الموضوع: هنا للاطمئنان على الاعضاء

السلام عليكم

ياريت نعمل الموضوع ده للاطمئنان على اعضاء المنتدى وممتلكاتهم وسياراتهم وكل واحد يحكى تجربته فى هذه الانتفاضه والفوضى الاحادثه فى ان معا
بالنسبه لى انا ساكن فى دمنهور والبلده نايمه موت مفيش حد بيتحرك فيها خالص انا ساكن بجوار ميدان الساعه حوالى دقيقيتين مشى فقط لاغير فى شارع جانبى منه خلف مباحث امن الدوله وميدان الساعه عندنا هو اهم ميدان فى دمنهور وفيه كمان جهاز مباحث امن الدوله وقسم الشرطه ومقر الحزب الوطنى والمطافى وبجوارهم المحكمه فى دائره لا يتعدى قطرها 100 متر طبعا انا مكنتشى متخيل ان تحصل مظاهره عندنا ابدا وبعد صلاة الجمعه كان المنظر جميل وناس ماشيه بيفط وبتهتف وكلنا كنا موجودين معاهم البلد كلها تقريبا كانت ماشيه وبعدين روحت بيتنا وبعد اقل من ساعه لاقيت دخان اسود وريحه فظيعه واصله البيت عندى وشباب عمل يجرى وتستخبى عندى فى الشارع ونزلت بسرعه لاقيت مبنى مباحث امن الدوله مولع
عمرى ماتخيلت ان المبنى اللى كان اى حد بيخاف يطنح ويبص عليه انه يولع بالسهوله دية والعساكر بتوع مباحث امن الدوله بيضربوا رصاص مطاطى على الشباب والتانين يحدفوهم بالذلط اللى كان بيجيبوه من عند شريط القطاراللى قريب من بيتنا وراه على طول لدرجة ان تقريبا مبقاش فيه ذلطه واحده فى السكه الحديد والقطارات بيقولوا كانت بتتهز بسبب كده ومعظم الشباب اللى كان بيحدف كان طالع من الدروس بتاعتهم ومعاهم ورق المذكرات كمان وفى منهم عيال صغيره بمعنى الكلمه انا مش عارف جابوا الجرئه دية منين لان فى رصاص مطاطى ضرب في تحت البيتا من عباره عن بلى صغير ممكن يخرم العين ولولا بعد المسافه كان عمل مشكله كبيره
الموضوع ده استمر يوم الجمعه لحد الساعه 10 بليل وكمان السبت لحد العصر وسقطت بعدها مباحث امن الدوله بعد لما استسلموا العساكر اللى فيها وهربووا ودلؤتى هيا عامل بالظبط زى مزار سياحى مليان ناس داخله تصورها وتتفرج عليها وبيقولوا انهم سمعوا صوت ناس بتستغيث تحت الارض وبيحاولوا يحفروا علشان يطلعوهم
بس السىء فى الموضوع انه بعد لما تم نهب كل مافيها هى والحزب والقسم معظم المسروقات كانت بتتوزع فى الشارع عندى ويضربوا بعض علشان يحصلوا عليها وبصراحه الواحد شاف ناس اشكالها غريبه وعمره ما كان يتخيل يشوفها ابدا مش عارف دول كانوا مستخبيين فين

لا وكمان الملفات اللى كانت فى مياحث امن الدوله كلها ولعت وكانت مرميه فى الشارع يعنى كل واحد كان عنده مشكله عندهم خلاص راحت
وللاسف المحكمه حصل فيها نفس الشىء برده
لكن فعلا الواحد نفسه يشوف رجال الشرطه فى الشارع مره تانيه علشان يحس بالامان اللى افتقده من ساعة اختفائهم