الموضوع: دعونا نتناقش بهدوء و عقلانية من اجل مصلحة مصر

انا رأيى ان الضمان الوحيد دلوقتى لرجوع الأمن واستقرار البلد هو تنحى الرئيس مبارك وتشكيل حكومة انتقالية لمدة عام لحين إجراء الإنتخابات وتعديل الدستور.
أما بخصوص الفوضى ، فاعتقد ان الحكومة بتستخدم الحكاية دى كفزاعة للشعب المصرى لتخويف الناس وبالتالى عمل ضغط على المتظاهرين والمطالبين بالإصلاح. زى بالظبط فزاعة الإخوان المسلمين اللى بيستخدموها مع الغرب.
بخصوص النقطة اللى بتقول ان علشان نعمل التعديلات الدستورية لازم يصدق عليها رئيس منتخب ، الرد على الكلام دة ان دة بيكون فى الأحوال العادية ، انما احنا دلوقتى فى حالة ثورة ، والثورة معناها ان الحكم فقد شرعيته وكمان الدستور.
الناس اللى بتنادى انه فاضل كام شهر وان كل الطلبات اتنفذت أو جارى تنفيذها ، بقولهم قولولى على طلب واحد تم تنفيذه ، هل تم تنحى الرئيس ، هل تم حل مجلس الشعب ، هل تم إلغاء قانون الطوارئ ، هل تمت محاسبة الفاسدين؟ مفيش اى حاجة من دى حصلت ، اما بخصوص اللى بيحصل دلوقتى من الحكومة فهو محاولة للخداع وإمتصاص غضب الثورة لغاية ما الأمور تهدأ وبعد كدة يبدأوا فى تنفيذ مخططاتهم. انا معاكم ان الرئيس مش هايرشح نفسه تانى ولا هو ولا ابنه ، ولكن مين قال ان المشكلة فى شخص الرئيس ، المشكلة يا سادة فى النظام بشكل عام اللى فى ايده كل خيوط اللعبة ، النظام المتحكم فى كل شئ حتى القضاء والأمن والجيش والإعلام.
إذا انتهى الموضوع على ما هو عليه دلوقتى سوف يقوم النظام بحملة اعتقالات موسعة ضد كل قادة الثورة ، والدليل على هذا الكلام هو رفضهم التام لإلغاء قانون الطوارئ.
نقطة أخيرة عاوز اقولها لكل المتضررين إقتصاديا وأمنيا من هذه الثورة وانا اولكم على فكرة ، فى مثل عندنا بيقول مفيش حلاوة من غير نار ، والحلاوة اللى احنا بنسعى ليها هى حريتنا ، اعتقد انها تستحق اننا نضحى علشانها شوية ، ونستحمل بعض شوية وهى تضحية ولا تسوى بجانب الناس اللى بتضحى بحياتها علشانا. لما حد فينا بيتعب وبيروح للدكتور وياخد علاج والعلاج ما يجبش نتيجة يبقى لازم تدخل جراحى ، بلدنا دلوقتى فى مرحلة الجراحة وقلبها مفتوح ما فضلش غير اننا نستأصل الورم السرطانى اللى معشش فى قلبها من سنين علشان نرتاح ونعرف نعيش بشكل طبيعى. رجاء استحملوا وما تكونوش انتم السلاح اللى تستخدمه الحكومة ضد الثورة ، علشان خاطر ولادكم وأحفادكم ما تقفوش فى طريق الحلم.