سؤال عن الضمان للسيارة اتوس برايم 2008

**kewies** · 02-04-2008 02:08 PM

هل تركيب انذار للسيارة او سنتر لوك او كاسيت او زجاج كهرباء يؤثر على الضمان او الصيانة فى غبور ... و ما الفرق بين الصيانة و الضمان و التامين على السيارة ... و ما هى الاجراءات اللازمة للاستفادة من اى منهم ؟ ارجو الاجابة بالتفصيل و لكم جزيل الشكر

**kewies** · 02-04-2008 02:52 PM

علما انها بالتقسيط..

**liquidator** · 02-04-2008 06:53 PM

أولا ربنا يباركلك في عربيتك و يكفيك شرها ... ثانيا تعالي نمسك حاجه حاجه :
- بالنسبه لتركيب الحاجات اللي انت قلت عليها دي فأكيد هايخرجك من الضمان اللا اذا ركبتها عند غبور و اللي غبور يقول لك عليه ينفع ركبه و اللي ماينفعش مش هاتقدر تركبه بس المهم لازم تركب كل حاجه عندهم مش بره عشان الضمان ...
- الصيانه هي انك تعمل للعربيه الصيانه الدوريه بتاعتها عند غبور كل 5000 كيلو
و بتدفع مصنعية الصيانه اللي بتتراوح من 110 ل 160 جنيه للصيانه الواحده ده بالاضافه لتمن قطع الغيار اللي بتتغير بشكل دوري أو قطع تكون مستهلكه حسب الاستعمال زي الفلاتر و البوجيهات و السيور و الزيوت و تيل الفرامل ...
- الضمان هو ان غبور بيضمن العربيه من عيوب الصناعه يعني غبور مسؤول انه يصلح أو يغير أي قطعة غيار تبوظ خلال فترة الضمان انت ماتكنش السبب في عطلها و تكون عطلت بسبب عيب في الصناعه زي أي طرمبه مثلا أو أي حساس أو أي حاجه في الموتور انت مالكش دعوه بعطلها , يعني عطلت لوحدها .. و ضمان غبور 3 سنين أو 60000 كيلو أيهما أقرب ...
-أما التأمين فهو انك تدفع لشركة التأمين قسط سنوي بيتراوح بين 1.5 % ل 3.5 % من قيمة العربيه الحاليه مقابل التأمين علي العربيه ضد الحوادث أو السرقه أو الحريق و في شركات كتير و كل شركه ليها شروطها و مميزتها و في تأمين تبع غبور نفسه و ده اللي أنا مأمن تبعه و مريح دماغي من وجع القلب ...

لو ليك أي استفسار تاني أنا في الخدمة ..

**casperinoo** · 02-04-2008 08:36 PM

لو ركبت الحجات ديه بره هتخرجك من ضمان الكهربا بس..يعني لو حصلك اي مشاكل في كهربة العربيه مش هيبقو مسؤلين عنها لانك لعبت في ضفيرة العربيه...
.بالنسبه للكاسيت انت ممكن تركبه بره من غير متقطع في الضفيره وكده هتحافظ علي الضمان
..انما الانذار والزجاج الكهربا والسنتر لازم يقطع
ومبروك الاتوس وكده بقينا 5 في المنتدي وا استفسار انا تحت امرك

**kewies** · 03-04-2008 01:01 PM

الف شكر على الرد يا جماعة .. لكن انا ماعرفش هل اللى ركب الكاسيت قطع فى الضفيرة وللا لا .. اتأكد ازاى ؟

**liquidator** · 03-04-2008 03:08 PM

لو العربيه مجهزه انه يركبلها كاسيت هتلاقي الفيشه بتاعة الكاسيت موجوده فابريكه لكن لو مش مجهزه يبقي اللي ركبلك الكاسيت قطع في الضفيره و ركب الفيشه دي , اخلع الكاسيت و بص وراه و شوف الفيشه دي راكبه بشكل طبيعي كائنها جزء من الضفيره وللا ملزوقه في الضفيره بشريط لحام .... و أعتقد انه أكيد انها مجهزه للكاسيت لو هي كانت جايه أصلا بسماعات من بلدها ...

**kewies** · 03-04-2008 04:56 PM

فعلا العربية كان فيها سماعات اصلا و كان فيها مكان مصمت انا خمنت انة مكان للكاسيت لكن مجهز و للا لا انا ماعرفش و مش عايز اخلعة و ابص لانى ماعرفش فى الكهرباء و خايف ابوظ حاجة