النهارده أول يوم نرجع فيه الشغل .. طبعا كل الناس ملهاش كلام الا عن اللى بيحصل فى مصر ..
و انا جاى فى الباص الصبح اللى قاعد جنبى طلب منى أرن على موبايله .. قلت له مقفول .. قال لى اه أصله ضاع منى .. قال لى كانو بيجروا ورا حرامى فى الشارع بتاعهم و الموبايل وقع من جيبة .. و قعدنا نتكلم .. المهم لقيتة بيقول لى حاول متاخدش معاك حاجات كتير و انت نازل الصبح و خلى بالك و كده.
المهم االكلام جاب بعضه .. لقيته بيقول لى بص أنا هقول لك على حاجه بصراحه .. انا الموبايل ماضاعش منى .. أنا اتثبتت و الموبايل اتاخد منى .. بس متقولش لحد فى الشركة عشان محدش يضحك عليه و كده.
بيقول لى كان نازل يجيب دوا و بعدين أربعه وقفوه و معاهم سيوف (هو ساكن فى المرج) .. وقالوا له احنا لجنة شعبية انت رايح فين و فين بطاقتك؟ المهم اداهم البطاقة قالوا له طلع الموبايل و الفلوس اللى معاك يالا .. بيقول لى شكلهم شاربين و مش فارق معاهم .. المهم اداهم الموبايل و الفلوس .. حوالى 250 جنية .. و كانوا عايزين ياخدوا الدوا .. كانوا فاكرين انه فيه حاجات من اللى بيشربوها بس بعدين سابوه له .. و سابوا له 15 جنية عشان يروح .. قالهم طيب ممكن شريحة الموبايل .. قالوا له يلا من هنا يالا.
بس أنا عاجبنى أوى انهم سابوا له 15 جنية يروح بصراحه.
ربنا يلطف بينا.