المشاركة الأصلية كتبت بواسطة tyler_durden
باشا من الواضح كده إن النت إتفتح عشان يحصل اللي احنا شايفينه ده من إرتباك و ذعر و نداءات إستغاثة و كلام غريب عن مؤامرات و أجندات و حاجات غريبة..
المهم ..
شباب التحرير الآن لا يثقون في النظام ..هما شايفين إنه نظام فاسد و بيقولوا إزاي نظام فاسد هايصلح النظام .. و إنعدام الثقة ده على ما يبدو تراكم عند هؤلاء الشباب على مدار ٣٠ سنة .. و ربما إعادة الثقة بينهم و بين النظام تحتاج ٣٠ سنة أخرى .. بالطبع سأكون أنا و أنت و الشباب نفسهم قد توفانا الله أو على مشارف الموت ..
دلوقتي احنا و هما و الحكومة و الجيش و المجتمع الدولي عايزين حل فوري .. فوري ..
الحل الوحيد للأزمة بيد الرئيس مبارك نفسه .. أنا حالي و شغلي واقف و كاتب الموضوع كمان و البلد كلها بتخسر كل يوم ..
الشباب في التحرير من الواضح إنهم كل يوم بيزدادوا قوة و مش هايمشوا إلا في حالة واحدة .. عندنا ٢ مليون واحد عنيد في التحرير و ملايين عنيدين غيرهم في المحافظات .. هل من الأسهل أن نقنع هؤلاء الملايين بالرحيل .. أم هل الأسهل أن يتم تقديم مصلحة مصر و إنهاء الموقف بكرامة و شرف قبل فوات الأوان ..
يا جماعة الملايين اللي بتخرج دي مش هايقتنعوا إلا بشيئ واحد و الضغط الدولي على مصر يزداد أي أن الضغط خارجي و داخلي ..
الريس دايما كان بيقول إنه أبو كل المصريين .. سواء مؤيدين أو معارضين .. خذ قرار جريء يا ريس و جنب مصر مزيدا من المشاكل .. الموضوع لسه في إيدك و لكن كل ساعة بتمر الداخل و الخارج ضغطه بيزيد و هايزيد ..