الموضوع: معركة الإبل...ماذا بعد؟؟؟!!

السلام عليكم وعلي اهل مصر وعلي مصر

انا بدات استوعب ايه اللي بيحصل وايه اللي حصل...ياريت تقروا بالتفصيل عشان نفكر في اللي حصل مع بعض ......مع بعض .....مع بعض ..........مع بعض
مبارك زي ما قلت مليون مرة ثعلب ماكر جدا...ولكن "و يمكرون ويمكر الله والله خير الماكرين"...ونسال الله ان ينصرنا ويكون في صفنا ولا يخذلنا ولا يذلنا ويذل الظلمة والفاسقين

تعالو نشوف ونحلل وده رايي وارد الخطا ووارد الصواب

1- علي غير توقع تخرج مظاهرات يوم الجمعة وتكون الشرطة في الشارع والامن المركزي علي اساس يعني علي حسب فكر مبارك واعوانه "مين دول يعني دول شوية عيال تافهه..رشقلهم عربيات الامن المركزي في الشارع يرعبوهم ويصفوهم وشوية قنابل غاز علي علي.......هتدبر"

2- فجاة الشعب والعيال اللي هو استهزأ بيهم صمدوا صمد رهيب لدرجة انهم عملوا رعب للامن المركزي نفسه..رجالة من ظهور رجالة.....مبارك "ايه ده ايه العيال دي ايه اللي بيعملوه ده...وكمان الاحزاب انضمتلهم...ده انا هبهدلهم ولاد ال.....وكمان الاحزاب اللي سايبهم شفقة مني عشان شكلنا امام العالم طلعوا عن طوعي........يا ولاد ال..........."

3- مبارك للشرطة والداخلية كالعادة..."ايه يا ولاد ال......مش عارفين تلموا شوية عيال.....اعملولي قرد بس العيال دي تتفرق حالا...."

4- مبارك....."واضح انكوا خوفتوا وانا لازم اتدخل....تعالوا يا وزراء...اجتماع....هنعمل معاهم ايه...(بدا مبارك ذو الخبرة العسكرية والدهاء الكبير يخطط...راجل عسكري يا جماعة مش سهل..ده غير انه مصري برده محدش ينكر)

5- "العيال دي عملوا شوشرة ولازم يتفرقوا.....احنا هندي نفسنا وقت نكسب فيه ارض..انا ولا هرد علي مظاهرات ولا اللي حصل...خليهم الفار يلعب في عبهم وياكلوا في نفسهم"

6- وبعدين ياريس "اخلوا الشوارع خالص سيبكوا منهم....وافتحوا الاقسام للمساجين وهددوهم كلهم وارعبوهم انهم يهجموا علي الشعب ويعملوا اللي هم عايزينه ومحدش هيتعرضلهم...وشوية المخبرين بتوعنا كمان طلعوهم علي الناس ارعبوهم واسرقوهم...خلينا بقي نشوف الناس اللي في التحرير ديهترجع بيوتها ولا ايه"

7- "يا ولاد ال..........العيال دول عملوا ايه ....عملوا شرطة ذاتية اقوي من اي شرطة في العالم....نظموا امن وسلام في بيوتهم بشوية عصا وسكاكين...انتوا طلعتولي منين"..الشباب:.."الحمد لله ربنا هو الناصر"

8- مبارك.."خليهم كده شوية اهم في الاخر المجرمين دول المخبرين والامناء دول مالهمش دية عندنا....ولما يشوفوا شوية ميتين علي مصابين هيخافوا ....وكمان عشان نكسب وقت كمان والناس تتعب وحظنا حلو بقي احنا اخر الشهر وكل الناس مقبضتش"..(للاسف مكنش فيه ترتيب استراتيجي للثورة..كان لازم تستني المرتبات والناس تعمل حسابها في اكل وشرب وبنزين..معلش فاتت علينا ما نا برده مش عسكريين..تتعوض ان شاء الله)

9- المعارضة تبدا تظهر والبرادعي ووووو..........ومبارك هيشكمهم وفعلا قعدهم خلاص في بيوتهم ده ان مكنش خلاهم يؤيدوه..هنكمل..

10- مبارك يقول خطاب اهبل عشان يستفذ الشعب زيادة وميتكلمش فيه عن اي حاجة خلاص من اللي حصلت عشان الشعب يفهم انه لسه في السلطة وانه بكده بيتعامل مع خيانة عظمي في الدولة لا يهم ان يتكلم عنها لانه بيتعامل معاها حاليا...شوية الناس الميتين دول شوية خونة لا يستحقوا الكلام عنهم

11- كل اللي يتكلم عنه مبارك تغيير حكومة ثلاثة ارباعها من الحكومة القديمة....منظر يعني...عشان برده يدي نفسه وقت ويبين قادم العالم انه هيبدا اصلاحات

12- الشعب واعي وعارف ان مبارك مسيطر تماما بكل جوارحه علي مصر وعلي كل ذرة رمل فيها ومش هيسيبها غير بطلوع الروح فيرفض الشعب

13- يبدا مبارك ينزل الجيش عشان يبدا يهدي الناس شوية...كر وفر.. معلم...عشان الناس تقول الجيش هيحمينا...ولا اعتقد ابدا ان الجيش كان له اي دور غير بسيط جدا .......منظر بس

14- الشعب بدا يتطمن وفجأة زاد الهجوم من البلطجية....ايه ده ازاي بقي...هما مش خايفين من الجيِش..خليكوا اذكياء بقي وكملوا بذكاؤكم...ما اصلا الجيش لسه مع مبارك...وقال ايه الجيش بيمسك المجرمين شوية صور كده علي الماشي والجيش ماسكهم ومعاهم مسروقات وكده...فيلم عربي يعني

15- الامور هديت شوية والشباب اعلنت عن مظاهرة سلمية تماما....الوقت بيعدي والناس مش عارفة تاكل ولا تعيش...والشباب اعلن كمان عن مسيرة جمعة الرحيل...

16- مبارك....يا ولاد ال..........انتوا عاوزين تيجوا القصر كمان ..........لا ده انتوا دستوا في الطين........ده انا هوريكم العين الحمرا اللي عمركم ما شفتوها

17- مبارك يقول خطاب عشان يخلي الناس تعيط...مش عارف عيطوا علي ايه...خطابه كله تهديد ووعيد...

18- الناس تكمل مظاهرات وترفض....

19- اوباما يطلع يقول انا كلمت مبارك وقلتله غير النظام حالا...ميعرفش ان الراجل عدي جدا...ومش هيسمح ولا يسمعكلام اوباما...عنده حق مين ده الي طالع يقول كلام مالوش لازمة..وانت مالك انت يا اخي ما الشعب بيقول انت مين دخلك...بس مبارك علي حق من وجهة نظره...هو عارف ان امريكا ولا اسرائيل هيقدروا يعملوا حاجة لان مصر مش زي العراق ولا تونس ولا فلسطين...مصر ليها كيانها وجيشها وشعبها واستقلالها...فهو ولا هامه كلام اي حد بيتكلم معاه يقول ابدا التغيير..دي عالم ولاد ......

20- رجال بلطجية او متظاهرين يؤيدوا الرئيس هاجموا المتظاهرين...........هما الاتنين بلطجية النظام اللي مش هيخلصوا لانهم كتير جدااااااااااا...ومتظاهرين ابرياء اتبلفوا واللعبة خالت عليهم لان الراجل لعبها صح...وكمان فيه منهم عايز يعيش وخلاص ادينا بناكل ونشرب وعايزين نرجع بقي لحياتنا الطبيعية وننزل نتفسح...واهو مبارك هيعمل تغيير وهيبدا يصلح...واهي امريكا والعالم في صفنا ومش هيقر يرجع في كلامه

21- الجيش اختفي

22- الناس بتقول انهم لاقوا هويات شرطة سرية مع المهاجمين...ازاي ناس بتهاجم ومعاهم بطايق عشان الناس تعرف انهم شرطة سرية...(ده تهديد واضح وصريح من مبارك للشعب..بيقولهم انتوا لوحدكم...عشان ينخوا

23- مبارك ساكت ومطلعش قال الناس دي مش تبعي ولا اي حاجة ولا اتكلم باي كلمة علي قتلي الشعب المصري...قتلهم بدماء باردة..حسي الله ونعم الوكيل

24- الجيش ساكت ومفيش اي اخبار عنه

25- الحكومة ساكتة..ومن هو مشاع عنه انه راجل تمام كل اللي قاله...."يا حبايب قلبي عرفنا انتوا عايزين ايه..متوجعوش دماغنا بقي"

26- الجزيرة كل كلامها مع المظاهرات

27- لا لا استنوا...فيه ناس خلاص هبطت وبدات تزهق وتتعب والاحزاب المعارضة اتظبطوا الظبطة الصح من مبارك.. وبقوا بيايدوه....الراجل واااااااااصل ومدقدق مش فرفور...ده رجل جيش

28- لعبها مبارك صح...وقع الشعب في بعضه...من اول ما بدا يخرج مظاهرات صغيرة جدا للاسف الشباب استهزأ بيها وقالوا دول ميكملوش 100 واحد حد هيبصلهم

هي دي اللعبة اللي بدات في النجاح من الان والشعب بدا يضرب في بعضه.......يا ناااااااااااااااااااااس في حد يامن منه بعد كده....

كملوا بقي قراية التوقعات هنا لاني مع الراجل ده:

http://www.nilemotors.net/Nile/199327-a.html

عايزين بقي نبدا نفكر نحل....بدلا من اللي بدا يؤيد يقول خلاص وينزل يضرب في اخوه...وبدل ما المتظاهر الرافض يضرب في اخوه اللي اتضحك عليه...لازم الشعب يتجمع تاني.......

مبارك صاحب العقل الماكر لعب ابسط لعبة عرفها الوجود ودخلت علي الشعب المصري....التفريق وذرع الفتنة

المشاركة الأصلية كتبت بواسطة ainshouka

الحل الوحيد هو ان المظاهرات اللى جاية بدل متطالب برحيله تركز على حصول ضمانات حقيقية علشان يحصل انتقال سلمى للسلطة بعد انتهاء الفترة الرئاسية

ايه بقي الضمانات الحقيقية...اكنك بتقول ان انت عايز تاخد ضمان من الاسد انه مياكلكش وهو جعان