الموضوع: دعونا نتناقش بهدوء و عقلانية من اجل مصلحة مصر

أتمنى رحيل مبارك الآن و السبب أن النظام فقد مصداقيته لدى و لدى الكثيرين منذ زمن بعيد و بناءا عليه لا أصدق أنه سيصدق معى فى الستة أشهر المقبلة و يفى بوعوده التى لم تتعدى حتى الآن كونها وعود براقة ليس هناك ضمانة واحدة على تحقيق أى منها خاصة من خلال خطابى الرئيس الذين كانا السبب فى اتخاذى هذا الموقف و بشكل خاص الخطاب الثانى فالأول تغيير وزارى لا يسمن و لا يغنى من جوع و أغلب الوزراء الذين كانوا يفترض بهم الرحيل استمروا و لم يكن رحيل جزء صغير من الفاسدين و بعض رجال الأعمال شافى لصدورنا أما الخطاب الهزلى الآخر فليس به خطوة إيجابية واحدة فانعدام نيته للترشح لفترة قادمة ليست وليدة اللحظة و الكل يعرف من كان الرئيس القادم و مع ذلك فبعد الفتنة التى أثارها خطابه ما الذى يمنع أن يتراجع فى هذا الوعد نزولا على رغبة الجماهير التى بكت من أجله و أما عن تعديل المادتين 76 و 77 فقد يعدلها تعديلا صوريا ونجد أنفسنا فى نهاية الأمر نواجه نفس الأزمة مع أنه أوفى بوعده و عدلها و أما عن طعون مجلس الشعب فماذا عن هؤلاء الذين لم يتقدموا بطعون لثقتهم بعدم جدواها و ماذا عن من انسحبوا من البداية لما حدث من فوضى و بلطجة فأين حق كل هؤلاء الفئات أما النظر إلى الطعون المقدمة حاليا فقط فيعنى أننا سنستمر بمجلس أغلبه أيضا من الحزب الوطنى حتى و إن قلت النسبة عن النسبة الحالية و ما حدث مؤخرا من إقصاء أسماء بارزة فاسدة من الحزب الوطنى سياسيا فأكاد أجزم أنه باستثناء جمال مبارك الذى لم يكن له أى صفة فيما عدا وظيفته الحزبية فقد كانت حركة عديمة الفائدة فهؤلاء المخلوعون حزبيا يستمدون قوتهم و سلطتهم من مناصبهم الإدارية و ليس من موقعهم الحزبى و الدليل استفزاز الرئيس لشعبه أمس باجتماعه بهذه الرموز و الذى ادعى البعض أنهم قد تم تهميشهم سياسيا بهذا العزل المزعوم

شاركى حبيبى

المشاركة الأصلية كتبت بواسطة sharky

يا سيدى الفاضل البينة على من ادعى
مش كده برضه و لا ايه

لكن برضه حاقولك معلومة مؤكده ان ميدان التحرير عمره ما يستحمل فى وقت واحد اكتر من 400 الف اصلا و بكده يبقى واقفين لازقين فى بعض و دا كان اكتر مكان فيه مظاهرات فى مصر !

على فكرة انا متضامن تماما مع الثورة و مع كل مطالبها
لكن لازم نفهم حاجة غايبة على كتير من المصريين

- من هو الطرف الاقوى الان (المتظاهرون و لا مبارك ) و لماذا ؟
المتظاهرون
عشان النظام مش عارف يصرفه وحاجز الخوف انكسر غير ان اقوى ما فى المتظاهرين انهم غير قابلى للاقناع سوى برحيله

- ما معنى تعيين وزير الداخلية على المعاش منذ 5 سنوات ؟؟

عشان جميع القيادات الموجوده من 13 سنه جايه من امل الدوله معقل حبيب بيك العادلى
فعشان الخيانه اللى حصلت مايقدرش يجيب غير حد من بعيد

- ها يثق الشعب المصرى فى عمر سليمان و احمد شفيق ؟

لا لا لا

- هل استمرار المظاهرات بدون التأثير على الحياة فى مصر ستأتى بنتيجة ؟؟

لا - يجب التصعيد عشان النظام بيراهن على سرعه تفاذ العزيمه

- اخبارتونس ايه و ليه ماغيروش الدستور حتى الأن ؟؟؟
تونس وضع مختلف مافيش اصلا غير كوادر الحزب الحاكم وعمر ماكان فيه معارضه -دلوقتى عندهم مشكله ان كل القايدات جايه من الحزب الحاكم زبعدين تغيير الدستور مش هو المطلوب غير ان طرد الرئيس جاى بدفعه من الجيش فالجيش هناك عنصر فى العمليه و متداخل

- ليه لم يتم ترشيح الرؤساء فى تونس رغم ان المهلة المتقبية دستوريا اقل من 30 يوم ؟؟؟
نفس الاجابه اللى فوق

- ليه رئيس تونس المؤقت (رئيس البرلمان) بيناقش النهاردة زيادة صلاحيته رغم انه مؤقت ؟؟؟
ماعرفش بس ممكن ندور على الاجابه بس اكيد فيه سبب

و اجى تانى و برضه اسأل سؤالى اللى مش لاقى له اجابة حتى الان :
ماهو السيناريو الذى يريده المتظاهرون بعد رحيل مبارك و الذى يضمن عمل تعديلات دستورية و انتخابات رئاسية نزيهة ؟؟؟؟

شرعيه الثوره والشعب

بعد ما عبرنا التحرير صلينا العصر وسط قصف من نقطه القصر العينى
اللى امنا دعا بعد الصلاه وقال
اللهم قد غيرنا ما بانفسنا فاكرمنا يا رب وانصرنا
طبعا كلنا اتهزينا

و الدعاء ده بقوله تانى وبقوله كل يوم

كلام رشيد جميل
محتاج انام واشرب شاى عشان ارد عليك بكره

المشاركة الأصلية كتبت بواسطة human12

لما تقوم ثوره صعب جدا تربطنى ببقراطيه ان الدستور مش نافع او الموظف قافل على الملف و هنستنى لما يرجع من اجازته

برلمان فاقد الشرعيه و 90% مزور ازاى يغير دستور

مبارك اى وعد للشعب قام بيه خالفه
افتكر ان التلات حاجات اللى قامت عليهم مظاهرات قبل كده الرئيس لم يتدخل الا للى الاراده الوطنيه او لقطع الطريق لاى اصلاح رغم تشدقه بالاصلاح

1- قانون الصحافه والنشر- الناس ريقها نشف والصحفيين و فى الاخر بعد 10 سنين طلع قانون ممكن يحبس اى حد حتى لو بالنيه من غير مايكتب ده رغم وعوده الشديده
2- قانون الطوارئ لم يهتز ابدا و لم يغير ابدا و لن كمان رغم وعوده انه لن يستخدم الا فى المخدرات والارهاب بس طبعا انت عارف بيستخدم فى كل حاجه
3- تغييرالدستور - طبعا عارفين انه انتهى باضحوكه و باسلوب مايخليش حد ينفع يترشح غير نجله

ديه ابرز 3 حاجات الناس عملت وقفات او مظاهرات عليها و فى الاخر ولا عمل حاجه واخلف وعوده وضحك على الناس

انا مستعجل فمش هعرف ارتب الافكار
بس خد عندك وهم ان فيه امن داخلى الامن لا يهتم الا بامن النظام فقط ولا يهتم بامن المواطن
جهاز الامن قمعى وفيه بينه وبين الناس ثأر الان يعنى لا احد يضمنهم ولا احد يثق بالجهاز الامنى الذى ينفذ تعليمات الرئيس

الراجل الغزاوى بتاع حماس طلع من السجن و هشتك ابنه فى غزه بعد 8 ساعات على الجزيره!! لا فيه نت ولا تليفوت والراجل كان فى غزه!!! ده تهريج مش امن

مبارك طول الوقت بيقول انه منحاز لمحدودى الدخل خلال 30 سنه
فيه واحد فى مصر يقدر يقول الكلام ده صح؟؟؟ لا فيه حد يصدق؟؟؟ فيه حد يثق؟؟؟!! لا

الانتخابات كل مره بيقول نزاهه و بيقول الانتخابات احلى حاجه فى مصر ومافيش فى الابداع احسن مما كان و كل مره الانتخابات مزوره باسلوب سافر

الانتخابات كانت تحت اشراف قضائى و برضه بتتزور يعنى مش هنضمن برضه بس مش مشكله القضاء مشكله الصناديق اللى بتتبدل و قصص طويله

ايه اللى يضمن الوضع يستتب و يتلموا تانى و الجهاز الامنى يرجع اسوأ مما كان و كام واحد يلموهم من المصانع ونعم لمبارك مبارك حبيبنا واول طبعه جويه الخ و غسيل مخ للشعب زى اللى انت شايفه وارقام من نوع النمو الاقتصادى فى الحكومه الجديده و ملايين فرص عمل و مافيش حد بيعد والرئيس يتنازل على رغبه الشعب و يرشح نفسه

فى روسيا حصل زينا
ويلتسين قال يكمل الاربع شهور
فى خلال الاربع شهور زود شعبيه الحزب و اترشح بوتين من الحزب و الحزب كسب و النظام استمر زى ما هو

الثوره لاما تكمل لاما النظام هيتوحش اكتر من الاول و التحرير لو عرفت تعدى قصاده تبقى بطل

الوضع اللى احنا فيه ان احنا خدنا خطوه او زى ماتقول كلنا فى قارب رايحين للحريه و الثوره بس فى النص ناس غيرت رايها وقالت لا مش مكملين لما نشوف هيحصل ايه لاسباب منها الشخصى و منها تخوف مما يبثه الاعلام او لفهم وقراءه قد تكون خاطئه

الثابت ان هذا النظام لا يمكن ان يؤتمن ولا يختلف فى ذلك احد عل حد علمى

ثوره تونس قعدت 30 يوم على قلب رجل واحد

لو نيه النظام سليمه المعتقلين ليه ماخرجوش

سؤال بسيط ليه الرئيس لم يعتذر؟؟؟؟ هل هو اله؟؟ هل هو اكبر من الاعتذار؟؟؟
30 سنه بيحكم وكله بيقوله حكيم واوامرك وشخابيطك خطه خمسيه لازم تؤدى للى احنا فيه

اكتر من 300 ماتوا فى المظاهرات ولم يعتذر او يديهم حقهم كمواطنين مصريين
1350 ماتوا فى العباره و لم يعتذر
300 بتوع القطر ولم يعتذر
وكتير ممكن نذكرهم و الرئيس لم يعتذر او يتحرك او يقول كلمه للناس ده اسمه ايه؟؟ هل هذا سلوك ممكن يؤتمن؟؟ سؤال بسيط

انا ماعرفش حد فيكم اتمسك و اتحشر فى ميكروباص مباحث ولا لأ - بس اللى عدى التجربه ديه هيعرف ان لا امل الا بالتغيير الشامل
اللى شاف ناس بتموت بدم بارد هيعرف ان لا امل الا بالتغيير الشامل

انا اشعر شخصيا بالخيانه من كل واحد غير رأيه حاسس ان انا فى وش المدفع وعارف ان اخويا واقف فى ضهرى بيحمينى ومره واحده مش لاقيه و كمان ماسك معول بيهد بيه عزيمتى

لما كنا بننضرب و مباحث امن الدوله بتمسك الناس كنت بشعر بالرعب لما اكون لوحدى او وسط ناس قليله بس لما كنت وسط ناس كتير ماكنتش باشعر بالخوف كنت بشعر ان خويا بيحمينى

دلوقتى اخويا بقى ضدى وكمان بيخونى ويقول ان احنا غلط رغم ان احنا اصلا خدنا الخطوه مع بعض بس مش راضى يكمل معايا

فيه كلام كتير بس فعلا مضغوط نفسيا و مش عارف افكر بترتيب

اتفق معاك فى كل حرف قلته