الموضوع: واخيرا غيرت الضفيرة

المشاركة الأصلية كتبت بواسطة ahmedya1976

الحمد لله غيرت ضفيرة الكهربا ومش مرة واحده دول مرتين يعني ضفيرتين وحبيت انقل تجربتي للاستفاده.
انا كان ليا مشاركه قبل كده حكيت فيها عن مشكلتيhttp://www.nilemotors.net/nile/190161-rpm.html
المهم بعد رجع العيب تاني وعداد الاربي ام بيعلي كتير لغايه 2 وماينزلش الا لما اطفي العربيه واشغلها تاني , روحت السبع تاني وشافوا العربيه وقالوا لازم تغير الضفيرة بس لالاسف ماكنش فيه ضفاير مانيول وقالولي هنتصل عليك لما تيجي الضفاير المانيول وهياخد الموضوع ده حوالي شهر.
وبعد حوالي 35 يوم اتصلوا عليا وقالوا الضفيره موجوده وحددت ميعاد علشان اروح اغيرها.
روحت ميعاد الصيانه والموضوع خد حوالي 4 ساعات علشان كان فيه زحمه لانه كان يوم سبت واستلمت العربيه وكان كله تمام وبعدين خدت طريق الرجوع بتاعي وعند مدخل نفق العبور فجأه لقيت لمبه check engine نورت ومش هاحكيلكوا بقي كميه الاحباط اللي حصلتلي خصوصا علشان ليا تجارب مؤلمه قبل كده في عربيات تانيه .
المهم ركنت علي جنب وعلطول كلمت مركز مهندس غالي في السبع وحكيتلوا علي اللي حصل قالي انوا في مشكله في ضفيره الكهربه مع حساس الاكسجين ولازم الضفيره الجديده تتغير تاني وكان الوقت متاخر اضطريت اروح وانا حاطط ايدي علي قلبي طول الطريق خصوصا ان اللمبه دي منظرها مرعب بصراحه وهي منورة علطول خصوصا ان مشواري طويل.
تاني يوم كلمتهم وقالولي احنا طالبنا ضفيره تانيه من المصنع وهتيجي بكره . حددت معاد علي تاني يوم ورحت علي ميعادي واستلموا العربيه تاني وبعد حوالي 2 ونص استلمت العربيه علشان ماكنش فيه زحمه وقالولي لو فيه اي مشكله ظهرت تاني بلغنا.
والحمدلله روحت وانا عيني علي لمبه الانجين وانا خايف مووت انها تنور تاني بس الحمد لله الامور مشيت سليمه وحسيت فعلا ان العربيه احسن من الاول كتير وصوتها اهدي عن الاول كتير .
واخيرا عندي ملاحظتين : اولا متشكر جدا لصيانه السبع علي الاهتمام الكبير اللي الواحد بيلاقيه هناك
ثانيا اتمني من كل قلبي ان نيسان تشوف حل لمشكله الضفيره دي علشان حرام ان العربيه تتظلم اوي بسبب مشكله متكررة وانا شايف ان حلها سهل جدا باستيرادها من اليابان .وشكرا لكل اعضاء نايل موتورز علي نصايحهم لبعض

هاهاهاهاها
ظهر الحق و زهق الباطل ان الباطل كان زهوقا
اخى الكريم
انت من الناس المحترمين اللى يستاهلو ان الواحد يرد عليهم
كان الله فى عونك
و ربنا يباركلك فى العربية

الله يبارك فيكوا وفعلا الحمد لله علي توكيل نيسان المحترم اللي مخلي الواحد ممكن يصبر علي اي عيب ممكن يظهر في العربيه اللي انا شايفها في المجمل ممتازه والحمد الله

الف مبروك عليك حل مشكلتك
فعلا طالما فيه مشكلة فى الضفيرة او اى حاجة فى العربية التوكيل عمرة ما حيرفضها او حينكر ان فيه مشكلة موجودة لانه توكيل محترم والكلام دا انا بقولة عن تجربة
المهم يبقى فيه مشكله
واعتقد لو نسبة الشكوى من الضفيرة خارج الحدود المسموح بها اعتقد ان نيسان حتعمل حاجة من اتنين
يحتغير المصنع اللى بيورد الضفيرة
يحتستورد الضفيرة ان شاء الله حتى من كوريا او الصين لانى لا اعتقد ان الموضوع مادى لان لو الموضوع مادى زى ما بعض الناس بتقول كانو جابو كاوتش العجل مصرى ولا تايلاندى ولا كورى مش بريدجستون يابانى

المشاركة الأصلية كتبت بواسطة ahmed.tv

الحمد لله على حل مشكلتك يا استاذ احمد على خير

فعلا توكيل نيسان من التوكيلات المحترمة

واحب احى حضرتك واقولك

انك مثال حى لطرح المشكلة بهدوء وصبر وبنقد بناء ,وبدون تجريح وازاء لمشاعر القراء والاعضاء والناس بصراحة وكل الاعضاء بيحييوك على نقدك البناء وحلك لمشكلتك بهدوء
مع انك تعبت فيها وروحت ورجعت وغيرتها كذا مرة , وبحييك على صبرك وهدوئك اللى هو السبب الرئيسى اللى خالاك تحل امورك على خير , وان ربنا وقفلك ناس محترمة خدموك باخلاص

وفعلا الناس فى السبع ناس محترمة جدا وبيشتغلوا باخلاص وبحب لعملهم , وممكن يحصل بردوا تقصير , ولكن بيكون غصب عنهم بردوا , لان وارد الخطا

وتاكد ان نيسان بتعمل على راحة عملائها
ولو فعلا فى مشكلة عامة وكبيرة فى موضوع الضفائر اكيد هما مش حيسكتوا , عشان حيخافوا على سمعتهم من شكوى العملاء فى حماية المستهلك ومبيعاتهم
وغير كدا حيخافوا يخسروا من كتر تغير الضفائر زى ما انت قولت

وباذن الله دايما هما فى تطور مستمر

وتحية كبيرة لحضرتك وللسبع ولنيسان

وتقبل تحياتى يافندم

وتحت امرك فى اى خدمة

الله يخليك يا استاذ احمد وحضرتك من اكتر الناس اللي خلوني اختار العربيه وانا مطمن بسبب مشاركاتك الفعاله وتوضيحك لكل نقطه وخدمتك لكل اعضاء نيسان وحضرتك مثال للانسان الخدوم الصادق اللي بيحاول بكل جهده يحل مشاكل الاخرين.
واحنا محظوظيين فعلا بوجودك معانا في قسم نيسان.
والف شكر للكلام الجميل اللي حضرتك قولته عني علشان الكلام ده لايصدر الا من الناس المحترمين زي حضرتك

المشاركة الأصلية كتبت بواسطة hossam_gabre

الف مبروك عليك حل مشكلتك
فعلا طالما فيه مشكلة فى الضفيرة او اى حاجة فى العربية التوكيل عمرة ما حيرفضها او حينكر ان فيه مشكلة موجودة لانه توكيل محترم والكلام دا انا بقولة عن تجربة
المهم يبقى فيه مشكله
واعتقد لو نسبة الشكوى من الضفيرة خارج الحدود المسموح بها اعتقد ان نيسان حتعمل حاجة من اتنين
يحتغير المصنع اللى بيورد الضفيرة
يحتستورد الضفيرة ان شاء الله حتى من كوريا او الصين لانى لا اعتقد ان الموضوع مادى لان لو الموضوع مادى زى ما بعض الناس بتقول كانو جابو كاوتش العجل مصرى ولا تايلاندى ولا كورى مش بريدجستون يابانى

كلام حضرتك واقعي جدا ومقنع بس الواحد بيتكلم من حبه في الصني ومن امنيته ان العربيه تكون تمام في كل حاجه .