بعيدا عن المظاهرات طبعا محدش فينا ممكن ينسي يوم الرعب او ايام الرعب اللي فاتت بس هو بجد ايه اللي حصل يعني الناس اللي كانت بتتصل تصوت دي وتقول داخلين علينا وبيضربوا نار والكلام ده حصل بجد ولا لأ ده انا بدأت اشك في نفسي من الكلام المتناقض اللي بيتقال .
وبعدين الناس اللي هربت من السجون دي يعني حتي لو واخدين اوامر يروعوا الناس هيغامروا انهم يتمسكوا تاني ولا من الطبيعي انهم كانوا يهربوا ويستخبوا في اي مكان بجد اللي حصل مش طبيعي.
ده لحد النهاردة رغم ان الامور هديت شوية بسمع قصص غريبة عن ناس بتضرب بالرصاص في الشوارع عادي ليا حد اعرفه راح يعزي في واحد قريبه مات طلع عليه بلطجية ضربوه بالرصاص بجد ازاي احنا عايشين فين هو القتل والبلطجة والسرقة بقوا عادي كده .
اكيد كل واحد فينا كان خايف علي اهله ده انا اللي اسمي بنت كنت قعدة ماسكة سكينة ومرعوبة والاطفال طبعا جالهم انهيار عصبي انا شخصيا سبت بيتي وروحت في مكان كل ساكنيه من ضباط الجيش والشرطة وبرده اتقال ان البلطجية حاولوا يدخلوه الناس دي خلاص مبقاش ممكن حد يوقفهم ولا ايه .
وعلي فكرة كان فيه اماكن متأمنة اكتر من اماكن تانية وكانوا جاهزين قبل ميحصل كل ده المكان اللي كنت فيه مثلا كان مفيش ولا لجان شعبية ولا حاجة كان متأمن بمعني الكلمة من اول يوم بجد فين الحقيقة ربنا يرحمنا وينتقم من كل المفسدين.