الموضوع: مبادرة استثمر ولو 100 جنيه وحافظ على اقتصاد بلدك

المشاركة الأصلية كتبت بواسطة أحمد كمال

انا مش متشفي في حد خالص يا أمير باشا ..... و ربنا العالم بنيتي

اولا ... كل المطلوب من اصحاب الأسهم الصبر و عدم البيع دلوقتي ...... المضارب بقى اللي بيركب الموجة و بيشتري و يبيع عالمكشوف (يعني ربا) و مضطر يبيع فورا لأن حسابه مكشوف و لازم يسدد .... يستاهل اللي يجراله اصلا .......

ثانيا ......انا متشفي في رجال الاعمال الانتهازيين اللي ما تهمهمش مصلحة البلد و عايزين يصفوا اسهمهم و يسيبوها تولع ..... اكيد انا مش متشفي في واحد شقيان و مشغل القرشين اللي حيلته

ثالثا .... موضوع تدوير الاقتصاد مش استهلاكي بحت و لا حاجة

اولا مش كل حاجة مستوردة

ثانيا مش كله سلع .... فيه خدمات ..... يعني اما تغسل عربيتك في محطة البنزين دي خدمات

ثالثا استهلاك بدون انتاج ازاي؟ ماهو انا اما استهلك سلعة غيري بينتجها عشان انا باستهلكها ..... و اللي انا باقدمه - سواء سلعة او خدمة - غيري بيستهلكه و تبقى العجلة ماشية

يعني اما انا - مثلا - اصلح حيطة في الشقة عندي

جبت صنايعي == اشتريت خدمة
اشتريت جبس و اسمنت و بوية === اشتريت سلعة مصنعة محليا و شغلت تاجر القطاعي اللي باع لي اللي بدوره شغل تاجر الجملة و المصنع و في النص فيه ميت واحد كسبان من اول العتال اللي شال البضاعة مرورا بالعربية النقل اللي حملت من المصنع للتاجر و المحل و اللي نقل لي المونة الخ الخ الخ

فين بقى استهلاك بدون انتاج ؟؟؟؟؟؟؟

اما انزل اشتري ملابس ليا او لزوجتي او لاولادي ؟؟؟؟؟ مش شغلت مصنع ملابس و عربيات نقل و مخزن و محل و ايجار المحل اتدفع و و و و ؟؟؟؟؟

و اما السهم يرخص ..... هياثر في ميزانية الشركة سلبا كخسارة محاسبية فقط

يعني مثال عملي : فودافون جروب خسرت محاسبيا سنة 2004 حوالي 45 مليار جنيه استرليني ..... يعني ميزانيتها كانت خسرانة 45 مليار استرليني ..... ليه؟ عشان قبلها بخمس سنين كانت اشترت مجموعة شركات المانية و المجموعة دي قيمت السمعة بتاعتها بحوالي 50 مليار استرليني .... و القواعد المحاسبية العامة في بريطانيا gaap uk تقول ان لازم تعمل amortization للسمعة في 5 سنين

هل معنى كده ان فودافون العالمية كانت خسرانة ؟؟؟؟ لأ !!!1

ال cash flow فضل زي ما هو

ال revenue فضل زي ما هو

و وزعوا كوبونات محترمة جداً في سنتها و وزعوا ارباح على الموظفين......


اذن يوجد بالفعل تأثير سلبي لانخفاض سعر السهم على الميزانية ..... و لكن ان لم يكن مصحوبا بانخفاض فعلي في الايرادات و المبيعات هيبقى تأثير دفتري فقط لا يؤثر على المصنع و لا يسبب في قفله و لا ارتفاع سعر السلعة !!


تقبل احترامي .... انا عارف طبعا ان خبرتي في البورصة مش كبيرة .... بس انا باتكلم ان تدوير الاقتصاد و تدوير حركة البيع و الشراء هو اللي هيقضي عالكساد و يمنع حدوث أزمة سيولة

كلام في منتهي الجمال و العقل

بس انا اعتقد - اعتقاد شخصي بحت- اعتقد ان الاقتصاد القائم علي الاستهلاك لا يحقق نمو فعلي بالمقارنه مع اقتصاد مبني علي الانتاج سواء زراعي صناعي الخ الخ

و علي اساس اعتقادي ده شاكك ان استمرار الصرف علي المنتجات الاستهلاكيه لن يصب في مصلحه الاقتصاد الوطني قدر صبه في مصلحه اقتصاديات الدول اللي بنستورد منها سلعنا الاستهلاكيه