الموضوع: ما وراء إستراتيجيات الجينرال أنس الفقي

للاسف فعلا فى غسيل مخ اتعمل بشكل محترف عن طريق الاعلام المصرى ..و نجح بالفعل فى التاثير حتى فى بعض المثقفين من الناس ..لكن اللى كان بيروح التحرير بيفهم على طول الوضع و بتظهر الحقيقية واضحة امامة

عشان كدة انا بطلب من كل اللى مصدق كل الاكاذيب والاوهام التى تصدر فى الاعلام و الصحف القومية انة يروح يتاكد بنفسة و يشوف على ارض الواقع و يحدد بعض كدة وجهة نظرة زى ما هو عاوز ..

المشاركة الأصلية كتبت بواسطة motorizer

[justify]يجب أن نعترف أن كثير منا كان مبعد عن معرفة ما يحدث في المعترك السياسي والشأن المصري الداخلي والخارجي .. يعني من الأخر كدة أبيض يا ورد .. فلة .. كل اللي نعرفه إسرائيل وحشة وأمريكا وحشة وعايزين يحتلونا ممكن في يوم ننام بدري شوية تقوم إييييه إسرائيل متسحبة ومحتلانا .. والنظام يعلم بهذا الجهل بل وكان يغذيه ويحصن نفسه به وأهو جه الوقت اللي يحتاج فيه الناس اللي تم إبعادهم وتم وأد وعيهم.

يعني كتير مننا مكنش عندهم خلفية عن أي حاجة وبالتالي مكنش عنده رأي .. تم تحويل هؤلاء إلي مناضلين يحملون لواء الإستقرار والسلام والعودة للحياة البمبي التي كنا نعيشها .. وتم تصوير من هم في التحرير علي أنهم الشيطان نفسه مشيع الفوضي .. لا يوجد لوم لأحد .. أي حد في الظروف دي شايف مصيبة بتحصل في البلد وناس بتموت وهو مش فاهم أبعاد اللي بيحصل وواحد جه إداله رأي بعد ما كان مش فاهم حاجة ومعندوش رأي وخلاه كمان مدافع عن البلد من "الضلال" اللي في ميدان التحرير اللي تابع لمخططات داخلية من الإخوان وخارجية من إسرائيل وأمريكا وإيران وتنزانيا وترينداد وتوباجو وكأن العالم كله إجتمع فجأة لإحتلال مصر عشان هي فيها قطن طويل التيلة وجوها معتدل طوال أيام العام أنظر كتاب الدراسات الإجتماعية أولي إعدادي.

نفسياَ فإن الإنسان يميل إلي المشاركة إذا كان فيه حدث كبير بيحدث حواليه، ولو ميعرفش حاجة عنه، بيتبني الرأي اللي يحققله أكبر مشاركة وفاعلية في الأراء المطروحة لأن الإنسان يحاول دوماَ أن يحظي بأكبر قدر من الأهمية، وده اللي تم إستغلاله لتحويل من لم يكونوا يذهبون للتحرير في الأصل للدعوة إلي التوقف عن الذهاب للتحرير، شوفوا اللي في التحرير الوحشين بيعملوا مع إن الراجل الغلبان طلع قالهم والله هصلح كل حاجة إدوني فرصة أنا عايز أموت في البلد دي! هما عايزين إيه تاني! بل وإغراقهم في صراعات وتنمية الكره للجانب الأخر "أنا مش مأجور يا أغبيا والله أنا مؤيد ومش مأجور ده بجد!!" فأصبح يدافع بإستماتة عن الرأي الذي تم إقحامه عليه في الأساس ويجتهد في إثبات صحته.

تم بث رسائل كاذبة لهم من النظام بل وساذجة أيضاَ، لكن النظام يعرف أن الموجه لهم هذه الرسالة ليس لديهم أي خلفية عن ما كان يحدث قبل ذلك وأي أزمات داخلية سابقة في مصر، ميعرفوش إن الحزب الوطني في العادي بيجيب بلطجية للسيطرة علي الإنتخابات ودلوقتي بيستخدمهم لإشاعة الفوضي ويقول دول المتظاهرين .. لكن عارف إن الناس ممكن تتعاطف مع جملة زي "المصريين بقوا يضربوا في بعض الأخ بيموت أخوه حرام يا ناس كفاية!!" .. ويدافعوا عنها بإستماتة كمان.

ذلك بالطبع لم يؤثر لأن اللي كانوا بيقولوا مش هننزل كان معظمهم مش بينزل أصلاَ، حتي مع جهود مخبرين الحزب الوطني اللي إنتشروا في التليفزيون وعالنت وفي كل حتة "إحنا من شباب 25 يناير بس بنقول كفاية كدة بلدنا هتضيع يا ناس محدش ينزل!!" .. وده طبعاَ بعد ما إتحرق كارت مبارك أبونا وإحنا أسفين يا ريس .. بعد ما أبونا دبحنا فجر الأربعاء في الميدان.

لا يوجد لوم لأي أحد .. لكن علي الجميع ممن سمحوا لغسيل المخ بإختراق أمخاخهم أن يفكروا مرة أخري ويشوفوا مين رجع النت في وقت معين عشان يستغلهم في عمل فتنة هما نفسهم بيصرخوا لإيقافها مع إن هم من تم إستغلالهم لنشرها، ومين بيوجهلهم رسائل معينة علي التليفزيون ويرجع يقول الجزيرة مش عارف إيه ..

وأعتقد إن لبانة الإخوان دي خلاص إتحرقت وإلا فإن عمرو موسي اللي تواجد في المظاهرة إخواني بالإضافة لعمرو واكد وخالد أبو النجا ورامي إمام ومحمد إمام ومني هلا وخالد الصاوي والقضاة والمتحدث بإسم الأزهر وكمان المسيحيين اللي طوقوا صلاة المسلمين في الميدان عشان محدش يأذيهم وهما بيصلوا الجمعة كلهم إخوان، بالإضافة لكل الأخبار الكارتونية مش عارف أسبانيا حركت الأسطول وألمانيا وقفت الجيش الإحتياطي علي حدودها مع جنوب أفريقيا لإحتلال مصر عن طريق العتبة والباور رينجرز وسوبر ماريو في التحرير والنينجا تيرتلز بيتفاوضوا مع الإخوان.

توقف للحظة وإعرف مين بيدافع عن حقوقك .. إعرف مين السبب إن فيه ناس بتاخد عدتها وتروح تقف في شارع الجلاء مستنية حد يروح يشغلها فواعلية باليومية .. إعرف مين السبب في إنهم كدة مش تقول المتظاهرين اللي بيدافعوا عن حقوقهم وحقوق الناس دي وحقي وحقك ودمهم ساح عشان كدة هم اللي موقفين حال الناس دي وموقفين حال البلد .. الحقيقة إن الحال عمره ما كان ماشي أصلاَ

أقف للحظة .. وفكر

محمود مصطفي كمال

[/justify]

تحيا الثورة... يسقط نظام غسيل المخ

انا قولت الرد ده قبل كده
لكن اقوله تانى عشان خطرك يا موتو
واهو بالمره ابقى عامل زى الراجل الكول ابو موتسيكل

قابل يا عم

كانت الاجازة الاجبارية اللى اديهالنا موضوع حظر التجول و المظاهرات فرصة للتفكر والتدبر والقراءة ومشاهدة القنوات الفضائية المختلفة (ايييييييييييييييييه فين من زمان)
فالواحد عامل زى ال............ فى الساقية

الخلاصة
من متابعة الوضع المتصاعد بوتيرة غير طبيعية خلت الناس مش عارفة تنام من كتر تلاحق الاحداث
فحديث من هنا وتقرير من هنا و بيان منعلان وتحذير من ترتان (اللى هيجننى ان حبايبنا الحلويين جدا جدا فى امريكا بيتكلمو ويخبط التصريح اللوزعى تلو الاخر (الست البركة هيلارى - والراجل الطيب اوباما والراجل العجيب المتحدث باسم البيت الابيض (اللى انا شاكك انه سبب موضوع المظاهرات يروح الصبح التحرير يهتف و يرجع بالليل يخبط التصريح المتين< محدش يشوفلو عقد فى القنوات المصرية انا عارف انهم بيدفعو كويس>- واخيرا يا وزير الدفاع بتاعهم او رئيس اركانهم اللى ماسك ودان نظيره المصرى علشان يأمن المظاهرات من البلطجية (اللى ساعات يبقو بلطجية و ساعات يقلبو بوليس سرى و اخيرا يتحولو لموظفين <مش عرف بيفكرونى بمسلسل المتحولون) لحد ما بدأت اشك ان المظاهرات دى عندهم مش عندنا
ومن الجانب المصرى يتهايلك ان الموضوع خاص بمظاهرات الشباب السيس فى حوارى هارلم المطالبين بسندوتش هامبورجر بيج ماك مش عادى لكل مغنى راب او هيب هوب وانهم مش ناويين يغادرو ميدان التحرير الا لما آشر يتنحى ويغنى بلوز (و محدش يسألنى من آشر ده)

المهم تشعر ان فيه 3فرق كله عمال يغنى مع نفسه و ملوش دعوة بالتانى

1- الفريق الاول :حبيب قلبى التلفزيون المصرى وده عايش سبعنياته و ثمانياته واخره تسعيناته و مقديها يا حبيبتى يا مصر ( لدرجة اننى بدأت اقول مش يمكن الموضوع فيه ماتش كورة و الاحاجة بس يترى مين اللى هيجيب الجون الاول الحاج ابوتريكة واللى العفريت شكابالا وال سيد حمدى (برده محدش يسألنى مين سيد حمدى ده)
ويحلق فى فضاء التلفزيون المصرى قناة المحور بالثنائى المرح(هناء وشرين(برده مش هقولكم مين همه اه هيا كده)
ومن بعيد تاتى قناة دريم و الحياة التى بتحاول تبان انها مهتمة بموضوع البيج ماك ده (ده انا جعت من سيرة الاكل دى باين العيال السيس دول عندهم حق وانا هنزل اشوفلى اى حاجة اكولها ان شاء الله حتى لو كول سلو

2-الفريق الثانى : التلفزيونات العربي ودول طبعا تتزعمهم الجزيرة و دى طبعا جاية تهدى النفوس بين آ شر و العيال السيس و معندهاش مانع انها تطبق مبدأ و لا تقربوا الصلاة لتهدئة النفوس (بس بامانة ربنا عندهم قدره على تجميع الصور المختلفة لتبدو وكانها قطع بازل يتم تجميعها وعندهم طقم اخراج وموثرات يهدى الثور الهايج فى عنبر سبعة (محدش سألنى يعنى ايه حكاية الثور مش بقولوكو انتم بتنامو و انتم قاعدين من كتر السهر)
ثم تليها العربية التى تحاول ان تبدو موضوعية
ومن بعيد تاتى بى بى سى الملتزمة الحياد لاقصى درجة( كانها بتذيع ماتش شطرنج عندهم فى لندن)

3- الفريق الثالث : الحرة ودى بجد الفريق اللغز (الاخبار بتيجى فيها قبل الفريقين السابقين على الاقل بنصف ساعة وتصل الى 6 ساعات (بيذيعو من الكنترول القرود) و هما بيطبقوا سياسة زمبة على الهادى (يقال انه اختراع امريكى < ادينى قولت حاجة مفهومة عشاان متقولوش مبيغشش احنا كلنا لجنة واحدة يا شباب>
و دول طبعا عندهم وفرة فى موضوع (البركة - الراجل الطيب - الراجل العجيب < انتو لسة مشفتولوش عقد عمل> - والناس اللى واكله ودان بعض عشان المتحولون)
بس للامانة عندهم امانة بيستضيفو عمر باشا عفيفى( ينهار اسود هما العيال السيس لغو البشوية كمان طب اقولو ايه يا عمر أفندى (و الا بلاش لا يخصخصوه هو راخر ) وده راجل و على الرغم انه نظريا فى واشنطن الا انه عنده معلومات ميدانية مش عند اغلب العيال السيس ذات نفسهم (السيد عمر <حلوة حكاية السيد دى> غلب التوقعات المرئيية و كراسة الأول (بيجيب المعلومة قبل متحصل يا معلم بيوم كامل (حاجة كده تبع ألة الزمن)

ده بالنسبة للاعلام

اما ميدانيا
فتحس ان العيال السيس دخلو تلات معارك مع الحاج شاجى (هو شاجى و الا آشر انا نسيت ما علينا)
المعركة الاولى : اشر بعت البوليس للعيال السيس (حلو السجع )
النتيجة:-هزيمة البوليس
- أشر باع طقم الحاجات الغريبة اللى معلقها فى رقبته <و الا رقبتهم مش عارف
وبعت جاب واحد تانى عشان رقبته وجعته
-العيال بيغنو give me some more


المعركه الثانية: آشر بعت جاب ناس محترمة على علاقة جيدة بالعيال السيس لهدفين
- يريح البوليس من العيال السيس (لانهم عمالين يزنو فى موضوع البيج ماك بقالهم اسبوع والبوليس مش عارف ينام من الدوشة اللى العيال دول عملينها لغاية مالبوليس قلع هدوممه وسابلهم البلد وهج (بغرض ان العيال السيس يحسو شوية على دمهم ويبطلو موضوع البيج ماك وينزلو يعملوه اعلان تنويه عن مفقودين فى القناة الثالثة المحلية)
- يدى فرصة للمتحولين انهم يخوفو العيال السيس و يخليهم يروحو يعملو التنويه عن مفقودين مختلين عقليا قلعو هدومهم و هربو

النتيجة: العيال السيس اخدوا الناس المحترمة بالاحضان و لزقو استسيكرعلى عربية الناس المحترمة مكتوب عليه فليسقط شاجى < لا كمان و بعتوا الصور لأشر عشان يزقطط

المعركة الثالثة : أشر بعت المتحولين للعيال السيس
النتيجة :العيال السيس استرجلت شوية و قبضوا على المتحولين وسلموهم للناس المحترمة( بس ربنا يستر على ودانهم من الاكل من نظرائهم عند حبايبنا الحلويين)
معركة ملحقة( ودى جزء من فيلم تاريخى فانتازيا و المطلوب منك ان تتخيل ان الجمال و الخيل دخلو معارك فى هارلم( والنبى بلاش هبل وشوفولنا موضوع يتصدق)
النتيجة :اشر قرر انه ميغنيش هيب هوب و كفاية موضوع الراب
العيال السيس صوتها على اوى give me somemore
و ناويين يلمو بعض ويعملو زفة اسكندرانى او سويسى

المعركة الاخيرة (السلاح الاخير)
أشر يقوم بما يعرف بحرب نفسية ( بيضاء :الناس الطيبة اللى كلامهم حلو
سوداء: الناس العبيطة من عينة الديب و الفرخة بينسقو مع بعض لمهاجمه النمر
رمادى(اللون الرمادى ده انا معرفوش على رأى نظيم شعراوى):ابيض على اسود



النتيجة: العيال السيس عمالة تقول give me some more

(الى هنا سياداتى سادت سادتى انتهى الوصف التفصيلىلاحداث الشوط الاول و ابقى ارجع بعد الاستراحة)

أنا فعلا مش مصدق ان ممكن الناس يتعملها غسيل مخ بالسرعة دى
قفلوا النت و اطلقوا الكلاب فى التليفزيونات الحكومية و الخاصة و قعدوا يقولوا الحقوا البلد , اسرائيل , ايران , امريكا , حزب الله , حماس , القاعدة قامت الناس صدقت
الناس ملقتش بنزين و كروت شحن و نوعيات من الاكل و اضطروا يقفوا فى اللجان الشعبية قاموا جابوا ورا و قالوا لا كفاية كدا حرام الراجل طيب و قال انه ماشى , حرام عليكوا البلد ارحموا البلد كفاية خراب , روحوا علشان نسيب الناس تنفذ وعودها , احتا خدنا وعود ب 70% من الطلبات كفاية كدا نروح و نشوف !!!
بقى دا كلام يا عالم , عايزين تغيير و مش مستعين تدفعوا التمن يبقى متستحقوش التغيير اساسا!!!!!!!!!