أنا بقالي أسبوعين نومي فيه يعتبر 5 ساعات متقطعين يوميا ..... من سهر في الشارع بسبب هروب اجهزة وزارة الداخلية كلها من بعد يوم الجمعة

والأحداث بدأت بداية ظريفة جدا ...

الشباب على الـــ Facebook قرروا يعترضوا اعتراض قوي على سياسة البلد الفاشلة بكل المقاييس .... تباعا للي شافوه في تونس الشقيقة .... بدأت بالراجل الي ولع في نفسه ... لثورة 19 يناير .... لـــجمعة الغضب .... ومش محتاج اسرد الأحداث كتييير لإنكم عارفينها وطبعا هأكتفي بالــــتعتيم التام على الإعلام والاتصالات كلها

وتتوالى الأحداث ....

فجأة (الخيانة) النت رجع ..... بعد خطاب معسول من الرئيس زي كل خطاباته ما اختلفش حاجة خالص عن خطاباته الي كلنا عارفينها

فإذا بكل الشباب الي من ايام تتعد على ايد واحدة كانوا كلهم معرضة و كان الكل بينادي (هتسقط يا خفيف === عاوز حق الرغيف) ...... تحولوا لمؤيدين والشعار بقى (بنحبك يا ريس ==== الشعب كلللله كويس)

والمشكلة ان الناس دي مانزلتش بباراشوتات من الفضاء والناس القديمة اختفت لأ الناس اتقلب مخها فجأة ...
والموضوع ده عن أقرب أصدقائي ...

انا عاوز افهم بس حاجة .... هل الناس كلها ما بتفهمش سياسة ولا كلله بيفهم في السياسة .... ولا الكل اتعملله غسيل مخ فجائي ؟

وكلله كوم .... ولغة الحوار الجديدة كووووم تاني ........ المؤيد للــمعارض ...... انتم خونة انتم هترجعوا البلد 50 سنة لورا ... والعكس صحيح ...

هل التصرفات دي واقعيه ؟ ...
هل القنوات الأرضية تقدم الصورة الواقعية؟
هل الفضائيات العربية كلها تحولت لعملاء لإسرايل ؟

انا والله حزين وبأبكي دموع على حال البلد .... ونفسي الاستقرار يرجع تاني ... أيا كانت وسيلته سواء ببقاء مبارك او بتنحيه او بتسليم سلطاته ...... بس المهم الأمن يستتب في بلدنا ....... والله الواحد بقى حزين ان الشتاء في اسكندرية الي كان أفضل وقت فسحة فالدنيا باظ بالشكل ده .... والأمان انعدم وبقينا بنقعدوا في الشارع نستنوا الحرامية والمساجين لو هيشرفونا اهو نعمللهم تشريفة عسكرية تليق بمقامهم .... ومازلت متفاجئ بمواقف الشباب من الأصدقاء والمعارف في التغيير المفاجئ الي حصللهم ده ....

وأتركلكم حرية التعبير والرد والمناقشة وأسعد الله مسائكم :)