موتور جديد ولا تصليح الحالى؟

**tamertito88** · 07-02-2011 06:01 PM

السلام عليكم ورحمة الله و بركاته يا احلى اعضاء في المنتدى كله
من 4 شهور انا كنت كتبت عن عربيتي هوندا سيفيك 1984 اللي موتورها باظ , الناهرده اخير سحبتها و الميكانيكي فك الموتور و لاقينا

في صباب اتكسر و كسر معاه البستم , الميكانيكي قالي نا انصحكش تصلحة , قرصت عليه قالي الموتور هيبقى 75 % كفاءة قلتله من ايه ؟؟ قالي ممكن الكاربيراتير ما يظبطش. الكهربا. كده يعني , الخلاصة انه قال انه هيلحم حاجة جوة الموتور تقريبا جزء في السلندر عشان الدوارة عملت فيها حاجة تقريبا ما فهمتش اوي الصراحة لاني اتعقدت , قالي حاجة جديدة
قالي انه لسة مسقط موتور هوندا سيفيك 1984 بالفيتيس و كان سعره 2200 جنيه من الحرفيين

الكلام ده صح يا شباب ؟؟

و اقترح عليا اقتراح تاني اني اجيب الموتور من غير الكاربيراتير ولا الدينامو ولا البوبينة ولا الفيتيس و قال انه هيبقى ارخص بكتير و اننا هنركب عليه القطع القديمة

افيدوني بسرعة يا شباب عشان اعرف آخد قرار عشان ارد عليه بكرة اني اجيب موتور ولا اخليه يشتغل في التاني

عايز بقى وحوش الهوندا يسمعوني زئيرهم

**SAMEH_FOUAD** · 07-02-2011 07:28 PM

هو انت كدة عندك الشميز اتشرخ

وطبعا كلامة صح وهو كدة هيعملك الصح

هات ماتور استيراد بدون ادوات التغذية هيبقى سعرة مخفض ومن غير الفتيس ممكن يعملك 1000 جنية

**m3touk_85** · 08-02-2011 03:34 PM

فى المواتير يبقي للكينج الاسطي منير فى الحرفيين امين وسعر مناسب ومش غالي وبينجز بس اهم حاجة فى التقفيل هو اللي يقفل لك ( هو عموما المواتير هو اللي بيقفل لكن عفشة انت وحظك )

بس ما تقولهولش انك من طرفي انا ( محمد معتوق ) وسامح لحسن هيبوظ لك العربية ::):):):)

**tamertito88** · 08-02-2011 04:16 PM

ههههههههههههههه يبقى بلاش منه انا عندي الميكانيكي في العاشر , بس ما حدش قالي برده ايه بالظبط ادوات التغذية

وازاي ممكن اعرف الموتور كويس ولا لأ

مشكور جدا يا محمد باشا :)

**SAMEH_FOUAD** · 08-02-2011 04:25 PM

دلوقتى انت هتجيب الماتور بدون فتيس , دينامو , بوابة بالكربراتير , اسبراتير , مارش دول ادوات التغذية الخاصة بيك لو جيبت الماتور من غيرهم هيوصل للسعر اللى انا قولتك علية

لو عايز تعرف الماتور دة كويس ولا لأ حاول تدورة وهو على الارض وتقيس كبسة لانة كربراتير ممكن يدور عادى , او كدة الراجل صاحب الماتور بيديلك الماتور وعلية اسبوع ضمان لو فية اى حاجة يعنى تسقط الماتور وتطلع على اى بنزينة تقيس الكبس ومن الكبس الماتور هيبان اذا كان كويس ولا لأ

وعندك منير كويس جدا فى الحرفيين بس خليك على ايدة وهو اللى يسقطهولك وقولة بس انا من طرف سامح بتاع الsir وهو هيقوم بالواجب او كلمنى وانت عندة وانا اظبطلك الاداء

**SAMEH_FOUAD** · 09-02-2011 01:49 AM

كبس الماتور انك تقيس احكام كل بستم ولازم مايبقاش النتيجة فى كل بستم اقل من 160 ودة تعرف منة اذا كان الماتور خفيف ولا لأ

اة يجربلك الماتور قبل مايفك مشتملاتة وبعد كدة يشيلهم

**SAMEH_FOUAD** · 10-02-2011 06:40 PM

اولا انا معرفش للاسف الرقم بتاع المحل دة

بالنسبة للكبس مالوش دعوة بالشكمان خالص دة بيقيس مدى احكام غرف الحريق عن طريق فك بوجية كل سلندر ووضع مكانة جهاز يقيس احكام كل بستم ويديك القراية عن كل بستم وفى الاخر يديك النسبة مئوية ولو اقل من 70 % يبقى الماتور دة داخل فى طقم شنبر اعلى من كدة يبقى الماتور دة حالتة جيدة لو لقيتة 78% يبقى الماتور دة حالة جيدة جيدا 80% فيما فوق يبقى ممتازة

وطبعا انت لما بتشترى الماتور معاك ضمان اسبوع تجربة تجرب فية وافتح على سرعات ممكن فى اى وقت تجربة وهو عارف انك هتركب الماتور وتطلع تكبسة