سبت شغلي عشان أشارك .. ونبي ما تشردوني في الشارع
مساء الفل علي أحسن أعضاء في نايل موتورز
أولاَ أعتذر عن غيابي .. زي ما إنتوا عارفين أنا شغال في الميديا .. وفي الفترة اللي فاتت كان فيه إتجاه قوي لإلهاء الناس في أخبار مثل جنات مرفوع عليها قضية وروبي مش عارف مالها ومنة شلبي مش عارف إيه لأني بشتغل في الصحافة الفنية.
وبسبب رفضي إني أشتغل حاجات رخيصة هدفها تحويل الإنتباه أو حتي إن إحنا ملناش دعوة إن إحنا صحافة فنية وبعد إشتباكات مع عدة أشخاص سبت شغلي لأني واثق إن المرة دي إن شاء الله بجد من اللي شفته في الشارع وفي كل مكان حتي علي النت.
كما إني مسئول عن بعض الأقسام في المواقع الفنية والحمد لله إنهاردة مسمحتش ينزل خبر واحد هايف نزلت أخبار كلها تصريحات عملتها مع ممثلين محترمين ذوي مواقف محترمة وسياسية وهيشاركوا بكرة أمثال خالد الصاوي وعمرو واكد وعمرو سلامة وأسر ياسين وغيرهم.
ده برضه هيضرني جامد في خلال أيام وإحتمال أفقد كل الأماكن اللي بشتغل فيها .. إلا في حالة واحدة
إن كله يشارك بكرة .. أبوس إيديكم شاركوا ومتبقوش سلبيين وتقضوا علي الأمل الأخير .. عدم نزولك هو تعريض حياة اللي نازلين للخطر وحياتهم هتبقي في رقبتك .. لو العدد كبير محدش هيقدر يخش يضرب حد محترم بيعبر عن رأيه في سلام.
محدش يقول مليش دعوة أو مفيش فايدة أو مليش فيه .. أي تراجع معناه هنعيش في ذل بقية عمرنا أكتر من قبل كدة 100 مرة .. وأعتقد أكثر الخيالات خصوبة مكانش ييجي في دماغها إن اللي إتعمل كان ممكن يتعمل، متبقاش متشائم أو سلبي وإعمل حاجة .. من أجل كل الشباب اللي كان بيقف بجسمه قدام المدرعة لوحده!