الموضوع: ماذا بعد الثورة دى

المشاركة الأصلية كتبت بواسطة lancerevolution

ما الطبقة دى هى شعب مصر

ههههههههه مش بالصورة السوداوية دى صدقنى يا سحس
انا هجيبلك تعليق كتبته امبارح على الفيس بوك وبقية التعليقات على نفس الموضوع

Ahmed Yasser احسن حاجه حصلت , و اللى مخلينى متفائل جدا , ان التغيير بدأ من تحت , و دا معناه انه هيتحرك و يشمل كل مكان فى البلد

زى ما ترمى حجر فى المياه , بتبدأ تتكون مكانه دوائر متحده المركز تتسع باستمرار

و بالتالى بعد ان شاء الله ما املنا يتحقق و يغور البارد , هتبدأ كل حاجه تتغير لان الامثله الفاسده هتفقد حاميها و سبب وجودها و بلدنا هتبدأ تنضف ان شاء الله


----------


Amr ELsaqqa واحد النهاردة بيقول
انا النهاردة وانا سايق على الطريق الصحراوى التزمت بالسرعة القانونية 90 ، ولاول مرة
------
فعلا لما تحس ان البلد هتنضف هتلاقى نفسك بتحسن من نفسك تلقائى وبالتالى الناس كلها هتتغير
فمثلا طول ما الواحد كان عارف ان قانون المرور ده مثلا معمول اساسا للسرقة والاستغلال مش للحفاظ على الارواح وان فيه ناس مرتشين وان في مسؤولين فاسدين ، وان فيه ناس بتخترق القانون وبتعدى ، وانك حاسس ان البلد كلها بايظة ، بيخليك عندك رغبة في التجاوز وتقول اشمعنا انا ما جتش عليا وطبعا ده كان بيدمر المجتمع

انما لو بدأنا بداية جديدة كل واحد اكيد لا شعوريا هيقف وقفة مع نفسه ويحسن من نفسه وتبدأ الروح الجميلة ترجع للمجتمع ،
شفتوا التغيير حلو ازاى


--------
Abdou Elganzory يا بني كل واحد دلوقتي

حس بالوطنية بمعناها الحقيقي
وحس إن هو الشرطة والشعب

---------
Ahmed Yasser بالظبط يا عمرو , يعنى مثلا لما كان حد يوقفك و يقولك بطاقتك قبل كده كنت تبقى مدايق و حاسس انه بيتعدى على حريتك و بيفرض سيطرته و كلام من دا

دلوقتى لو ماشى بالعربيه و واحد وقفك هتطلع بطاقتك بكل سرور , لانك عارف انه عاوز مصلحتك , و كفايه انه سايب بيته و اهله و واقف على الطريق يعمل دا , احساس الواحد بالوطنيه , وان فى حاجه اهم كتير منك بيتضائل قدامه حاجات كتير اوى



////////////

نرجع لموضوعك بقا ، انت بتقول على الناس اللى بتقف في نص الشارع وما بيبصش في المراية و وو
ده لو حس ان في رقابة بجد وفي قانون بجد وحتى لو هو انسان مفيش فيه امل ، على الاقل سيادة القانون هتردعه ، لما القانون يتنفذ لما الرقابة تبقى شديدة على كل المستويات

لما الاعلام مثلا ينصلح حاله ويعرض توعيات مرورية وسلوكية
للناس اللى فعلا عذرها الجهل ، صدقنى فيه ناس فعلا جهلة في حاجات كتير ودور الدولة تثقيفهم وتأهيلهم وهم اصلا ضحية

لما روح جديدة تنتشر ، كل حاجة هتتغير دى سنة الحياة
وهو ده التغيير اللى احنا بندور عليه

في اي بلد بيبقي في سياسه عامه كل الناس بتمشي معاها و اللي بيخرج عنها بيبقي منحرف عن السياسه العامه بمعني

النظام الحالي السياسه العامه اللي فرضها علي الناس هي سياسه مشي حالك و اللي تغلب به العب به و الغايه تبرر الوسيله فاي حد مش عاجبه المباديء دي بيبقي منحرف يعني المنحرف هو الانسان اللي عايز يمشي مستقيم

لو ربنا كرمنا بنظام جديد يلغي السياسه الحاليه الناس غصب عنها هتتغير علشان تبقي ماشية مع سياسه البلد زي اي حد مننا لما بيساقر برة انا خلال يومين في المانيا بقيت اقف في الاشارة و اعدي لما تبقي اشارة المشاه خضرا حتي لو مفيش عربيات و بلتزم بالدور و بستني الباقي من التاكسي و اخد منه الايصال النظام هناك هو اللي فرض عليا كدة و اضطريت اتغير علشان اتوأم مع النظام السائد

صدقوني لو النظام اتصلح هتلاقي الناس بتقف قدام كل واحد بيغلط و تقوله لأ

هحكيلكم موقف اسعدني جداااااااااا
امبارح كنت في ميدان التحرير و كنت رايح مشوار في شارع مصدق في الدقي خرجت و وقفت تاكسي ابيض و قلتله شارع مصدق قاللي حضرتك تعرف طريق مختصر ليه قلتله و الله انا من مدينه نصر فمعرفش اوي و بتسال ليه قاللي علشان انا مش عاوز امشي من طريق حضرتك تفتكرة طويل و تفتكر اني بضحك عليك طالما البلدبتتغير يبقي نتغير كلنا و صمم يوصلني لحد العنوان اللي انا رايحه و قعد يسال الناس كلها و احنا في الشارع عن العنوان اللي انا رايحه و انا اقوله خلاص انا هنزل هنا و اسال بقولي يا باشا اعتبر نفسك في عربيتك الخاصه و انا في غايه الذهول

و في الاخر حبيت اديله ازيد من العداد لانه انسان محترم و الله صمم و قاللي شوف العداد و ادفع علي اده انا مش هاخد زيادة

زمان كان ناس هتقول عليه عبيط لكن دلوقتي ان شاء الله هيبقي دة النظام السائد

يارب