الموضوع: انا بقيت حاسس انى فى موقع تابع للحزب الوطنى

هو مش الاخ صاحب الموضوع كان اتوقف والموضوع اتقفل مين اللى شال الايقاف ومين اللى فتح الموضوع

الكلام اللى انا هقولو دلوقتى قولتو قبل كدة مرتين تلاتة و بقوله و وهقولة على طول (والنبى حلوة الاغنية)
ومش عارف انا عمال اعيد و ازيد فى الكلام و ارغى (زى الصابونة ليه)
(يمكن اتعديت من الراجل ابو موتوسكل)
يمكن لان كل يوم اسمع حد من الناس العاقلة بتاكد كلامى
اخرهم الدكتور احمد عكاشة
اللى لسة قايل على دريم بالفم المليان

الراجل الكبير لايستطيع التغيير خلال ستة شهور
كل ما يريده هو الوقت
(ده رأى ابو الطب النفسى على مستوى العالم حاليا)

اما بقى الكلام المتعاد فهو التالى

تعليق الفقير لله مسعود على بعض الشبهات (حلوة حكاية الشبهات دى)

شبهة رقم 1
يمكن الراجل عايز يصلح بجد

الرد


1- اللى عايز يصلح كان صلح من زمااااااااااااااااااااااا اااااان( من يجى 30 سنه)

2-اللى عايز يصلح كان صلح مكنش شال اللى بيصلحو
تفتكرو من اللى شال
احمد رشدى
ابوغزالة
الجنزورى
عمرو موسى (عشان شعبولا و ال سى ان ان ينبسطو)
اسامة الباز

3-اللى عايز يصلح كان صلح ومدخلش حرب الخليج الاولى بجانب قوات التحالف

4 -اللى عايز يصلح كان صلح و مدخلش الاسطول الامريكى لاحتلال العراق 2003 فى حرب الخليج الثانيية
(لا و كمان يقولك احنا وافقنا وفقا لالتفاقية القسطنطنية لنة الف ثمنمائة وخشبة ( ثمنمائة دى مكتوبة صح والاغلط يا شباب الضاد)
اتفاقية القسطنطنية اللى وقعتها روسيا القيصرية بتاعة (الكازاتشوك و راسبوتين) مع الدولة العثمانية (بتاعة اما ياللى امان)

5- اللى عايز يصلح كان صلح و مصدرش الغاز لولاد عمنا بثلث ثمن بيعه لاخواتنا
(وبعدين يصدرهم غاز ليه و هما عمالين يقتلو فى اخوانا)

6-اللى عايز يصلح كان صلح ومحصرش اخوانا

7- اللى عايز يصلح كان صلح ومجبش مبيدات مسرطنة

8-اللى عايز يصلح كان صلح ومدخلش ولاد عمنا و حبايبنا الحلوين جوه البلد

9-اللى عايز يصلح كان صلح و مبعش القطاع العام وخرج العمال الغلابة عماش مبكر (ال عماش مبكر ال)

10-اللى عايز يصلح كان صلح ومسبش موضوع انتحار عبد الحميد شتا (بوعزيزى المصرى الاصلى)
الشاب الاول على دفعته (سياسة واقتصاد) و الذى اجتاز اختبارات الدوبلماسية المصرية اللوزعية (وبرده طلع الاول)
الا ان كل هذا لم يشفع له عند الدوبلوماسية اللوزعية و رفضوه
لانه غير لائق اجتماعيا لانه ابن فلاح (الله يرحم ابهتكم و جدودكم ويرحمك يا عبد الناصر)

11- اللى عايز يصلح كان صلح وحل قضية خالد سعيد (رحمه الله) ولفافة البانجو المحشورة فى زوره
12-اللى عايز يصلح كان صلح وحل قضية سيد بلال(رحمه الله) ( وده بقى بلع سجادة الصلاه وال بلع لحيته محدش عارف)

13-اللى عايز يصلح كان صلح.....................................

14-اللى عايز يصلح كان صلح ...................................

15اللى عايز يصلح كان صلح....................................

16اللى عايز يصلح كان صلح.....................................

كملو انتم عد لغاية متخلصوه 30 سنة عد
وشكرا

نيجى لزتونة الموضوع
سيادة الفريق أحمد شفيق رجل عسكرى من الطراز الاول
كما انه من نسبه ال 5 % الذين لم تفسدهمالسياسة كما كان يقول المشير الجمصى (ان السياسة اذا دخلت الجيش افسدته) فهو رجل ادارى من الطراز الرفيع (ايه حكاية الرفيع دى انا مش عارف)
بالبلدى كده وعلى رأى زملائى فى نوبتجية اللجان الشعبية (اللى ساعات بيبقو بلطجية و ساعات يبقوا متحولون)
ادرجى

لكن ده ميمنعش انه بيتعامل مع الفئة التى تدرس مادة الشيطنة لابليس شخصيا فى الكلية الجهنمية
ودول بقى هيورطو الفريق شفيق ابو موتوسكل (اه انا مصر و ملح وكل افعال ركوب الدماغ فى لسان العرب لابن منظور<مين ابن منظور ده> على موضوع المتوسكل)
لا مش بس هيورطوه
دول كمان هيدبسوه
و يستعبطوه
(و كل افعال الاستهبال فى الزمخشرى باب الهاء - فصل الباء مع اللا م)

ربنا يستر على الراجل النقى ده مينهم
وساعتها يبقى يدينى الموتوسكل اخد لفة
وخليله هو الهدوم الكجول (الصراحة لايق فيها مش زى ناس)
ومحدش يقولى من الناس دول
يتفضل يتمشى و يدور على يفطة عليها صورة واحد صاحبنا ومكتوب عليها

فكر جديد

اه حاجة مهمة كمان نسيتها
كل اللى عايزة النظام هو الوقت
كل اللى عايزة النظام هو الوقت
كل اللى عايزة النظام هو الوقت
كل اللى عايزة النظام هو الوقت

(حد فاكر قصة عمر الختار لما الطلاينة (اللهم الوحيدين دلوقتى الواقفين جنب الراجل الكبير) طلبوا المفاوضات عشان يكسبو وقت ويلحقو ينزلو الدبدبات (هى ايه الدبدبات دى صحيح) الى الصحراء وبكدوا قدرو يقضو على الثورة الليبية

كل ما يحتاجه النمر الجريح هو الوقت (حاجة كدة بتاع سبع شهور) لكى يستريح و يستعيد عافيته
ومن ثم يفتك بالجميع

طارق بك

إختلفنا أو إتفقنا

المهم

ان إيدك تفضل فى إيدى

مش حسيب إيدك و اوعى تسيب إيدى ...