الموضوع: حقارة قناة الحقيرة مع المصريين

المشاركة الأصلية كتبت بواسطة puyol

الإخوة إللي عجبهم قناة الجزيرة إن كان حد فيهم بيفهم في الكورة فاكرين ماتش مصر والجزائر في السودان كل الناس كانت بتقول الجزائر جايبين بلطجية ومساجين ومنهم ناس مينفعش يكدبوا زي محمد فؤاد وغيره من الفنانين اللي كدبتهم الجزيرة الرياضية ولما كسبت الجزائر الماتش جابوا فرحة الجزائريين في الجزائر وفرنسا وبلجيكا وهولندا والمجر والنمسا ولفت دول العالم كلها عشان تجيب فرحة الجزائريين لما كسبونا فى الخرطوم ولما مصر كسبت الجزائر في انجولا 4 / صفر مجابوش حتى نفر واحد فرحان من قلبوا كل اللي عملوه جابوا اغنية قديمة لمصر ولما فزنا بالبطولة على غانا في النهائي بردوا مجبوش اي فرحة تذكر للمصريين وطبعا البطولة كانت حصريا على الجزيرة الرياضية وكمان غلوا الاشتراكات على المصريين بس وباقي دول الشرق الاوسط نفس التعريفة بتاعتها.
هي دي قناة الحقيرة اللي بتتفرجوا عليها يا مصريين وأقسملكوا بالله واحد صديقي كان عمل مداخلة عشان يخاطب الناس تروح لبيوتها بعد خطاب الرئيس قطعوا عليه الخط .

محمد فؤاد ....والله ضحكتنى...محمد فؤاد بتاع عيد ميلاد منه فضالى لما كانت قاعده على حجره...مفيش داعى نتكلم بس عموما احنا بنتكلم عن نقطه محدده وهيا ان الجزيره بتجيب حقاااائق فى ميدان التحرير والمناظر بتبقى مباشره...واحنا كمصيريين عارفين انها صح وبتحصل وبندارى ليه انا مش فاهم....انا مليش فى الكوره ومليش دعوه بالجزاير...زى مابقول لحضرتك انا بتكلم فى نقطه معينه ...كفايا بقا نفااااااق من القنوات المحليه...لحد امتى هيضحكوا على الناس...

المشاركة الأصلية كتبت بواسطة naderfahmy

بيقلك الجزيرة قبضت من اسرائيل علشان تزعزع الاستقرار فى مصر . شفت النكتة , قطر اللى اعطت عبارات لمصر وقت ازمة شهداء العبارة اللى قتلهم فساد النظام الحاكم وقطر اللى عايشة على ابار البترول بقت تاخد فلوس ومن منين من اسرائيل اللى عايشه على دعم امريكا
وكمان مش بس كدا دول حطوا الاعلان انهم خونه وعملاء وصهاينة فوق علشان يقولوا للجميع احنا جواسيس وبنحاول نسقط مصر , ايه الحلاوة دى , وبعد شويه اتكسفوا يا حرام راحوا شايلين الاعلان لما الناس خدت بالها من الاعلان اللى هما اساسا حطينه علشان الناس تشوفه وقالوا فى عيال وحشين هما اللى اخترقوا الموقع وعملوا كدا

يا مثبت العقل والدين يارب

بالمناسبة هى فين الاجندات اللى بوزعها التلفزيون المصرى اصل سمعت ناس كتير بتقول ان اللى بيحصل فى مصر دا اجندات داخلية وخارجية
ياريت يا جماعة اللى بيعرف فين الناس اللى بتوزع الاجندات دى يجبلى واحده بس ياريت تكون بتاعه 2012 ومن تكون من الشمرلى

+1000000000

ههههههههه

هم يبكي و هم يضحك

انا نفسي الناس قبل ما تتكلم تدور الكلام في عقولها و تشوفه هل منطقي و لا كلام فارغ و دعاية رخيصة للحرامية بتوعنا

انا مش بدافع عن حد او ضد حد انا بيهمني في المقام الأول و الأخير مصلحة مصرنا الحبيبة و اللي تعتبر فوق كل الناس مهما كانوا هما مين

و بسمع لكل الأطراف و بحاول اقارن بين وجهات النظر دي و اشوف انا مرتاح لمين فيهم اكتر بالعقل و المنطق

لو وجود الريس مبارك في الحكم فيه مصلحة للبلد انا معاه قلبا و قالبا بشرط البدء فعليا في الإصلاحات المزعومة و محاسبة المخربين من جميع الأطراف حكومة او احزاب او حتي مواطنين

نيجي بقا لموضوعنا اللي احنا فيه و بخصوص قناة الجزيرة


احنا بنطبق المثل البلدي اللي بيقول " لما ماقدرش علي الحمار راح يتشطر عالبردعة "
اهو احنا كدا بالظبط سيبنا الموضوع ومسكنا في كلام مش مهم

انا شايف ان الجزيرة بتنقل الحدث من ارض الواقع مباشرة بدون اي منتجة او اضافات و طبعا مع ادخال بعض التحليلات و الإتصاللات الهاتفية
اي نعم هي مهتمة بالموضوع زيادة عن اللزوم و محبشه عليه شويه بهارات للإثارة الإعلامية و كنوع من الحصريه في الأعلان لتتميز عن باقي منافسينها لكن دون تغيير في المحتوي او تزييف في الحقائق او جوهر الموضوع
و طبعا كلنا عارفين ان الجزيرة فيه تار بايت بينها و بين الحزب الوطني و دائما القناة متهمة من قبل الحزب بانها عميله و لها اجنده خاصة تتبع للحكومة القطريه اللي بستغل الجزيرة في تصفية حسابات و كمان لوضع قطر علي الخريطة السياسية في المنطقة بشكل بيمثل بروباجندا اعلاميه زي امريكا بالظبط

انا بس بوجه سؤالي للناس الي بتقول ان الجزيرة قابضة من اسرائيل عشان زعزعة الإستقرار في المنطقة
بالزمة دا كلام ناس واعيين و عيشين معانا في البلد

طيب اسرائيل هتلاقي فين نظام حكم لمصر زي النظام الحالي و لمدة 30 سنة تعالوا نحسبها بالورقة و القلم

1-اتفاقية السلام و متطبقة بحزافيرها مع تجاوزات من الانب الإسرائيلي كل شوية يضرببوا عسكري علي الحدود و احنا ناس محترمين اكبر من اننا نرد علي العيال دي ماهو العسكري دا ابن كلب و يستاهل يموت لأنه اكيد عاكس واحدة من المجنادت الإسرائيليات ولا مثلا راح اغتصبها و لا اتجوزها عرفي و خلف منها و مرضاش يعترف بأنه ابو العيالي اللي جم من الزواج دا !!!!!!!!!!
2-اتفاقية الكويز الإقتصادية و انا عن نفسي مش عارف مصر ايه بتكسب منها يا ريت لو حد يعرق يقولي
3-سيناء رجعت لينا و 99 % من الشعب المصري ما يقدرش يهوب ناحيتها لدواعي امنيه و عشان مقلقش راحة اليهود الإسرائيليين اللي بيستمتعوا بهواء طابا و شرم الشيخ و جمال الشعب المرجانية اللي بتعتبر من اجمل مناطق العالم من حيث المناظر الطبيعية و المحميات الطبيعية
حد فيكم جرب يروح شرم يشوف اد ايه الأمن بيحاول يمنع اي حد انه يروح هناك الا ما رحم ربي

4-اتفاقية الغاز الطبيعي اللي بيروح لإسرائيل بدعم كامل من الحكومة المصرية و لمدة 20 سنة
5-الحمدلله الجيش المصري بدا يتحول من مؤسسة عسكرية حربية بتطور وفي تكنولوجيا حربية و عسكرية تعزز من قوتها و سيطرتها علي المنطقة الي مؤسسة انتاجية بحته بتحقق الإكتفاء الذاتي نت مزارع عجول و فراخ و بيض و سمك و وووو الخ و اللي مش مصدق يروح يشوف مصانع الإنتاج الحربي اللي اتحولت الي مصانع حلل المنيوم و شوك و ملاعق للأكل و ادوات منزلية و غيره من سلع مددنيه و تحيا مصر و سمعني سلااااااام خلي السلاح صاحي

احان لينا مين عدو تاني في المنطقة عشان نخاف منه او عشان نقول ان النظام الحالي جنبنا اي حروب خلال ال 30 سنة الأخيرة انا نفسي اعرف احنا كنا هحارب مين و ربنا نجانا من ويلات الحروب

يمكن خايفين من السودان اللي بقت احسن مننا اقتصاديا دلوقتي و لا ليبيا و لا السعودية اللي نصف شبابنا موجود بيهم من قلة الأرزاق في مصر و لا الأردن اللي بنصدر لها كهربا و غاز و لا فلسطين اللي محاصرة بسبب تخاذلنا و جبننا و تأمرنا مع اسرائيل عليها


يا جماعة يا ريت نشغل عقلنا و مخنا قبل ما نحكم علي اي شئ و لازم الواحد يمنطق المور اللي بيشوفها و يعقلها

بلاش الحكم بالعواطف و المشاعر في كل حياتنا

العلاقة بين الاكم و المحكوم لابد ان تكون قائمة علي الود و الإحترام و الأمانة و التقدير مش بالمؤامرات و المكائد و التعتيم و التكتيم
الحاكم بيعامل المحكومين علي انهم خونة و بيتأمروا علي اسقاطة من علي العرش
و المحكومين بيتعاملوا مع الحاكم علي انه طاغية و مستبد

و فراااااااااااااغ كبير موجوود ما بينهم و قلة ثقة و حاجة قرف و النتيجة البلد في انهيار متواصل في كل مناحي الحياة

انا شايف ان الريس مبارك اخطأ في حق الشعب المصري كله و انه اتأخر كتير في انه يعلن موقفة في الترشح لرئاسة الجمهورية في المرحلة القادمة
اشمعنا دلوقتي الي افتكر انه لازم يعين نائب و اشمعني دلوقتي اللي صرح بانه مش ناوي يترشح تاني طيب كنت مستني ايه يا سيادة الريس دا خلاص كلها شهور علي نهاية و لايتك كنت هتعمل ايه تيجي قبلها بيوم و تقول انا ماشي اللي عاوز يركب الكرسي و يحكم البلد يستعد !!!!!!!!!!!!!

بالذمة دا اسمه كلام

ليه عملت ودن من طين و التنية من عجين و انت سامع و شايف ان الشعب كاره لكل اللي حواليك من سرورك و لشريفك لعادلك لعزك لعزمك لنظيفك لكل الحاشية دي و معذل انت اصريت انك تتجاهل الناس و تنفض لهم

ليه ما قلتش لأ لما سمعت ان ابنك عاوز يرشح نفسه للرئاسة من بعدك و الحزب اللي انت رئيسةة بيروج لكدا و انت عايش و فضلت ساكت بالرغم من انك الشعب غير متقبل للفكرة دي مع احرامنا لإبنك جمال اللي كان منساق من الحاشية اللي حواليك لأن مصالحهم في ان جمال هو الل يمسك حفاظا علي مصالحهم الشخصية و ثرواتهم المنهوبة من دم الشعب

الريس مبارك لو بيحب مصر مقدار زرة يبدأ علي الفور في اتخاذ خطوات فعلية و جادة للإصلاح السياسي حتي يغير ما ترسب في قلوب المصريين من ذكريات اليمة خاصة بفترة حكمة الطويلة جدا

ايه فاضل تاني دي كلها 9 شهور و تنتهي المدة بتاعتك

بالرغم من انيمعترض دائم علي كل ما حدث في فتره حكم الرئيس مبارك غلا اني حزين جدا للوضع الحالي و كنت اتمني انه يسيب الحكم سواء بارادته او بالتنحي الجبري بصورة افضل من كدا فيه نوع من التكريم و التقدير لكن هو من تسبب في كل دا و حمل البلد اكتر مما تتحمل و تسبب في خراب بيوت ناس كتير غلبانة ملهاش اي دخل لا بالسياسة و لا بالحكم و لا باي شئ تاني غير رغيف العيش و طبق الفول و الطعمية اللي للأسف اصبح اكتر وجبات الشعب المصري سواء بالذوق او بالعافية في عهد الريس مبارك

ربنا يسامحك يا سيادة الريس مبارك علي اللي الفات و يقدرك و يعينك ان يحاول يقفل الجرح الي اتفتح دا و يعالجه بحكمه و يسيب لنا ذكري طيبة نفكتره بيها بعد ما يرحل عن الحكم و يعتزل السياسة زي ما وعدن امام العالم كله

و ربنا بنصر مصر و يحميها و يقيها شر الفتنة