و الحمد لله كان ورايا لانسر بيجري و واضح مكنش باصص و مداسش فرامل بدري فدخل في عربيتي من الناحية اليمين ورا و طبعا بتاع السيراتو طار كانه معملش حاجة و حظه ان الأكصدام الخلفي عندي اتحشر في العجلة اليمين عشان مجريش وراه البسه في عربية نقل ولا رصيف ( اللهم اخزيك يا شيطان ساعة الغضب )
طبعا ركنت بالعربية و لكن اللي ضايقني ان بتاع اللانسر ( محصلوش حاجة ) و هوه اللي خابطني من ورا كمان وقف و بيعاتبني اني بفرمل في طريق سريع و برضه حظه ان معاه مراته وولاده رديت عليه بأدب انه يمشي لأنه واضح انه ميعرفش ابسط قواعد المرور انه يسيب مسافة معينة مع اللي امامه
ما علينا
المهم ربنا الهمني رحت واخد الدايري ورايح علي السبع ( بعد ما طلعت الأكصدام بالعافية من الكاوتش )
و هناك لقيت ناس في منتهي الأحترام ( اذكر منهم مهندس غالي و مهندس أيمن و مهندس السمكرة بس نسيت اسمه )
علي الرغم أن الساعة كانت عدت 3 بشوية لكن استلمو العربية و كان المفروض يشتغلو فيها بكرة بس لما قلتلهم مش حقدر أجي بكرة قال المهندس أيمن من نفسه يبقي نشتغل فيها دلوقت و ربنا يسهل تاخدها معاك
و فعلا العربية دخلت و أتعملت و الأكصدام رجع زي ما كان بالضبط و اتغيرت الكارتيرة الداخلية الصغيرة كمان و أخدت العربية بعد 45 دقيقة تقريبا + عملو جزء سمكرة بسيط في السريع عشان الأكصدام يركب مضبوط
و التكلفة كانت 150 جنيه فك و تركيب أكصدام + الكارتيرة الداخلية 50 جنيه + شوية الكلبسات و حامل الأكصدام مع المصنعية
و العربية رجعت كأن مفيش حاجة حصلت و الحمد لله
حتي لو العربية كانت تتكلف 50 جنيه بس برة فأنا مبسوط من سرعة الأصلاح و كمان دقته ( أدي العيش لخبازه )
كنت حروح لسمكري يخرم العربية بمسمار ولا أدور علي الكارتيرة اللي ورا و كمان أقعد جنب السمكري في الشارع و أراضيه عشان ميعكش العربية و ممكن و هوه بيفك العربية يبوظ الأكصدام و هوه بيخلعه