المشاركة الأصلية كتبت بواسطة ramyfawzy
السلام عليكم يا شباب
معلش انا ماليش في السياسة وطول عمري بعيد عنها
ومن ساعة ما بدأت المظاهرات (25 يناير) الى يوم الجمعة العظيم - قولت اكيد فيه امل
الناس ديه ممكن تكون بتتكلم عني وعن اخويا واختي ومراتي وحتى ولادي
ولو حصل تغيير في النظام او حال البلد اتغير - هقول عليهم ابطال بجد
بس مش عارف ليه برضه عندي الاحساس بتاع نظرية المؤامرة (يمكن عشان بتفرج على افلام اجنبي كتير)
من الساعة 6 مساء الجمعه - الدنيا كلها اتغيرت
انسحاب الامن - نزول بعض مدرعات الجيش - احتلال تام للمتظاهرين لميدان التحرير وغيره من اللي احنا تابعناه
بس المثير جدا للجدل هو بعض الافعال اللي حصلت بعد كده
1 - احراق مقرات الحزب الوطني في البلد كلها (انا ساكن في الحي العاشر في مدينة نصر وعلى الشارع الرئيسي عندنا فيه مقر اتحرق بالكامل - تخيلوا الساعه 8 مساء)
2 - تدمير وسرقة معظم اقسام الشرطة في مختلف الانحاء (برضه نقطة شرطة العاشر اتدمرت واتحرقت والسلاح اللي فيها كله اتسرق)
3 - ظهور البلطجية مباشرة في الشوارع وفي مختلف الاحياء السكنية (وخصوصا البعيدة عن العمار زي التجمع والرحاب والشروق)
كل ده يا جماعة في خلال ساعات معدودة
زي ما انا قلت في الاول - انا مش بتاع سياسة ولا حزب ولا مطبلاتي
بقالي اسبوع بفكر ازاي ده حصل - وكل مرة يرد عليا العقل الاليكتروني بتاعي (معلش عشان عقلي الاصلي باظ) ويقوللي:
يا رامي - العملية ديه مدبرة ومدروسة ومخططة بالورقة والقلم
حد فيكم بيفكر زيي
يا ريت ..............