الموضوع: هو سليمان قال ان المظاهرات لن يسمحوا باستمرارها كتير و انقلاب و كده ؟

سلام عليكم
مجرد رأي احب اقوله بخصوص النقاش الدائر

انا عارف ان السادة الظباط بيتكلموا من منظور الواقع و هدفهم خير
و الاخوة بيتكلموا من منظور الحق , و برده هدفهم خير

انا مش هاقول الجيش ما يقدرش و ما يعملش
لأ يقدر , خصوصا ان اللي ادى الأوامر كان فاهم نفسية كويس و عملها صح زي ما اتوصف هنا
بس الكل ناسي نقطة مهمة
مشيئة ربنا سبحانه و تعالى
ماحدش كان يتخيل ان الداخلية تتكسر
كان بالنسبة لنا كلنا من رابع المستحيلات
و اهو ربنا أراد و حصل

كل الناس اللي عايزة اللي منهم لله يغوروا مش عايزين غير الخير لهم و لأهلهم و لأولادهم من بعدهم
و أخيرا نفضوا الخوف اللي طبق على مراوحنا سنين و جابنا ورا
و كل ده ايجابي
الناس عملت اللي عليها و سعت في الأرض و حاولوا يغيروا ما بأنفسهم زي ما ربنا أمر
النجاح و النتيجة دول بقى بتوع ربنا , مش بتوع حد فينا

و بالتأكيد , أبناء الجيش المصري هما أب و أخ و قريب لكل واحد من اللي في الميدان , و اللي هايضرب رصاص حي لازم يفكر الرصاصة هاتيجي في مين من معارفه
انا عارف ان النظام شغال على ان الصورة تبقى حصار عشان مافيش ظابط يتحط في الاختيار ده و تضطره انسانيته و ضميره لعصيان الأوامر
بس لا أملك الا ان اقول : وَيَمْكُرُونَ وَيَمْكُرُ اللَّهُ ۖ وَاللَّهُ خَيْرُ الْمَاكِرِينَ

و أقول : الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الْوَكِيلُ

ده اللي حيلة الناس اللي في الميدان , و البديل هو العودة للقهر و الفساد و الظلم و العبودية ( اللي بالتأكيد ناس كتير هنا و هناك شافوا منهم كتير اكتر من السادة الظباط ) بعد ما شموا نسيم الحرية و شافوا أمل في مستقبل أحسن