الموضوع: مش هتكلم على التحرير

السلام عليكم
انا مش عامل الموضوع عشان اتكلم على التحرير و الشباب اللي فية بس هتكلم على اللي شفتة بعنيا النهاردة

قسم باب شرق و نادي الضباط اللي جمبة .. طبعا اتحرقوا في الايام السودا اللي فاتت .. النهرادة معدي لقيت شباب زي الورد بينضفوه من جوا و بيطلعوا التراب
شوية في 45 الاقي بردو شوية شباب و شكلهم فعلا يفرح .. لابسين كمامات و بيلموا الزبالة من الشارع .. بصراحة عنيا دمعت
زميلي في فنون جميلة بيقوللي انهم هينزلوا بردو ينضفوا
دا غير الايام اللي فاتت احنا اللي كنا بننظم المرور في اسكندرية كلها و مفيش طريق كان بيتقفل الحمد لله

بس اللي مزعلني .. مشفتش لحد دلوقتي واحد رابط الحزام
و قدام فندق رمادة على البحر واحد ماشي عكس الاتجاه

الحمد الله الشباب فعلا حاسيين دلوقتى ان مصر رجعت بلدهم تانى و لازم يحافظوا عليها و ينضفوها و بالنسبة للناس المخالفة دة طبيعى فى أى مجتمع لازم يكون فى ناس ملتزمة و ناس بتمشى عكس النظام , المهم نسبة الناس الملتزمة تكون أكتر عشان البلد تتحرك للامام بدل ما هى كانت بتجرى للخلف