ايه رأيكم في سخان توشيبا او أريستون؟ حد جربهم؟؟؟ الدنيا مظاهرات بس انا عايز استحمى

**shery103** · 09-02-2011 11:32 AM

شوف احنا كنا لسه فى الموال ده من شهرين ، و اخترنا توشيبا الكهربا لشقة الساحل، ضمان 10 سنين و حلة ستانلس و كفاية خدمة العملاء بتاعتهم ( احنا جبنا واحد 45 لتر و واحد 35 لتر ) ، بعتولنا ناس يركبوه فى الساحل على طول ، بس فكر فى حاجة غاز لو امكن عشان استهلاك الكهربا

**goofy301** · 09-02-2011 12:02 PM

انا رأيى تجرب سخان اوليمبك ال 6 لتر غاز ناس كتير بتشكر فيه....وسعره تقرباً 500جم

**احمد المصرى** · 09-02-2011 12:33 PM

انا شخصيا جربت توشيبا العربى وبجد ممتاز جدا عيبه الوحيد ال ملوش مأشر هو مجرد لمبه زرقاء ولما يسخن تبق لمبه حمراء بس مش عيب جوهرى بعد مده الغاز دخل عندى وغيرت لغاز وبعد بحث كتير جبت وايت ويل وبجد ممتاز برضوا وبعد المقارنه بين الاتنين الغاز احسن كتير علشان المايه سخنه على طول واكيد فى فرق فى فاتوره الكهرباء

**Ahmed A Rahman** · 09-02-2011 12:47 PM

المشاركة الأصلية كتبت بواسطة hemalotfy

كنا مركيبين 2 سخان اريستون ايطالي كنا جايبينه من السعوديه وللاسف البرومه مسكته من جوه واتخرم وباظ
ركبنا مكانهم 2 سخان اولمبيك ولحد دلوقتي كويسين جدا والحمد لله

حلو اوي انهي احسن في رأي حضرتك الاريستون ولا الاوليمبك عشان فيه ناس بتخوفني من الاوليمبيك انه بيتخرم بسهولة

المشاركة الأصلية كتبت بواسطة maserati

السلام عليكم و رحمة الله و بركاته

أنا من رأيك, أنك تجيب سخان غاز و بلاش الكهرباء لأن الكهرباء بطئ و كمان هياخد كهرباء كتير و لازم تجيبه حجمه كبير, يعنى بتاع 50 لتر و لا حاجة.

و لو كانت المية ضعيفة, هات موتور ميه حصان و نص و شغله قبل ماتشغل السخان, أنا بعمل كده, لما بكون داخل آخد دش, بيبقى لازم تكون الميه قوية عشان تشغل السخان الغاز و بالتالى , بقوم مشغل الموتور قبل ما آخد دش و لما بخلص, بطفيه, بس طبعا لازم الموتور فيه بلونة طبعا, عشان يفصل أتوماتيك و مايشدش ميه عالفاضى و أنت قافل الحنفيات .

وعليكم السلام ورحمة الله وبركاته

مينفعش عندي اني اركب موتور ميا عشان انا ساكن في الرحاب وقانونا مش من حقي اعمل اي توصيلات خارجية او داخلية

انا مش من حقي اركب تكييف شباك او حتى احط دش لونه اسود عشان المظهر الحضاري للمدينة (على حسب كلامهم)

يعني موضوع موتور الميا منتهي بالنسبة لي (ممكن يقيموا عليا الحد لو عملت كده

المشاركة الأصلية كتبت بواسطة zago

نعيما مقدما

الله ينعم عليك

المشاركة الأصلية كتبت بواسطة swimmer25

انا عندي يونيفرسال غاز بقاله عندي اكتر من سنتين وممتاز جدا..اللي عندي 10 لتر بس تحفة..اشعال واطفاء اتوماتيك..ونزل بعد كده شاشة رقمية بالحرارة كمان
بتاع المصانع فعلا وحش جدا ومحتاج صيانة كتير (جلدة فعلا)
من رايي الغاز افضل كتير...مع ان معنديش غاز طبيعي..ومشغل انبوبة واحدة علي السخان والبوتجاز و الحمد لله كله تمام (معلومة انا في الدور الاول وفعلا عايز ضغط مياه كويس..كل السخانات الغاز كده)

خلي يونيفرسال مادام عندك وحط فلوسك في موتور مياه احسن زي ما قال احد الاخوة...شوية توصيلات مياه علي كهرباء ومتوجعش دماغك بعد كده..وكده كده هينفعك الموتور لما المياه تبقي ضعيفة
ولا تدخل الحمام تلاقي المياه باردة وتشغل السخان وتستني لحد ما تسخن والحوارات دي...
علي فكرة السخان الغاز اغلي من الكهرباء...نفس الحجم

وصلي صلاة استخارة قبل ما تقرر...

الف شكر بس موضوع موتور الميا مينفعش تحت اي ظرف من الظروف
انا عارف ان يونيفيرسال كويس مش وحش

بس عايز ضغط ميا عالي وبعدين حته الامان بتاعته بتخليه يفصل على طول
الميا لما بتبقى ضعيفة بتسخن جدا جدا وده بيخلي الامان اللي فيه يفصله على طول

انا اشتريت ايديال وهو احسن في انك بتفصل نص الشعلات بس برضه تدفق الميا جوا السربنتينه ضعيف وده بيخليك تتخنق وانت بتتوضأ او بتستحمى

**Ahmed A Rahman** · 09-02-2011 01:16 PM

المشاركة الأصلية كتبت بواسطة shery103

شوف احنا كنا لسه فى الموال ده من شهرين ، و اخترنا توشيبا الكهربا لشقة الساحل، ضمان 10 سنين و حلة ستانلس و كفاية خدمة العملاء بتاعتهم ( احنا جبنا واحد 45 لتر و واحد 35 لتر ) ، بعتولنا ناس يركبوه فى الساحل على طول ، بس فكر فى حاجة غاز لو امكن عشان استهلاك الكهربا

ايه راي حضرتك في السخان التوشيبا
وايه اخبار الفاتورة
اتغيرت جامد بعد تغيير السخان ؟؟؟

المشاركة الأصلية كتبت بواسطة goofy301

انا رأيى تجرب سخان اوليمبك ال 6 لتر غاز ناس كتير بتشكر فيه....وسعره تقرباً 500جم

بس انا عندي ايديال دلوقتي اللي هو هو اوليمبيك (الفرق بينهم سربنتينه نحاس ولا حديد
واعتقد ان السخان 6 لتر في الدقيقة يعني اكيد مواسيره حتبقى اصغر من اللي عندي 10 لتر

يعني مأساه اكتر

المشاركة الأصلية كتبت بواسطة احمد المصرى

انا شخصيا جربت توشيبا العربى وبجد ممتاز جدا عيبه الوحيد ال ملوش مأشر هو مجرد لمبه زرقاء ولما يسخن تبق لمبه حمراء بس مش عيب جوهرى بعد مده الغاز دخل عندى وغيرت لغاز وبعد بحث كتير جبت وايت ويل وبجد ممتاز برضوا وبعد المقارنه بين الاتنين الغاز احسن كتير علشان المايه سخنه على طول واكيد فى فرق فى فاتوره الكهرباء

طب ياريت تقولي على اخبار تغير الفاتورة ايه

الفكرة يا جماعة اني عايز حاجه نظيفة بقى زهقت
صرفت على سخانات الغاز اكتر من 1200 جنيه من ساعة ما اتجوزت

وساعات كتير مش بعرف احمي البنت الصغيرة لاني مش بعرف اضبط درجة الحرارة, في لحظة الميا بتقلب ساقعة وفي لحظة الميا بتبقى ولعة
حرام على جلدها وهي مكملتش سنتين
المشكلة ان الميا بتلعب في قوتها

حاجه انا مكنتش عايز اقولها عشان الناس متقلبش عليا :

النهارده بيركبوا الغاز في عمارتنا !!!!!!!!!!
الراجل بتاع الغاز بص لي نظرة غباء لما قلت له اني عايز اقلب الحمام كهربا
الباشا عايز يمشي ماسورة في المطبخ ثم تعبر الحمام الصغير ترانزيت وبعدين تدخل على الحمام الكبير وبعدين تحود شمال وبعدين توصل بسلامة الله الى السخان وراسه والف سيف ان الوصله متدخلش من بره الحمام

المشكلة الاساسية اللي بتواجهني هي ثبات درجة حرارة المياه وضعفها
الشكل العام مهم برضه بس مش هو الاساس

**Ahmed A Rahman** · 09-02-2011 01:51 PM

المشاركة الأصلية كتبت بواسطة lonedoctor

خليك فى الغاز احسن وارشح ليك تكنوجاز احسن نوع صناعة محلية بشاشة ديجيتال عندى من 6 سنوات ولم يعطل ابدا جربه وهتدعيلى
حسب ما سمعت باقى الانواع المحلية كلها مشاكل

القول الفيصل في الموضوع
هل بيشتغل على ضغط ميا قليل جدا ؟؟؟؟

وهل مثلا لو فتحت الساقع والميا ضعيفة حيطفي ؟؟؟