الموضوع: تحيه واجبه لانس الفقي

ايوووووه تحيه واجبه لانس الفقي طبعا
راجل اسطوره استطاع في كام ساعه عالتلفزيون يعرفنا مين هما اللي في الميدان بجد


اقسم بالله ان كتير قوي من الشعب المصري لا يستاهل قطره دم واحده سالت من الشباب دول


الدليل :
اسمحولي الاول بس هكلمكم بلغه السوق او بلغه عاميه قوي
و يا ريت تقرا الموضوع كله قبل ما ترد ارجوك



الله يخربيت دول شباب اللي صحونا طول الليل نحرس بيوتنا من البلطجيه ..........

يا حبيبي يا كوتوموتو انت و هو .....تعبت من سهر كام يوم في الشارع بتدافع عن عرضك
في وقت ان فيه شباب بايته بقالها 8 ايام في الشارع و متعرفش هتصحا ولا لا
امال لو كنت في المقاومه الشعبيه زمان ايام حرب 56 مثلا ......بتواجه جيوش .....كنا هنجبلك غيارات منين ؟؟؟؟

((ده علي اساس ان الشباب دول هما اللي راحوا فتحوا السجون و سحبوا الشرطه ))



الله يخربيت دول شباب مش مخلينا عارفين نروح شغلنا ......


اللي يشوفك دلوقتي ميشوفكش و انت بتزوغ ولا يشوفك و انت عامل فيها ميت
و لا يشوف فرحتك لما تعرف ان بكره اجازه
ولا سندوتش الفول و كبايه الشاي اللي بياخدلهم 3 ساعات يتطفحهم
ولا ولا ولا ولا

((ده علي اساس برده ان الشباب اللي عملو حظر التجول اللي كل يوم ساعه تروح و ساعه تيجي ده))


الله يخربيت دول شباب اللي خلي العمال و الصنايعيه اللي باليوميه معهمش فلوس


اوعي و حوش الهمه
بمناسبه ان احنا في منتدي سيارات حد يطلعلي يقولي علي صنايعي واحد رحتلو مشاك علي طول
مقعدش يتهرب منك و ياكل 20 مره و يشرب 30 سجاره و كبايه شاي
واحد بس يطلع يقلي انو عاز كهربائي ولا نجار ولا سباك و جالو في نفس اليوم
ويا عيني ساب الشيشه من ايدو عالقهوه



الله يخربيت دول شباب الاسعار كل يوم في الطالع ......


قال يعني الواد كان بيسحب المدام كل يومين و يروح كارفوور ولا هايبر يشطبوا من مجاميعه
لا و ايه بقا بيلاقي كل يوم الاسعار بتنزل عن اللي قبلها ......و لا انا غلطان ؟؟؟؟

((بردو الشباب هما اللي راحو للتجار عشان يستغلوا الموقف))



من الاخر اللي عايز حريه و مستقبل افضل ليه و لولاده يستحمل
مش كل حاجه بالساهل كده .......
و لو مش قادر قوي خش نام وشفلك واحد يحميك..... زي الحريم و يصرف عليك كمان



لما تخلص قرايه الموضوع هتقول ايه الواد السوقي اللي قاعد بيتسلي علينا ده .....
عشان متعرفش اني قعدت اكتر من شهر بمتحن بكلريوس هندسه
يعني سهر طول الليل ....وتطبيق باليومين و التلاته و هلاك ......
ولسه في مشروع هبتدي فيه و هسلمو اول يوم في الترم التاني
و خلصت امتي ؟؟؟ يوم 25

من ساعتها مظاهرات + ورديه دفاع بالليل + حبه نوم

و بالنسبه للفلوس ....والدي قطاع خاص و مقبضش من ساعتها لانه ببساطه معرفش يسافر للشغل
والدتي شغاله في مصر للتامين و نفس الظروف
و اللي زاد و غطي جدي اتكتبلو علي عمليه مستعجله يوم السبت 29 ......
و الله و حده يعلم جبنا فلوسها منين و وديناه ازاي و كنا بنروحلو ازاي في عز المعمعه ......

فكر كده انا صابر ليه؟؟؟؟ وتعرف مين بيحب البلد ديه بجد و بيبص لقدام
و مين بيبص تحت رجله اخره ياكل و يشرب و يرضي باي حاجه و لو عرف يبقي يخلف


بص لقدااااااااااااام بقا بطل بص تحت رجليك ((ولا احسن كمل بص تحت رجليك يمكن تقع علي وشك ونخلص منك))

اخوكم من وراء اللابتوب بتاع صاحبي تحت العماره .......

اقلها مرزبه